تاجیکستان خواستار اجرای روش‌های عملیاتی جدید در مرزهای افغانستان شد

سیمومین یتیموف، رئیس کمیته دولتی امنیت ملی تاجیکستان از وضعیت افغانستان هشداد داده و خواستار اجرای روش‌های عملیاتی جدید در مرزهای افغانستان شده است.

او در پنجاه‌وششمین نشست شورای رؤسای امنیتی و سرویس‌های ویژه کشورهای مستقل مشترک‌المنافع گفته است که تهدید تروریزم بین‌المللی و شکل‌گیری کانون‌های تنش در نزدیکی مرزها، به‌ویژه در افغانستان نیازمند روش‌های کاری جدید است.

بربنیاد گزارش رسانه‌های روسی، آقای یتیموف تروریزم بین‌المللی را یکی از تهدیدهای اصلی برای کشورهای مستقل مشترک‌المنافع پنداشته است.

با این حال، امارت اسلامی در این مورد واکنش نشان نداده است اما بارها چنین نگرانی‌ها را بی‌جا پنداشته و تأکید کرده است که امارت اسلامی امکان استفاده خاک افغانستان را به کسی نمی‌دهد. 

امام علی رحمان، رئیس ‌جمهور تاجیکستان نیز در این نشست حضور داشته و از کشورهای مستقل مشترک‌المنافع خواست تا به دلیل چالش‌های فزاینده، همکاری‌های امنیتی خود را تقویت کنند.

پنجاه‌وششمین نشست شورای رؤسای امنیتی و سرویس‌های ویژه کشورهای مستقل مشترک المنافع روز جمعه در شهر دوشنبه، پایتخت تاجیکستان برگزار شد.

روسیه، تاجیکستان، آذربایجان، ارمنستان، بلاروس، قزاقستان، قرغیزستان و ازبکستان از اعضای این شورا هستند. 

گفتنی است که ترکمنستان به عنوان ناظر در این نشست اشتراک کرده بود.