اخبار ویژه
صحبت تیلفونی رهبران افغانستان و تاجیکستان برای تقویت روابط دوجانبه
محمد اشرف غنی رییس جمهوری کشور با امام علی رحمان رییس جمهوری تاجیکستان، در مورد همکاری های دوجانبه صحبت تیلفونی کرده است.
ارگ ریاست جمهوری در اعلامیه ای گفته است که سران دو کشور در مورد روابط دوجانبه به ویژه در خصوص تجارت، ترانزیت، تقویت هر چه بیشتر همکاری های منطقوی و افزایش همکاری ها در امتداد سواحل دریای آمو، صحبت کردند.
در اعلامیه آمده است که امام علی رحمان از روند صلح به رهبری و مالکیت حکومت افغانستان حمایت اش را اعلام کرده است.
در همین حال هر دو جانب توافق کردند که تحت ریاست محمد حنیف اتمر سرپرست وزارت امور خارجه، هیاتی در روزهای نزدیک به تاجیکستان سفر کند و روی آجندای نشست روسای جمهور تاجیکستان و افغانستان به خاطر همکاری های بیشتر، کار کند.
در اعلامیه آمده است: “هیات افغانستان با هیات تاجیکستان در مورد مسایل سیاسی میان دو کشور، همکاری های اقتصادی و امنیتی به ویژه مبارزه علیه تروریزم و مواد مخدر، نیز بحث و تبادل نظر کنند.”