اخبار ویژه
اوزبیکستان: طیاره‌های دولت پیشین افغانستان را به امارت اسلامی نمی‌دهیم
مقام‌های اوزبیکستان می‌گویند که ده‌ها طیاره قوای هوایی افغانستان که توسط پیلوت‌های حکومت پیشین این کشور به اوزبیکستان آورده شده اند، ملکیت ایالات متحده بوده و به امارت اسلامی افغانستان داده نمی شوند.
بر اساس گزارش‌ها، در اواخر ماه اگست، شماری از پرسونل نظامی افغان همراه با اعضای خانواده‌های شان فقط چند ساعت قبل از سقوط کابل به دست امارت اسلامی توسط حدود ۵۰ طیاره و هلیکوپتر به اوزبیکستان و تاجیکستان فرار کردند.
عصمت‌الله ارگاشف، مشاور ارشد شوکت میرضیایف، رییس جمهور اوزبیکستان اخیراً در مصاحبه با صدای امریکا گفته است که این طیاره‌ها متعلق به ایالات متحده است و به کابل باز نخواهند گشت.
آقای ارگاشف که دپلومات ارشد ازوبیکستان در امور افغانستان است، گفت:” دولت ایالات متحده هزینهٔ آنها را پرداخته است. دولت [ ایالات متحده] دولت پیشین افغانستان را تمویل می‌کرد و بنابرین ما معتقدیم که این کاملاً به واشنگتن بستگی دارد که با آنها [طیاره‌ها] چه می‌کند.”
او افزود:” ما این تجهیزات نظامی را در توافق با ایالات متحده نگه داشته ایم و به طالبان (امارت اسلامی افغانستان) هم چنین گفته ایم.”
در همین حال مقامات دفاعی ایالات متحده نیز به صدای امریکا تایید کرده اند که اوزبیکستان و تاجیکستان هیچ برنامه‌ای برای تحویل این طیاره‌ها به امارت اسلامی ندارند.
راب لودویک، یک سخنگوی وزارت دفاع امریکا، در پاسخ به سوالی درباره سرنوشت این طیاره‌ها و هلیکوپترها گفت: “این طیاره‌ها موضوع همکار امنیتی منطقه‌ای با دولت‌های اوزبیکستان و تاجیکستان است”.
او گفت که ۴۶ طیاره در اوزبیکستان و ۱۸ طیاره در تاجیکستان وجود دارد که شامل هلیکوپترهای Mi-17 UH-60 و همچنین طیاره‌های بال ثابت PC-12، C-208، AC-208 و A-29 می‌باشند.
تخمین‌های غیررسمی نشان می‌دهد که حدود ۵۰۰ تا ۶۰۰ افغان در این طیاره‌ها به اوزبیکستان و حدود ۱۴۰ تا ۱۵۰ نفر به تاجیکستان رفته اند.
پیلوت‌های این طیاره‌ها در ماه‌های سپتامبر و نوامبر سال گذشته به امارات متحده عربی و سپس به ایالات متحده منتقل شدند.
این درحالی است که پیش از این ملا محمد یعقوب، سرپرست وزارت دفاع بتاریخ۱۱ جنوری (۲۱ جدی) به تاجیکستان و اوزبیکستان هشدار داد تا طیاره‌ها و هلیکوپترهای این کشور را برگردانند.
ملا یعقوب گفت که از این کشورها می‌خواهد تا در این راستا اقدام کنند، زیرا هیچ کشور حق ندارد که طیاره‌ها و هلیکوپترهای افغانستان را نزد خود نگهدارد یا از آن استفاده کند، در غیر آن امارت اسلامی دست به اقدام تلافی‌جویانه خواهد زد.
او افزود: “با بسیار احترام از آنان تقاضا می‌کنم که صبر ما را نه آزمایند و ما را مجبور نسازند که تا حد توان دست به عمل مشابه بزنیم.”
مقامات امریکایی می‌گویند که هنوز در مورد اینکه آیا این طیاره‌ها در آن کشورها باقی بمانند یا به جای دیگری منتقل شوند، تصمیم گرفته نشده است. اما می‌افزایند که به هیچ وجه به امارت اسلامی داده نخواهند شد.