حکومت تاجیکستان و سفارت چین در این کشور روز دوشنبه اعلام کردند که در حملات اخیر از افغانستان، پنج تبعه چینی کشته و پنج نفر دیگر زخمی شده‌اند.

سفارت چین در دوشنبه، پایتخت تاجیکستان، به شرکت‌ها و کارمندان چینی توصیه کرده که فوراً از منطقه مرزی خارج شوند.

این سفارت اعلام کرد که شهروندان چینی در دومین مورد روز یکشنبه در نزدیکی مرز افغانستان هدف حمله مسلحانه قرار گرفته‌اند. در روز جمعه، مقامات تاجیکستان اعلام کرده بودند که حمله با نارنجک توسط طیارات بی‌سرنشین منجر به کشته شدن سه شهروند چینی شده است.

تاجیکستان پیش از این نسبت به قاچاقچیان مواد مخدر و معدنچیان غیرقانونی طلا که در امتداد مرز کار می‌کنند، هشدار داده بود.

چین که همچنین مرز کوهستانی با تاجیکستان دارد، یک سرمایه‌گذار بزرگ در این کشور است.

امارت اسلامی تا کنون در مورد بیانیه‌ اخیر تاجیکستان واکنشی نشان نداده است.

اما وزارت امور خارجه افغانستان حلقاتی که قصد ایجاد بی‌ثباتی را دارند، مقصر حمله اول دانست و اعلام کرد که با حکومت تاجیکستان همکاری خواهد کرد.

دفتر مطبوعاتی امام علی رحمان، رئیس جمهور تاجیکستان، روز دوشنبه اعلام کرد که رحمن با روسای ادارات امنیتی خود دیدار کرده تا در مورد چگونگی تقویت امنیت مرزی گفتگو کند.

در این بیانیه آمده است که رحمن «اقدامات غیرقانونی و تحریک‌آمیز شهروندان افغان را به شدت محکوم کرده و دستور داده است که اقدامات مؤثری برای حل این مشکل و جلوگیری از تکرار چنین حوادثی انجام شود.»

تاجیکستان در دهه ۱۹۹۰ پس از استقلال از مسکو، که طی آن رحمن در ابتدا به قدرت رسید، جنگ داخلی بزرگی را متحمل شد. این کشور با روسیه که یک پایگاه نظامی در آنجا دارد، روابط نزدیک دارد.