دیدار عبدالسلام حنفی با معاون نماینده خاص سازمان ملل متحد برای افغانستان

عبدالسلام حنفی، معاون اداری ریاست الوزراء امارت اسلامی افغانستان با اندریکا راتوت، معاون امور بشری نماینده خاص سازمان ملل متحد برای افغانستان، دیدار نمود.

در این دیدار ابتدا اندریکا راتوت صحبت نمود و ضمن ابراز امتنان از همکاری‌های امارت اسلامی افغانستان در رابطه به توزیع کمک‌های بشردوستانه برای شهروندان افغانستان به خصوص زلزله‌زدگان هرات و مهاجرین عودت‌کننده از کشورهای مختلف، از امنیت سرتاسری و منع قاچاق، تجارت و استعمال مواد مخدر و محو فساد اداری استقبال نمود.

معاون نماینده خاص سازمان ملل متحد گفت که، کمک‌های بشردوستانه جامعه جهانی برای مردم افغانستان ادامه خواهد داشت و از مسئولین امارت اسلامی افغانستان خواست تا در زمینه رسانیدن این کمک‌ها به شهروندان مستحق افغانستان همکاری نمایند.

اندریکا خاطرنشان کرد که اخراج اجباری مهاجرین از سوی کشورهای همسایه برخلاف قوانین بین‌المللی مهاجرت می‌باشد.

معاون اداری ریاست الوزراء از کمک‌های بشری جامعه بین‌المللی برای مردم افغانستان سپاسگذاری نمود.

معاون اداری ریاست الوزراء افزود که پروسه اخراج اجباری مهاجرین افغان از کشورهای همسایه برخلاف تمامی نورم‌ها صورت می‌گیرد و مسوولین امارت اسلامی افغانستان در پروسه کمک‌رسانی بشردوستانه برای مستحقین با سازمان‌های بین‌المللی و نهادهای کمک‌رسان همکار می‌باشند.