وزارت دفاع: حمله جنگجویان داعش بالای نیروهای مرزی تاجیکستان ربطی به افغانستان ندارد

وزارت دفاع ملی، ادعای نیروهای مرزی کشور تاجیکستان مبنی بر وارد شدن جنگجویان گروه داعش از مرز افغانستان به آن کشور را رد می‌کند.

مقام‌ها در این وزارت، می‌گویند که حمله افراد گروه داعش بالای پاسگاه‌های نیروهای مرزی تاجیکستان ربطی به افغانستان ندارد و تا هنوز روشن نیست که این جنگجویان شهروندان کدام کشور اند.

روح‌الله احمدزی، سخنگوی این وزارت می‌گوید: “جنگ در خاک تاجیکستان صورت گرفته، درگیری آنجا با نیروهای تاجیکی صورت گرفته و داعشی‌ها در خاک تاجیکستان بوده، از خاک افغانستان بالای آنها صورت نگرفته، مبارزه با تروریزم مباره مشترک است، قسمیکه تهدید مشترک است.”

نیروهای مرزی تاجیکستان، روز چهارشنبه(۱۵ عقرب) ادعا کردند که ۲۰ داعشی از ولسوالی قلعه زال ولایت کندوز و از مرز افغانستان وارد خاک این کشور شده اند.

به گفته مقام‌های تاجکستانی جنگجویان داعش پس از ورد به خاک تاجیکستان بر یک پاسگاه آنان حمله کردند که در ضد حمله نیروهای مرزی آن کشور ۱۵ تن از این جنگجویان کشته شده و ۵ تن دیگر شان زنده بازداشت شدند.  

منابع رسمی تاجکی گفته اند  که آنان شب سوم ماه نوامبر سال روان میلادی، از ولسوالی قلعه زال افغانستان وارد حدود ناحیه قبادیان تاجیکستان، واقع در ۲۰۰ کیلومتری شهر دوشنبه شدند.

با این حال، این منابع گفته اند که در این عملیات ضد داعشی‌ها، ۱ سرباز مرزی و یک مامور پولیس تاجیکستان هم جان خود را از دست دادند.

 وب سایت این وزارت امور داخله این کشور، تصاویری از این حمله را منتشر کرده که در این تصاویر ۴ عراده موتر منهدم شده و چند جسد دیده می‌شود. این وزارت گفته است که این موترها و اجساد متعلق به افراد گروه داعش بوده است.

گزارشگر: علی جواد اصغری