پایان سفر رسمی دو روزه هیات تاجیکستانی به کابل

عبدالله عبدالله رييس شورای عالی مصالحه ملی، روز جمعه در كابل با سایمومین یاتیموف ریيس كميته دولتى امنیت ملی تاجيکستان دیدار کرد.

در این دیدار، رییس کمیته امنیت دولتی تاجیکستان گفت که کشورش از رهبری صلح به مالکیت افغان‌ها حمایت می‌کند و تامین امنیت و برقراری ثبات در این کشور را به سود همه کشورهای منطقه می‌داند.

آقای عبدالله تشریف‌آوری آقای یاتیموف را به کابل خیر مقدم گفت و خاطر نشان ساخت: افغانستان، امنیت تاجیکستان را امنیت خود می‌داند.

رییس شورای عالی مصالحه ملی تاکید کرد که موفقیت روند صلح افغانستان ضامن امنیت ‌‌و صلح در منطقه است.

وی افزود: “ما تلاش می‌ورزیم این مذاکرات به ختم جنگ چهل ساله و آشتی ملی در افغانستان منجر شود.”

افغانستان و تاجیکستان پس از فروپاشی طالبان روابط نزدیک داشته اند.

دو کشور روابط فرهنگی عمیق و امنیت و منافع مشترک دارند. در حالی که افغانستان در تلاش است تجارت خود را با همسایه شمالی خود به منظور دستیابی به منافع اقتصادی گسترش دهد، تاجیکستان طرفدار یک افغانستان با ثبات برای مقابله با قاچاق مواد مخدر در مرز و سرکوب فعالیت های تروریستی که دوشنبه را تهدید میکند، است.

تاجیکستان در مرز شمال شرقی افغانستان واقع شده و در مجاورت با ولایت های بدخشان، تخار، قندوز و بلخ واقع شده است.