گفتگوی اتمر و رییس جمهوری تاجیکستان درباره صلح افغانستان و همکاری اقتصادی

محمد حنیف اتمر سرپرست وزارت امور خارجه کشور پس از چاشت روز گذشته با امام‌‌علی رحمان رییس جمهوری تاجیکستان دیدار و در مورد روند صلح افغانستان و تقویت همکاری های اقتصادی گفتگو کرد.

بر اساس اعلامیه وزارت خارجه، رییس جمهور تاجیکستان از آغاز مذاکرات صلح افغانستان استقبال کرده است.

در اعلامیه آمده است: “آقای امام‌علی رحمان، ضمن ابراز امیدواری در مورد موفقیت مذاکرات صلح، از پشتیبانی دولت تاجیکستان از روند صلح و موقف اصولی جمهوری اسلامی افغانستان، به وزیر امور خارجه کشور اطمینان داد.”

آقای رحمان همچنان بر توسعه روابط دو کشور در عرصه‌های اقتصادی، تجارتی و علمی-فرهنگی تاکید کرد.

وی افزوده که همکاری با افغانستان را از اولویت‌های سیاست خارجی جمهوری تاجیکستان شمرده است.

با اشاره به تقویت جایگاه افغانستان در منطقه، آقای رحمان تاکید کرد که تعقیب پروژه‌های زیربنایی از جمله انتقال انرژی برق عامل جذب افغانستان در روند همکاری‌های منطقه‌یی می‌باشد.

آقای رحمان همچنان گفت که ملت تاجیکستان همیشه از موقف دولت افغانستان در تامین امنیت و صلح پایدار پشتیبانی و در راستای حل مشکلات سعی و تلاش کرده است.

در اعلامیه آمده است: “دو جانب در پیوند به تطبیق پروژه‌های زیربنایی، توسعهٔ تجارت و ترانزیت، انتقال انرژی، مبارزه با تروریزم و تندروی، مهار جرایم سازمان‌یافته، تحکیم همکاری‌های سرحدی، گسترش دادوستد فرهنگی و آموزش کادرهای مسلکی افغانستان صحبت‌های مفصل داشتند. آقای اتمر با تأکید بر پیوندهای عمیق تاریخی و فرهنگی میان دو کشور، خواهان گسترش روابط دوجانبه به سطح همکاری‌های استراتیژیک شد.”