لوبی
آریانا شبکې د کورني یو ورځني کرکټ ټورنمنټ د خپرولو حق خپل کړ

د آریانا نړیوالې ټلویزیوني شبکې د افغانستان د کرکټ بورډ د نوې یوې ورځنۍ کورني سیالیو زرغون افغانستان یو ورځني ټورنمنټ، چې د یکشنبې پر سهار پیلیږي؛ د خپرولو حق ترلاسه کړ.
د افغانستان کرکټ بورډد څرګندونو له مخې؛ دغه سیالۍ د یکشنبې پر ورځ د وري ۱۸ / مې پر اتمه نېټه په خوست ولایت کې پیلېږي او درې لوبډلې( پامیر اتلان، میوند مدافعین او هندوکش مهاجمان) به په دې تورنمنټ کې ولوبیږي.
آریانا ټلویزیون به د یکشنبې پر ورځ پر سیمه ییز وخت د سهار پر ۸:۳۰ دغه لوبې پر ژوندۍ بڼه خپرول پیل کړي.
پامیر، میوند او ندوکش د افغانستان نومیالۍ سیمې دي او دا هره لوبډله ورسره ځانګړی تړاو لري. میوند د کندهار ولایت یوه تاریخي سیمه ده، چې خپل ځانګړي ارزښت یې خوندي کړی او همدارنګه پامیر او هندوکش د افغانستان دوه لوړ او نومیالي غرونه دي.
دغه سیالۍ به په یوه ورځنۍ بڼه ترسره شي او ټولټال اووه لوبې به په ۱۲ ورځو کې ترسره شي. درې واړه لوبډلې به لوبې وکړي او د می پر ۲۰ نېټه پای لوبه تر سره شي.
د کرکټ بورډ د څرګندونو له مخې؛ په لوبو کې به د ملي لوبډلې ټول غړي او ځلانده ستوري برخه ولري او ځوان لوغاړي به وهڅول شي.
د دې کار موخه د ځوانو لوبغاړیو د مهارتونو لوړول او د ملي لوبډلې تجربه لرونکیو لوبغاړیو ته د هغوی ورپېژندل دي.
د افغانستان کرکټ بورډ مشر میرویس اشرف ویلي، دا کار یې د دې لوبې د پراخولو لپاره په نظر کې نیولی؛ ځکه زمونږ ولس د کرکټ له لوبې سره مینه لري او مونږ هڅه کوو، چې دا لبه په هېواد کې پراخه کړو. په دې ټورنمنټ کې به د ځوانو لوبغاړیو تر څنګ د مشرانو لوبغاړیو ګډون هم د ویاړ وړ وي. زه له مینه والو څخه غوښتنه کوم، چې راشي او په لوبغالي کې دا لوبې وګوري.
نوموړي زیاته کړې: مونږ په راتلونکیو میاشتو کې سوپر لیګ لوبو ته هم سترګې پر لار یوو. دا ټورنمنټ به زمونږ لوبغاړي نړیوالو لوبو ته چمتو کړي.
د کرکټ بورډ اجرائیوي مشر نصیب خان ویلي، د زرغون افغانستان نوم د دې لپاره غوره شوی، چې د هېواد طبیعي ښکلا انځوریزه کړي.
هغه زیاتوي: مونږ تمه لرو، چې د خوست او نږدې ولايتونو مينه وال په لوبغالي کې له دې اختریز جشن څخه خوند واخلي؛ ځکه، چې ملي اتلان سيمه له خوښیو برخمنوي.
د لوبې مهالوېش په لاندې ډول دی:
پامیر اتلان د میوند مدافعانو پر وړاندې؛ یکشنبه د غویی ۱۸ / د می ۸ د سهار ۹ بجې
د میوند مدافعین د هندوکش مهاجمانو پر وړاندې؛ سې شنبه د غویی ۲۰ / د می ۱۰ د سهار ۹ بجې
د هندوکش مهجمان د پامیر اتلانو پروړاندې؛ پنجشنبه د غویی ۲۲ / د می ۱۲ د سهار ۹ بجې
د پامیر اتلان د میوند مدافعانو پر وړاندې؛ شنبه د غویی ۲۴ / د می ۱۴ د سهار له ۹ بجې
د میوند مدافعان د هندوکش مهاجمانو پروړاندې؛ دوشنبه د غویی ۲۶ / د می ۱۶ د سهار ۹ بجې
د هندوکش مهاجمان د پامیر اتلانو پر وړاندې چارشنبه د غویی ۲۸ / د می ۱۸ د سهار ۹ بجې
د دواړو غوره نمرو لرونکیو لوبډلو ترمنځ فاینل لوبه به د جمعې پر ورځ د غویي ۳۰ / د می ۲۰ د سهار پر ۹ بجو پیل شي.
د یادونې ده، چې آریانا نړیواله شبکه به دا لوبې پخپل ټاکلي وخت په ژوندۍ بڼه په ټاکلیو ورځو کې خپروي او د خپراوي دا ویاړ یې خوندي ساتلی دی.
لوبی
د افغانستان او پاکستان د یو ورځنیو لوبو سږنۍ لړۍ وځنډېده

پاکستانيو رسنیو د یکشنبې پر ورځ څرګنده کړې، چې د افغانستان او پاکستان ترمنځ د درې یو ورځنیو لوبو لړۍ یو ځل بیا تر راتلونکي کاله وځنډول شوه.
ټاکل شوې وه، چې دواړه هېوادونه د ۲۰۲۱ زېږدیز کال د سپټمبر په لومړیو کې د سریلانکا پر کوربتوب درې یو ورځنۍ لوبې ترسره کړي؛ خو د پاکستان کرکټ بورډ ویلي وه، چې د افغانستان کرکټ بورډ د دې لړۍ د ځنډولو غوښتنه کړې ده.
د پاکستان کرکټ بورډ څرګنده کړې؛ دواړه بورډونه به هڅه وکړي، چې دغه سیریز په ۲۰۲۲ زېږدیز کال کې تر غور لاندې ونیسي.
د پاکستان جیو نیوز د نامعلومو سرچینو په حواله راپور ورکړی، چې دا ځل د پاکستان د لوبډلې د بوختیا له کبله دا لوبې وځنډول شوې.
د راپورونو له مخې، یاده لړۍ به اوس د راتلونکي کال تر اپریل پورې ځنډېدلې وي.
لوبی
د افغانستان د کرکټ د اتم لیګ سیالیو مهالوېش په ډاګه شو

د افغانستان کرکټ بورډ د دوشنبې پر ورځ د غبرګولي دېرشمه) د کرکټ د اتم لیګ سیالیو مهالوېش اعلان کړ.
ټاکل شوې دغه لیګ په کابل کې د چنګاښ پر ۲۷ پیل او د زمري تر ۱۴ روان وي.
د افغانستان کرکټ بورډ ویلي، چې په دې لښتیلیک یا جدول کې ټول مهم ټکي په پام کې نیول شوي او ټولې لوبډلې به د لښتیلیک له مخې ډګر ته وردانګي.
ټاکل شوې د دغه لیګ په لومړۍ لوبه کې د کابل عقابان لوبډله د مس عینک له لوبډلې سره مخامخ شي.
د یادونې ده، چې سږ کال به په دغه لیګ کې د پامیر زلمي او د هندوکش ستوري نومې دوه نوې لوبډلې له نورو لوبډلو سره یوځای لوبې وکړي.
لوبی
قطر د فیفا نړیوال جام له رسمي پوسټره مخکتنه وکړه

د قطر ۲۰۲۲ نړیوال جام ترسره کوونکې کمېټې د چارشنبې پر ورځ د غبرګولي پېنځه ویشتمه د خپلو اړوند سیالیو له رسمي پوسټره مخکتنه وکړه.
د ۲۰۲۲ نړیوال جام سیالۍ د روان کال په مني کې د قطر پر کوربتوب ترسره کیږي.
دا پوسټر قطریانو څلورڅنډیز ډیزاین کړی؛ توپ او هیا ۲۰۲۲ پرې انځوریز شوی، چې نړیوال جام ته د بلنې پوره معنا وړاندې کوي.
د نړیوال جام دغه پوسټر د لومړي ځل لپاره یوې ښځینه هنرمندې ډیزاین کړی دی.
د قطر ښځینه هنرمندې بوثینه المفتاح د ۲۰۲۲ نړیوال جام د پوستر مخکتنه وکړه، چې په قطر او عربي نړۍ کې د فوټبال له نندارې د ملاتړ سمبول دی.
المفتاح څرګندوي: زما الهام د ټولنیزې حافظې ساتنه ده. زما ټول کار پر تېرو تجربو او یادونو راڅرخي، چې له اوسنيو غوښتنو او پوښتنو سره یې نښلوي او په نوې بڼه یې خوندي کوي. ومې غوښتل، چې پوستر جوړوونکي همدا ارزښت خوندي کړي او د قطري فوټبال هڅوب او فرهنګ وړاندې کړي. هو! ما غوښتل، چې دا پوستر په قطر کې د فوټبال ننداره او مینه والو دواړه وښیي. یعنې دا پوستر د ګوترا او ایګل (سنتي سرپوښ) انځوریز کوي، چې په هوا کې څپه ییزه ننداره جوړوي. دا هغه څه دي، چې مینه وال یې د ګول کولو په وخت کې ترسره کوي.
-
تازه خبرونه4 days ago
د پکتیکا ولایت د ګیان ولسوالۍ زلزله ځپلي اوس هم خوراکي توکو او سرپناه ته اړ دي
-
تازه خبرونه5 days ago
د پکتیکا او خوست ولایتونو زلزله ځپلي د بیات بنیاد له مرستو برخمن شول
-
تازه خبرونه4 days ago
د افغانستان په وروستۍ زلزله کې ۲۸۸ ماشومانو ته مرګ و ژوبله اوښتې
-
تازه خبرونه4 days ago
هند په کابل کې خپلې سفارتي چارې بیا پیل کړې
-
تازه خبرونه3 days ago
د کولرا له خطر سره مخ په زرګونه زلزله ځپلي پاکې اوبه او خوراکي توکي غواړي
-
تازه خبرونه4 days ago
تایوان د افغانستان له زلزله ځپلیو سره یو میلیون ډالري مرسته اعلان کړه
-
تازه خبرونه2 days ago
افغاني سرې میاشتې ټولنې زلزله ځپلیو ته لس میلیون افغانۍ ځانګړې کړې
-
تازه خبرونه21 hours ago
له کوم هېواد یا بهرني شرکت سره د ډبرو سکرو د صادراتو تړون نلرو