د دفاع وزارت ویاند ويلي، چې د دفاع وزارت چارسمبالي محمد یعقوب مجاهد په کابل کې د قطر له شارژدافیر مردف القاشوطي سره په لیدنه کې قطر د " ملګري او همکار" هېواد په توګه وستایه او له دې هېواد سره یې د دوامداره اړیکو د ودې او پیاوړتیا پر اړتیا ټینګار کړی دی.

عنایت الله خوارزمي په یوه خبرپاڼه کې لیکلي، چې محمد یعقوب مجاهد د افغانستان له خلکو سره د قطر له اوږدمهاله مرستو او همکاریو ستاینه وکړه.

د خوارزمي د څرګندونو له مخې؛ دواړو خواوو د اقتصاد، سوداګرۍ، د کابل او دوحې ترمنځ د دوه اړخیزو اړیکو پیاوړتیا او نورو اړوند مسلو په برخو کې د ډېرو نورو همکاریو په اړه بحث او خبرې کړې دي.

دا په داسې حال کې ده، چې د دفاع وزارت چارسمبالي پرون په کابل کې د سعودي عربستان له سفیر فیصل بن طلق البقمي سره هم لیدنه کړې وه.

د چین حکومت د پنجشنبې پر ورځ اعلان وکړ، چې په افغانستان کې یې د چینایي کان کیندونکي د وژنې په اړه اسلامي امارت ته خپل اعتراض وړاندې کړی دی.

د فرانسې خبري سرچینې د راپور له مخې؛ د چین بهرنیو چارو وزارت ویاند ماو نینګ ویلي؛ بیجینګ له اسلامي امارت څخه غوښتي، چې د پېښې په اړه هر اړخیزه څېړنه وکړي او عاملینو ته یې سزا ورکړي.

ماو وایي، چې چين له دې وژنې سخت ټکان خوړلی او پر کلکه يې وغندله.

دا چینایي تبعه، چې "لي" نومېږي د روانې اوونۍ د سې‌شنبې پر ورځ د تخار ولایت د خواجه بهاوالدین ولسوالۍ په اړوند سیمه کې وژل شوی دی.

د تخار پولیسو ویلي، چې هغه له خپل ژباړونکي سره د امنیتي چارواکو له خبرولو پرته له خپل کارځای څخه نامعلوم لوري ته وتلل و.

د داعش ډلې د دې برید مسوولیت منلی دی.

د جرمني چارواکو اعلان کړی؛ د اشافنبرګ د ښار په یوه پارک کې یو ۲۸ کلن افغان، چې د چړې پر برید یې دوه کسان وژلي؛ نیول شوی دی.

د باواریا ایالت د کورنیو چارو وزیر یواخیم هرمن ویلي، چې د چارشنبې پر سهاردغه کس په سکوینټل پارک کې د پخلنځي پر چړې برید وکړ.

هغه زیاته کړې، چې په دې بريد کې يو ۴۱ کلن جرمني او يو دوه کلن ماشوم، چې مراکشي الاصله و؛ ووژل شول.

دغه راز د دوه ماشومانو په ګډون څلور نور کسان ټپیان شوي هم دي.

هرمن ویلي؛ دغه کس، چې د تاوتریخوالي د ډک چلند مخینه لري؛ د رواني ناروغۍ تر درملنې لاندې و. هغه زیاته کړې، چې د دغه کس د پناه غوښتنې بهیر تړل شوی و او هغه ویلي وه، چې په ډسمبر کې به په خپله خوښه له جرمني ووځي؛ خو هغه په ​​جرمني کې پاتې شو.

دا په داسې حال کې ده، چې له څو بریدونو وروسته د جرمني حکومت د تېر کال په اګست کې د افغان مجرمینو د ایستلو بهیر اعلان کړې دی.