د طبیعي پېښو پر وړاندې د مبارزې وزارت نن (سې شنبه د غبرګولي نهمه) څرګنده کړې، چې د غبرګولي له لومړۍ نېټې راپدیخوا د هېواد په ۱۳ ولایتونو کې د وروستیو اورښتونو له کبله ۲۴ کسان مړه شوي او ۱۳ نور ټپیان دي.

د طبیعي پېښو پر وړاندې د مبارزې وزارت ویاند شفیع الله رحیمي وايي؛ د هوا پېژندنې ادارې د وړاندویېنې له مخې په تېرو ۲۴ ساعتونو کې د هېواد په ۲۰ ولایتونو کې بارانونه شوي، چې له کبله یې په پکتيا، پکتيکا، ميدان وردګ او خوست ولايتونو کې درې کسان مړه شوي او یو  ټپي دی.

همدارنګه د دغو بارانونو له کبله ۳۱ کورونه جزوي او یا هم بشپړ ویجاړ شوي دي.

شفیع الله رحیمي وايي، د غبرګولي له پیل راپدیخوا د هېواد په ۱۳ ولایتونو کې ۲۴ کسان مړه شوي، ۱۳ ټپیان دي او ۱۲۰ کورونه بشپړ ویجاړ شوي او څه باندې ۳ زره جریبه کرنیزه ځمکه او بڼونه اوبو ویجاړ کړي دي.

د نوموړي د څرګندونو له مخې؛ د طبیعي پېښو پر وړاندې د مبارزې وزارت د ملګرو ملتونو د بنسټونو او خیریه موسسو پر همکارۍ د روان میلادي کال د غبرګولي له لومړۍ راپدیخوا پر څه باندې ۱۵ زره کورنیو خوراکي او غیر خوراکي توکي او نغدي مرستې وېشلي او دا لړۍ اوس هم روانه ده.

د دولت د طبیعي پېښو پر وړاندې د مبارزې وزارت چارواکو ويلي، په تېره یوه میاشت کې د هېواد په ۳۱ ولایتونو کې د زلزلې او سېلابونو له کبله ۲۹ کسان مړه شوي دي.

د دولت د طبیعي پېښو پر وړاندې د مبارزې وزارت ویاند شفیع الله رحیمي وايي، په دې طبیعي پېښو کې ۱۰۵ نور ټپیان شوي دي.

د نوموړي د څرګندونو له مخې؛ ١٥٥ کورونه په بشپړه توګه ويجاړ شوي او ١٢٤٢ يې جزوي وران شوي دي. همدارنګه ۸۴۸ څاروي له منځه تللي او ۷۱۰۶ جریبه کرنیزه ځمکه له اوبو وړې ده.

شفیع الله رحیمي زیاته کړې، چې د دولت وزارت په بېړنۍ توګه له طبیعي پېښو سره د مبارزې په برخه کې له دغو پېښو څخه زیانمنو ته مرستې ګړندۍ رسولي دي.

ویل کیږي، چې دغه وزارت د دولتي اړوند بنسټونو او رياستونو په همکارۍ څه باندې څلوېښت زره کورنيو ته بېړنۍ مرستې وېشلي او دا لړۍ روانه ده.

د افغانستان د هوا پېژندنې ادارې د دوشنبې پر ورځ ( د وري یویشتمه ) د سالنګ لویې لارې په ګډون د هېواد په اووه ولایتونو کې د واورې او باران خبرداری ورکړی دی.

د دې ادارې د معلوماتو له مخې؛ په بدخشان، تخار، بغلان، سمنګان، پروان، پنجشېر او نورستان ولایتونو کې د سختو واورو او بارانونو وړاندویېنه شوې ده.

دې ادارې د سالنګ پر لویه لار د واورې ورېدو خبرداری هم ورکړی دی.

د سرچینې د څرګندونو له مخې؛ امکان لري په یادو ولایتونو کې د واورې او باران کچه تر ۳۰ ملي مترو پورې ورسیږي.

د انرژۍ او اوبو وزارت د هېواد د سیندیزو حوزو په ځینو سیمو کې د سېلابونو او د اوبو د سطحې له لوړېدا خبر ورکړی او څرګندوي: د اورښتونو او واورو د اوبه کېدو له کبله په ځينو اړوند سیندیزو ساحو (کوکچه، تالقان، بغلان، پنجشېر او غوربند) کې د سېلابونو راوتلو شونتیا لیدل کیږي.

دغه وزارت د ټیټو سيمو له عامو وګړیو غوښتنه کړې، چې په پوره پاملرنه دې د سيلابونو او اورښتونو پر مهال سیندونو ته له نږدې کېدو ډډه وکړي.