اسرائیلو د ایران پر وړاندې د عراق له یوې پټې اډې عملیات کړي

وال سټریټ ژورنال ورځپاڼې د سرچینو د څرګندونو له مخې راپور ورکړی، چې اسرائیلو د ایران پر ضد د خپلو هوايي عملیاتو د ملاتړ لپاره د عراق په یوه دښته کې پټه پوځي اډه جوړه کړې وه.

د راپور له مخې؛ دغه اډه د اسرائیلو د هوايي ځواک لپاره د ملاتړ او لوژستیکي مرکز په توګه کارېده او هلته ځانګړي ځواکونه او د لټون او ژغورنې ډلې هم ځای پر ځای شوې وې، چې که اسرائیلي پیلوټان راوغورځېږي؛ چټک به عملیات ترسره کړي.

وال‌سټریټ ژورنال لیکلي، چې دغه تاسیسات د جګړې له پیلېدا لږ مخکې، د امریکا پر خبرتیا جوړ شوي وه.

په راپور کې دا هم راغلي: اسرائیلي ځواکونو لږ تر لږه په یوه مورد کې د دې لپاره، چې د اډې ځای افشا نه‌شي؛ د عراقي ځواکونو پر مورچلو هوايي بریدونه کړي دي. ویل کېږي؛ دا بریدونه هغه مهال ترسره شول، چې عراقي ځواکونه سیمې ته نږدې شوي وه.

د دې ورځپاڼې د څرګندونو له مخې؛ موضوع هغه وخت رسنیزه شوه، چې د عراق دولتي رسنیو د مارچ میاشتې په پیل کې داسې راپور ورکړ: یوه شپانه عراقي چارواکو ته د مشکوکو پوځي فعالیتونو؛ لکه د هلیکوپټرو له تګ‌راتګ خبر ورکړی و. له هغې وروسته عراقي ځواکونه د سیمې د څېړنې لپاره واستول شول.

ویل کیږي، چې کله عراقي ځواکونه سیمې ته نږدې شول؛ هوايي بریدونه ترسره شول، چې د دغې پټې اډې د پېژندنې مخه ونیول شي.