د رویټرز خبري سرچینې د راپور له مخې؛ اسرائیلو ۵۰۰۰ پیجرونه الوځولي، چې له کبله یې تر اوسه د حزب الله له ۱۰ ډېر کسان وژل شوي او نږدې درې زره ټپیان دي.

رویټرز په لبنان کې د یوې لوړ پوړې امنیتي سرچینې او یوې بلې سرچینې د څرګندونوله مخې په یوه راپور کې ویلي، چې د سې شنبې د ورځې له چاودنو مخکې د اسرائیلو د استخباراتو او ځانګړو عملیاتو ادارې موساد د حزب الله لخوا کارېدونکیو ۵۰۰۰ پیجرونو کې چاودېدونکي توکي ځای پر ځای کړي وه.

د رویټرز د څرګندونو له مخې؛ دا عملیات، چې په ټول لبنان کې د زرګونه پیجرونو د چاودنې لامل شول او یو شمېر خلکو ته یې مرګ او ژوبله اړولې، د حزب الله یوه بې ساري امنیتي ناکامي ده.

د لبنان یوې امنیتي سرچینې ویلي: هغه پیجرونه، چې حزب الله یې د پېرودلو امر کړی و؛ ګولډ آپولو نومي تایواني شرکت جوړ کړي او لبنان ته لیږلي وه.

د دې شرکت چارواکو ویلي، چې دوی دا پیجرونه پخپله نه تولیدوي؛ خو «ګولډ آپولو» نومي یوه اروپايي کمپنۍ د دغو وسایلو جوړونکې ده.

اسرائیلو تر اوسه په رسمي توګه د حزب الله د غړو د پیجرونو په چاودنه کې د دوی د استخباراتي ادارې لاس لرلو تورونو ته غبرګون ندی ښودلی.

که څه هم په لبنان کې د ایران ملاتړي وسله‌وال په دې باور دي، چې اسرائیل په مستقیم ډول پدې عملیاتو کې ښکېل ول او باید د حزب الله غچ اخیستونکي ځواب ته پر تمه اوسي.

رویټرز په خپل راپور کې د څو سرچینو د څرګندونو له مخې ویلي؛ داسې ښکاري، چې دا عملیات څو میاشتې مخکې پلان شوي وه.

د دغه راپور له مخې؛ حزب الله مخکې له دې د تایوان له یوې کمپنۍ سره، چې د روان کال په لومړیو کې لبنان ته ورسېدل؛ د ۵۰۰۰ پیجرونو د پېرودلو غوښتنه کړې وه.

دوه سرچینو رویټرز ته ویلي، چې د حزب الله وسله‌والو له دې پیجرونو څخه یوازې د متني اړیکو د ټیټې تخنیکي وسیلې په توګه کار اخیسته، چې اسرائیل دوی ونه‌څارلی شي.

د لبنان لوړ پوړیو سرچینو دا ادعا هم کړې، چې د اسرائیلو جاسوسي ادارې د تولید په مرحله کې د پیجر وسایلو کې لاسوهنه کړې.

د دې سرچینې د څرګندونو له مخې؛ موساد په دې پیجرونو کې داسې تختې لګولې وې، چې ان سکنرونو هم کشفولی نشوې او یوازې پخپل ځانګړي شفر فعالېدل.

دې سرچینې زیاته کړې، چې د دې پیجرونو ۳۰۰۰ وسیلې په یوه وخت کې د شفري پیغام پر لیږلو چاودنه کړې.

یوې بلې امنیتي سرچینې رویټرز خبري سرچینې ته ویلي، چې په نویو پېرودل شویو پیجرونو کې تر درې ګرامه پورې چاودېدونکي توکي ځای پر ځای شوي وه.

د حزب الله یوه چارواکي، چې نه یې غوښتل نوم یې واخیستل شي رویټرز ته ویلي، چې دا چاودنې د اوکتوبر پر اوومه د اسرائیلو او حماس ترمنځ د غزې د جګړې له پیل راپدېخوا د دې ډلې لویه امنیتي نیمګړتیا پرګوته کوي، چې د لبنان جنوبي سرحدونو ته هم غځول شوې ده.

د رویټرز سره په خبرو کې د منځني ختیځ لپاره د ملي استخباراتو پخواني مرستیال جوناټن پانکوف دا چاودنې په وروستیو لسیزو کې د حزب الله تر ټولو ستره استخباراتي او ضد استخباراتي ناکامي یاده کړې ده.

د سې شنبې پر ورځ ( د وږي اوو‌ویشتمه / د سپتمبر اووه‌لسمه) د جوبايډن مرستيالې او د امريکا د ولسمشرۍ ټاکنو ته نوماندې کامالا هریس د غزې پر ضد د اسرائيلو د جګړې او د فلسطيني ځمکو د نه لاندې کولو د پای ته رسولو غوښتنه وکړه.

هغې ټینګار کړی، چې د شاوخوا یوې کلنې جګړې له پای ته رسېدو وروسته اسرائیل باید د فلسطین محاصره شوې خاوره بیا لاندې نکړي.

هغې، چې په فلاډیلفیا کې د تورپوستو ژورنالستانو ملي ټولنې ته وینا کوله؛ د حماس او اسرائیلو تر منځ یې د داسې اوربند، د دوه دولتونو حل او په منځني ختیځ کې د ثبات رامنځته کولو غوښتنه وکړه، چې ایران پیاوړی نکړي.

هریس د خبریالانو د پوښتنو په ځواب کې ویلي: مونږ په ښکاره ویلي، چې په سیمه کې د ټولو د ګټو لپاره باید یوه هوکړه وشي.

د فلسطین روغتیا وزارت د غزې تړانګې د قربانیانو وروستی شمېر خپور کړې او وایي، چې د ۲۰۲۳ کال د اوکتوبر له اوومې راپدېخوا په دې سیمه کې ۴۱ زره ۲۵۲ کسان وژل شوي دي.

واشنګټن به په غزه کې د اوربند د هوکړې اصلاح شوې طرحه مصري او قطري اړخونو ته وړاندې کړي.

اوسمهال د لانجې یو تر ټولو مهم ټکی د غزې او مصر پر پوله د اسرائیلو د لومړي وزیر د پاتې کېدو ټینګار دی. په داسې حال کې، چې حماس له دې سیمې څخه د اسرائیلي پوځیانو پر بشپړ وتلو ټینګار کوي.

 د ناټو عمومي منشي ینس سټولټنبرګ په خپلو څرګندونو کې ویلي، چې پر روسیې د اوکراین د لرې واټن ویشتونکیو توغندیو د توغولو په اړه له خبرو هرکلی کوي؛ خو هر هېواد دې په دې اړه خپله پرېکړه وکړي.

د اوکراین ولسمشر ولادیمیر زیلینسکي له څو میاشتو راپدېخوا له خپلو متحدینو کیف ته د روسیې پر خاوره د امریکا د اوږده واټن ویشتونکیو توغندیو او د بریټانیا د توپان سیوري په ګډون د غربي توغندیو د کارولو اجازه غوښتې، چې د مسکو د بریدونو اغېز پرې محدود کړي.

د بریټانیا لومړي وزیر کر سټارمر او د امریکا ولسمشر جو بایډن د جمعې پر ورځ په واشنګټن کې بحث وکړ، چې آیا کیف د روسیې پر اهدافو لرې واټن ویشتونکي توغندي وکاروي او که نه؛ خو په دې اړه کومه پرېکړه اعلان نشوه.

سټولټنبرګ زیاته کړې: زه له دې پرمختګونو او دې پرېکړو هرکلی کوم؛ خو هر متحد باید وروستۍ پرېکړه پخپله وکړي. متحدین پدې اړه بېلابېلې تګلارې لري.

رویټرز راپور ورکړی، چې ځینې امریکایي چارواکي شکمن دي، چې د مسکو پر وړاندې د دغو توغندیو د کارولو اجازه به د روسیې د ځواکونو پر وړاندې د کیف په جګړه کې د پام وړ بدلون رامنځته کړي.

د روسیې ولسمشر ولادیمیر پوتین ویلي، که غرب اوکراین ته اجازه ورکړي، چې د لویدیځ پر لرې واټن ویشتونکیو توغندیو برید وکړي؛ نو دا به له روسیې سره په جګړه کې د لویدیځ د ښکېلتیا معنا ولري.

د ناټو عمومي منشي د روسیې د احتمالي غچ اخیستنې په اړه د یوې پوښتنې په ځواب کې ویلي: په جګړه کې له خطر پرته بل غوراوی نشته؛ خو زه ډاډه یم، چې زمونږ ( بریټانیا او ناټو)  لپاره ترټولو لوی خطر به په اوکراین کې د ولسمشر پوتین بریا وي.