د اسلامي امارت د اوبو او انرژۍ وزارت چارسمبالي په چین کې د ” یو کمر بند یوې لارې نوښت” د انرژۍ د وزیرانو په درېیم نړیوال کنفرانس کې د وینا پر مهال ویلي؛ د افغانستان او چین ځمکنۍ لار به له سیمې سره سوداګریزې اړیکې او د انرژۍ دهلېزونه پراخه کړي.

د افغانستان د اوبو او انرژۍ وزارت چارسمبالي عبداللطیف منصور ډاډ څرګند کړ، چې اسلامي امارت له خپل ستراتیژیک جغرافيايي موقعیت څخه پر ګټنې د منځنۍ آسیا، سویلي آسیا او منځني ختیځ د هېوادونو د اتصال یو مهم ځمکنی هم پل دی. دا دریځ افغانستان د چین د یو کمربند له لارې یو اړین شریک جوړوي؛ ځکه، چې د ځمکې له لارې سوداګریزې اړیکې او د انرژي دهلېزونه سیمه او چین له اروپا سره نښلوي.

هغه وایي: افغانستان د خپل موقعیت له مخې منځنۍ آسیا له سویلي آسیا او چین سره ونښلوي او د انرژۍ د پایپ لاینونو او د انرژي د زیربناوو له پراختیا سره ټولو ته بېلابېله انرژي ولېږدوي.

د نوموړي په دې غونډه کې د هېواد د برښنا کموالي ته له نغوتې سره ویلي؛ تمه ده، چې هېواد به په راتلونکي لپاره د برښنا انرژۍ بازار ته وده او پراختیا ورکړي.

نوموړی وایي: مونږ پدې باور یوو، چې ډاډمنې برښنا ته لاسرسی، خوندیتوب، د انرژي امنیت او د انرژي په وړاندې کولو کې تعادل، د افغان ټولنې د اقتصادي او ټولنیز پرمختګ لپاره اړین شرطونه دي.

د اسلامي امارت د اوبو او انرژۍ وزارت چارسمبالي زیاته کړې؛ د خپل پېنځه کلن پلان له مخې به د افغانستان انرژي له کورنیو سرچینو برابره شي؛ ځکه افغانستان د اوبو، باد او لمر پراخې وړتیاوې لري؛ خو اوسمهال د سیمې له هېوادونو په ځانګړي توګه له ترکمنستان او ازبکستان څخه برېښنا واردوي.

هغه وایي: لکه څرنګه، چې معلومه ده، د لومړنیو اټکلونو او سروې ګانو له مخې، افغانستان کولی شي نږدې ۳۱۸ ګیګاواټه برښنا د نوې کیدونکې انرژۍ له سرچینو څخه تولید کړي، چې په کې د اوبو سرچینې (۲۳۰۰۰ میګاواټه)، د باد د انرژي سرچینې (۶۷۰۰۰ میګاواټه) لمریزه انرژي (۲۲۲۰۰۰ میګاواټه) جیوترمل انرژي (۳۰۰۰ څخه تر ۳۵۰۰ میګاواټه)، بایوماس انرژی (۴۰۰۰ میګاواټه) رانغاړي.

عبداللطیف منصور په چین کې د  یو کمر بند یوې لارې نوښت د انرژۍ د وزیرانو په درېیم کنفرانس کې دا ډاډ هم څرګند کړ، چې د واخان دهلېز پرانیستل به نه یوازې د افغانستان او چین اړيکې پراخه کړي، بلکې د سیمه‌ییز اتصال زمینه به هم ورسره رامنځته شي.

له نېکه مرغه په تېرو درې وروستیو  کلونو کې مو د برېښنا انرژي د پر ځان بسیا کېدو په لور ستر ګامونه اخېستي او د هېواد د ښېرازي په لوري لا نور ورګړندي کیږو.

منصور د انرژۍ د سرچینو او همکاریو په اړه څرګنده کړې : افغانستان د پام وړ غیر استعمال شوې طبیعي زیرمې لري؛ طبیعي ګاز او منرالونه د نړۍ د انرژي د لیږد لپاره مهم عناصر دي. د چین هېواد سره زمونږ د هېواد د انرژۍ د سکټور د همغږۍ هڅې کولی شي د دواړو هېوادونو د ګټو لپاره دا سرچینې راوسپړي او د سیمه‌ییزې انرژۍ د امنیت ملاتړ وکړي. د انرژي په پروژو کې د افغانستان ښکېلتیا هم کولای شي، زمونږ د هېواد د اقتصاد د پياوړتیا سبب او د کار موندنې لپاره مناسب بستر رامنځته کړي.

نوموړي ویلي افغانستان کولی شي په سیمه کې تجارتي او اقتصادي ادغام ته وده ورکړي؛ په اقتصادي او تجارتي وصل کېدو سره به چین زمونږ د هېواد د زیربنا پر ښه کولو، د سوداګرۍ د آسانتیا او بازار ته د لاسرسي پر زیاتولو د سیمه‌ییزې اقتصادي ودې په لاره اچولو کې مرسته وکړي. دا ادغام به د انرژۍ، کانونو او د ځمکني ټرانسپورټ په برخو کې داسې همکاري رامنځته کړي، چې افغانستان به د سیمه‌ییزې سوداګري لپاره د یوه مهم مرکز په توګه خپل ځای پيدا کړي.

دغه راز نوموړي په سیمه کې د سولې، ثبات او اقتصادي پرمختګ پر ژمنه د ټینګار تر څنګ ویلي: دا همکاري کولی شي سیاسي ثبات ته وده ورکړي او په سیمه کې د مهمو زیربناوو پانګونې لپاره امنیت تضمین کړي. د چين هېواد او نور سیمه‌ییز هېوادونه کولی شي د لنډ مهاله او منځ مهاله پروګرامونو په ترڅ کې زمونږ تخنیکي همکاران وروزي او د ظرفیت په لوړولو او نړۍوالو تجاربو په تر لاسه کولو کې همکاري وکړي.

د یادونې ده، چې بدخشان شمال ختیځ افغانستان له چین، تاجکستان او پاکستان سره نښلوي.