تازه خبرونه
اطاعت، اتفاق او یووالی د نظام د ټینګښت لامل کیږي ــ د اسلامي امارت رهبر
نوموړي دا څرګندونې د لوړو زده کړو وزارت له وزیر، مرستیالانو، مرکزي ریاستونو، دیني جامعاتو او دولتي پوهنتونونو له رییسانو سره په کتنه کې کړې دي.
د اسلامي امارت رهبر شیخ هبةالله آخوندزاده ویلي؛ اطاعت، اتفاق او یووالی د نظام د ټینګښت له مهمو لاملونو څخه دي او علماء باید په ټولنه کې د دغو ارزښتونو د پیاوړتیا لپاره هڅې وکړي.
نوموړي دا څرګندونې د لوړو زده کړو وزارت له وزیر، مرستیالانو، مرکزي ریاستونو، دیني جامعاتو او دولتي پوهنتونونو له رییسانو سره په کتنه کې کړې دي.
د اسلامي امارت رهبر زیاته کړې، علماء د ټولنې پر وړاندې ستر مسوولیت لري او باید خلک له دیني مسایلو او شرعي احکامو سره بلد کړي.
هغه زیاته کړې؛ که علماء پر سمه لار روان وي او حکومتي مسوولان هم خپلې دندې سمې ترسره کړي، خلک به یې اطاعت کوي.
شیخ هبةالله آخوندزاده د پوهنتونونو له مسوولانو غوښتي، چې د محصلانو زدهکړو او روزنې ته جدي پاملرنه وکړي او هغوی د علمي زده کړو ترڅنګ له دیني مسایلو سره هم بلد کړي.
هغه ویلي، محصلان به په راتلونکي کې د حکومت او ټولنې په بېلابېلو برخو لکه: طب، انجنیري او نورو برخو کې مسوولیتونه پر غاړه واخلي او د پوهنتونونو مسوولان باید د هغوی د روزنې لپاره ډېرې هڅې وکړي.