Connect with us

تازه خبرونه

افغانان د صحابه کرامو له غیرته برخمن دي – بریتانیایي عالمان

خپور شوی

د

(Last Updated On: وږی ۲۶, ۱۴۰۲)

د بریتانیایي عالمانو یوې ډلې، چې په دې وروستیو کې افغانستان ته سفر کړی و؛ ویلي، چې په دې هېواد کې رسنیو رښتیني واقعیتونه بشپړ تحریف کړي دي.

بریتانیايي عالمانو د لندن د کوئین مریم پوهنتون په یوه غونډه کې د افغانستان د اسلامي ټولنې د جوړېدو له بهیره، امنیت ښه کېدو او اقتصادي وضعیته ستاینه کړې ده.

شیخ هیثم الحداد، چې یو له دغو عالمانو څخه دی ویلي؛ د اسلامي امارت د چارواکو د مسلکيتوب کچه، چې هغه ورسره ولیدل په رښتیا حیرانوونکې ده.

هغه زیاته کړې: دوی (اسلامي امارت) په رښتیا هم غواړي د خپل هېواد او امت لپاره یو څه وکړي او خدای دې له دوی سره مرسته وکړي.

مفتي اسمعیل سطیه ویلي: مونږ افغانستان ته پر ډېر خلاص ذهن لاړو؛ زمونږ له هیچا سره ټکر رانغی. ما د افغانستان خلک ډېر مهربان، سخاوتمند، د ورین تندي لرونکي او انعطاف منونکي ولیدل؛ خو هغه څه، چې پر ما ډېر اغېز وکړ هغه دا دي، چې د صحابه کرامو کيسې مو، چې لوستې وې؛ ورسره مخ شوو. دوی ماته د هغو کسانو یادونه راژوندي کړل، چې د اسلام لپاره یې سرښندنې کړې وې او هر څه کولو ته چمتو ول. مونږ فکر نه کاوه، چې نن به داسې خلک وي؛ خو هلته له خلکو او عالمانو سره خبرو راته څرګنده کړه، چې دا خلک د همغو صحابه کرامو په شان غیرت لري.

شیخ حمید محمود ویلي: افغانستان ته له تللو مخکې مې په رسنیو کې هیڅ مثبته خبره نه وه لیدلې؛ خو د افغان حکومت له غړیو سره له خبرو وروسته پوه شوم، چې دوی نه یوازې له فزیکي تسلط او استعماره د خلاصون هڅه کیږي، بلکې د مالي، اقتصادي او فکري غلامۍ څخه د وتلو په هڅه کې هم دي.

شیخ عمار المدني ویلي: د افغانستان هغه انځور، چې مونږ یې لرو؛ له شته واقعیتونو سره بشپړ توپیر لري. هغه خوښي او اطمینان، چې خلک یې احساسوي؛ له هغه څه څخه، چې د رسنیو د چینلونو له لارې انځوریږي بشپړ توپیر لري. زما غوښتنه دا ده؛ هر هغه معلومات، چې تاسې غواړئ هغه باید د مناسبو چینلونو له لارې وي.

دې بریتانيایي پلاوي په جولای میاشت کې افغانستان ته سفر کړی و او د اسلامي امارت له لوړ پوړیو چارواکو سره یې وکتل.

شیخ هیثم الحداد د نجونو د تعلیم مسلې ته په نغوته کې ویلي، چې لویدیځ له دې مسلې څخه د افغانستان د بد ښودلو او ځلولو لپاره ګټه پورته کوي.

نوموړي زیاته کړې: په هره ټولنه کې، چې له جګړې راوتلې وي د اړتياوو خپل يو لړ لري؛ خو امنيت او اقتصاد يې په لومړيتوبونو کې دي.

هغه وایي: که مونږ په رښتيا هم د افغانستان په اړه اندېښمن يوو، نو لومړۍ پوښتنه بايد دا وي، چې امنيتي وضعيت څنګه و؟  ۲۰۲۲ ږ. کال په تېرو څلوېښت کلونو کې لومړی کال و، چې د افغانستان په ټوله سیمه کې جګړه نه وه، چې دا د ستاینې وړ ده. که خلک د ښځو په اړه اندېښمن وي؛ لومړی باید وپوښتي، چې آیا ښځې ځورول کیږي؟

دغه راز شیخ حمد محمود وویل، چې د نجونو زده‌کړې او تعلیم في نفسه منع شوی نه‌دی، بلکې لیبرال او سیکولر تعلیم ځنډول شوی دی.

هغه یادونه وکړه، چې د بهرنیو چارو وزارت چارسمبالي امیرخان متقي ورته ویلي، چې اسلامي امارت د نجونو زده‌کړه حرامه نه‌ګڼي او ټولې نجونې دمګړۍ لومړنۍ زده کړې کوي. دغه راز هغه وويل: که نجونې غواړي داکترې او ښوونکې شي او يا په دارالعلوم کې زده‌کړې وکړي؛ کولى شي د پوهنتون تر کچې خپلې زده‌کړې روانې وساتي.

د شیخ حمد د څرګندونو له مخې؛ ښاغلي متقي ویلي، چې پخوا شاګردانو او زده‌کړیالانو ته غربي سیکولر افکار پیچکاري کېدل، د شریعت خلاف خبرې کېدې او رذایلو وده کوله؛ نو عالمانو دا موضوع په مستقیمه توګه د اسلامي امارت مشر ته وړاندې کړه. ښاغلي متقي دا هم ویلي، چې مونږ شل کاله د جګړې په ډګر کې سره متحد وو او اوس، چې د هېواد د بیارغونې وخت رارسېدلی؛ اختلاف نه‌شوو زغملی او له همدې کبله لیبرال او سیکولر زده‌کړې لنډمهاله وځنډېدې.

تازه خبرونه

افغان میرمنو ته د زده‌کړو او کار امکانات برابر کړئ – رینا امیري

Published

on

(Last Updated On: تله ۸, ۱۴۰۲)

د افغانستان د ښځو او بشري حقونو لپاره د امریکا ځانګړې استازې رینا امیري ټینګار کړی، چې نړیواله ټولنه باید د اسلامي امارت د محدودیتونو د مخنیوي لپاره ښځو ته د زدهکړو، تحصیلي بورسونو او کار زمینه برابره کړي.

رینا امیري د شنبې پر ورځ په ایکس چینل کې له خپلو همکارانو او افغان فعالانو سره د تېرې میاشتې د لیدنو په اړه څرګنده کړې، چې ښايي په افغانستان کې د “ویجاړونکي” وضعیت د ښه کولو لپاره لارې چارې توپیر ولري؛ خو هغه کسان، چې د بشري حقونو د خوندیتوب په لټه کې دي باید مدني فضا رامنځته کړي. خبرې اترې او زغم، چې دوی یې هیله لري په افغانستان کې رامنځته او وځلوي.

هغې څرګنده کړې: مونږ باید په ټولیزه توګه طالبانو (اسلامي امارت) ته دا روښانه کړو، چې که څه هم مونږ د ویجاړونکي وضعیت د ښه کولو هڅه کوو؛ خو د روان حالت په ښه ‌کېدو کې به پرمختګ تر هغې رانه‌شي، چې هغوی د افغانانو حقونو ته درناوی ونه‌کړي.

نوموړې زیاته کړې: مونږ باید د افغانانو په ځانګړي توګه له ښځو څخه د ملاتړ په برخه کې خپل بیانونه د طالبانو (اسلامي امارت) له افراطي او ظالمانه کړنو سره د مقابلې لپاره د زده‌کړو، تحصیلي بورسونو، کار او نورو وسایلو د برابرولو لپاره، چې له زمونږ له غوښتنو سره مطابقت ولري؛ پخپلو سرچینو سمبال کړو.

رینا اميري ويلي، چې د ملګرو ملتونو په عمومي ناسته کې څو لوړپوړې ناستې ترسره شوې، چې يوه يې په افغانستان کې د ښځو د حقونو په اړه د وزيرانو پر کچه غونډه وه.

هغه وایي؛ پیغام مو روښانه دی: که طالبان (اسلامي امارت) د افغانانو حقونو ته درناوی ونه‌کړي او د ټولنې نیمايي وګړي حذف کړي؛ د نړیوالې ټولنې د یوې برخې کیدو تمه هم نه‌شي کولی.

دغه راز څرګندوي، چې د ملګرو ملتونو د عمومي ناستې په څنډه کې یې د مسلمانو هېوادونو له استازو سره په کتنه کې هوکړه کړې، چې د طالبانو (اسلامي امارت) ظالمانه تګلارې په ځانګړي توګه د ښځو او نجونو پر وړاندې؛ د افغانستان او نړۍ لپاره ویجاړوونکې او ښې نه‌دي.

هغې زیاته کړې: مونږ هوکړه وکړه، چې باید د افغانستان د ښځو او نجونو په اړه نړیوال پیوستون وساتو او د دیپلوماتیکو او کوټلو هڅو له لارې په افغانستان کې دننه او بهر له افغان میرمنو او نجونو ملاتړ روان وساتو.

دا په داسې حال کې ده، چې اسلامي امارت د شریعت په چوکاټ کې د ښځو د تعلیم او کار کولو د حقونو په ګډون د بشري حقونو درناوي ته خپله ژمنتیا تل ښکاره کړې ده.

 

Continue Reading

تازه خبرونه

په افغانستان کې د ټولګډونه حکومت په جوړولو کې پرمختګ نه‌دی شوی – اعلامیه

Published

on

(Last Updated On: تله ۸, ۱۴۰۲)

د روسیې په کازان ښار کې د مسکو غونډې ګډونوالو په یوه اعلامیه کې څرګنده کړې؛ په افغانستان کې یو داسې رښتینی ټولګډونه حکومت رامنځته شوی نه‌دی، چې د هېواد د ټولو توکمونو او سیاسي ډلو ګټې وځلوي.

په دې اعلاميه کې، چې د روسيې بهرنيو چارو وزارت خپره کړې راغلي: د کابل په اداره کې د بېلابېلو افغان توکمونو د انفرادي استازو له ټاکل کېدو سره – سره ګوندي سياسي کثرت نه‌ليدل کیږي.

دوی له اسلامي امارت څخه غوښتنه کړې، چې د سولې بهیر د بشپړېدو او له پراخو، هراړخیزو، ځواب‌ویونکیو او مسوولو بنسټونو سره د متوازن حکومت د رامنځته کولو لپاره د سیاسي او قومي ډلو له استازو سره عملي او پایله لرونکې خبرې اترې وکړي.

د دې غونډې ګډونوالو په افغانستان کې د کار، زده‌کړې او عدالت د مساوي حقونو په ګډون د جنسیت، توکم او مذهب له تبعیض پرته د بنسټیزو حقونو او آزادیو د درناوي په اړه خبرې وشوې او د ښځو د کار او د نجونو د زده‌کړې پر محدودیتونو یې د اندېښنې ترڅنګ ټینګار هم څرګند کړ.

دوی له اسلامي امارته وغوښتل، چې په ښوونځیو کې د نړیوالو معیارونو سره سم عصري زده‌کړې اجازه ور کړي.

د دې غونډې ګډونوالو د داعش په ګډون د ترهګرو ډلو د فعالیتونو د زیاتوالي له کبله په افغانستان کې د سخت امنیتي وضعیت په اړه هم اندېښنه څرګنده کړه.

دوی د داعش پر وړاندې د جدي مبارزې له کبله د اوسني افغان چارواکو ستاینه وکړه او له هغوی یې وغوښتل، چې د نورو ترهګرو ډلو پر وړاندې هم همداسې وکړي.

دوی د افغانستان له اوسنیو چارواکو وغوښتل، چې په افغانستان کې د هر ډول ترهګرو ډلو د ځالې د له منځه وړلو او مخنیوي لپاره هڅې وکړي او د سیمې هېوادونو ته یې د خپرېدو مخه ونیسي.

د غونډې برخه‌والو دغه راز په افغانستان کې د کوکنارو د کښت د کمښت په اړه د اوسنيو افغان مقاماتو د برياليو هڅو ستاینه کړې او د هغو راپورونو په اړه، چې د صنعتي نشه‌يي توکو د توليد په ګډون د نشه‌يي توکو زیاتوالی ښیي؛ پر مبارزه ټینګار څرګند کړی دی.

د اعلامیې پر بنسټ، د غونډې اکثرو ګډونوالو ویلي؛ له سیمې بهر له هېوادونو سره همکاري هغه مهال ممکنه ده، چې د امریکا په مشرۍ لویدیځ ائتلاف د افغانستان د شل کلنې جګړې د ویجاړیو د بیارغونې مسوولیت پر غاړه واخلي او د افغانستان ملي شتمنۍ آزادې او خپل یو اړخیز بندیزونه لرې کړي.

دوی همداراز د ګډو ګټو پر موضوعاتو د بحث لپاره د سیمه ییزو اړیکو ډلې د جوړولو له لارې د افغانستان په اړه د سیمه ییزو همکاریو د پیاوړتیا لپاره د ایران وړاندیز ته هم نغوته وکړه.

د افغانستان په اړه د مسکو مشورتي ناسته د جمعې پر ورځ د چین، هند، ایران، قزاقستان، قرغزستان، پاکستان، روسیې، ترکمنستان او ازبکستان د ځانګړيو استازو او لوړ پوړیو چارواکو پر کچه جوړه شوه. په دې کتنه کې د افغانستان د بهرنیو چارو وزارت چارسمبالي هم حضور درلود. په دې مراسمو کې د سعودي عربستان، قطر، عربي متحده اماراتو او ترکیې استازو د معززو میلمنو په توګه حضور درلود.

Continue Reading

تازه خبرونه

سراج الدین حقاني له یو شمېر افغان سياسي کارپوهانو او فعالانو سره وکتل

Published

on

(Last Updated On: تله ۶, ۱۴۰۲)

د افغانستان د کورنیو چارو وزارت څرګنده کړې، چې د دې وزارت چارسمبالي سراج الدین حقاني د هېواد له ځینو سیاسي اشخاصو او لیکوالو سره په لیدنه کې د ځينو ستونزو د حل او پرمختګونو په اړه په جوړه شوې غونډه کې ګډون وکړ.

په دې لیدنه کې د سیاسي چارو کارپوه حميدالله هوتک د هېواد بېلابېلو سیمو ته د سراج الدین حقاني په ګډون، د مشرانو سفرونه د ملي او سیاسي همغږۍ د روحیې د پياوړتیا لپاره ګټور وبلل او د ولسي حقونو تضمین یې د حکومت مسوولیت یاد کړ.

د غونډې د ګډونوالو د څرګندونو له مخې؛ د کورنیو چارو وزارت سفرونه د ولس د اقشارو تر منځ د وحدت سبب ګرځېدلي دي.

دغه راز دوی ويلي: له افغان شخصیتونو سره د اړیکو کمیسیون باید د کادرونو د رابللو چارې لا ګړندۍ کړي او د پردیو هېوادونو له کمپونو یې را وباسي.

همدارنګه معین ګل څمکني څرګنده کړې: د پردیو توطیو دا هېواد شاوخوا ۴۵ کاله په شخړو کې ښکېل کړی و، چې باید له دې وروسته افغانان د نورو پر لمسون د ناخوالو د رامنځته کولو کوښښ ونه‌کړي.

د کورنیو چارو وزارت چارسمبالي سراج الدین حقاني د ګډونوالو د نظرونو له اورېدو او ستاینې وروسته ويلي: د متقابل زغم له لارې ستونزې ختمېدی او د بدبينۍ او نفاق روحیه له منځه تلی شي.

د نوموړي د څرګندونو له مخې؛ ملي او اسلامي روحیه د ملت د استحکام بنسټونه دي او تر ټولو ډېره توجه د مثبت ذهنیت جوړښت ته لازمه ده.

هغه وایي: د عصري او ديني علم په نامه د علم تر منځ فاصله ایجادول زمونږ د اکثرو ستونزو لامل ګرځېدلی دی.

دغه راز یې زیاته کړې، چې د فکري اختلاف ستونزه به هم پر مشوره او وحدت حل شي؛ خو مهمه دا ده، چې موجود فرصتونه ضایع نه‌شي.

سراج الدین حقاني د عامه نظم د ټينګښت په اړه ډاډ څرګند کړ او وایي، چې له جوازه پرته څوک وسله ګرزولی نه‌شي او د پوليسو د تشکیلاتو له بشپړاوي وروسته به یې جوازونه او يونیفورم هم بشپړ شي.

Continue Reading

Trending

Copyright © 2022 Ariana News. All rights reserved!