Connect with us

تازه خبرونه

افغانستان او امریکا د کنګل شوې پانګې د آزادېدو لپاره غونډه کړې

خپور شوی

د

د افغانستان او امریکا استازیو په تاشکند کې د افغانستان د کنګل شوې شتمنۍ، اقتصادي ثبات، بشري مرستو او یو شمېر نورو اقتصادي موضوعاتو په اړه غونډه کړې.

په افغانستان کې د اسلامي امارت له واکمن کېدو سره سم د افغانستان بانک څه باندي نهه میلیارد دالر پانګه د امریکا لخوا د کنګل کېدو ترڅنګ د هېواد بانکي او اقتصادي  نظام  په وړاندي د سیمي او نړۍ په مارکیټونو کې ګڼې  ننګونې رامنځته شوې دي.

که څه هم  د اسلامي امارت مسوولینو تل د دې ستونزو د هواري خبرې کړي، خو اوس هم دا ستونزه پخپل ځای ده .

د افغانستان د بهرنیو چارو وزارت څرګنده کړې؛ د تاشکند د ناستې په څنډه کې د دې وزارت د چارسمبالي امیرخان متقي پر مشرۍ یوه پلاوي له امریکايي پلاوي سره د افغانستان د بهرنیو اسعارو د زیرمو، اقتصادي ثبات او د بشري مرستو په اړه بحث او خبرې کړې دي.

د بهرنیو چارو وزارت د ویاند مرستیال حافظ ضیا احمد تویت کړی، چې په دې غونډه کې د مالیې وزارت چارسمبالي، د دغه وزارت مرستیال، د افغانستان بانک مرستیال او د افغانستان بانک تخنیکي ډلې ګډون کړی و.

د افغانستان بانک تخنیکي ډلې د امریکا د خزانې وزارت د مرستیال پر مشرۍ له تخنیکي ډلې سره هم ځانګړې بحثونه او خبرې کړې دي.

د خصوصي  سکتور غړيو ويلي، که د افغانستان بانک کنګل شوې پانګه آزاده شي د هېواد په اقتصادي وضیعت به خورا مثبته اغېزه ولري.  

د صنایعو او کانونو خونې غړی عبدالجبار ساپی وایي: د پیسو له آزدېدو سره د افغانستان اوسنی بانکي بحران حل او د هېواد سوداګریز نظام پخپلو پښو دریږي. هیله لرو، چې د افغانستان اسلامي امارت او امریکا د دې ستونزې په اوارۍ کې سره هوکړې ته ورسیږي.

اقتصادي کار پوهان د افغانستان بانک د کنګل شوې پانګې د آزادېدو لپاره د تاشکنډ غونډه تر ټولو مناسب فرصت و او زیاتوي، چې اسلامي امارت د خپل هېواد مالي او اقتصادي ستونزو د اوارۍ لپاره باید د امریکا سره خبرې وکړي، چې د افغانستان میلياردونه دالر پانګه بېرته د هېواد اقتصادي بهیر ته دننه شي.

دوی زیاتوي، چې د دې پانګې له آزادېدو سره د افغانستان بانکي اعتماد په نړیواله کچه بېرته ښه کیدای شي.

اقتصادي شنونکي عبدالقادر جېلاني ویلي: د افغانستان اسلامي امارت ته د هېواد د کنګل شويو نهه نیم  میلیارد دالرو پانګې د آزادېدو لپاره تر ټولو مناسب وخت همدا اوس دی؛ له  دې سره د هېواد بانکي اعتبار هم لوړیدا شي او نړی باید د افغانانو د دې پانکې د آزادولو په برخه کې همکاري وکړي.

د اسلامي امارت مشرتابه په ځلونو له امریکا څخه د افغانستان د کنګل شوې پانګې بېرته آزادول غوښتي، چې هېواد له اقتصادي بحران څخه وژغورل شي.

د کار پوهانو په باور د افغانستان د پانګې له آزدېدو سره د افغانستان اقتصادي نړیوال تعاملات عادي حالت ته راتللی شي.

تازه خبرونه

امیر خان متقي د چین له ځانګړي استازي سره پر سیمه‌ییز وضعیت خبرې وکړې

د افغانستان بهرنیو چارو وزارت د خپرې شوې خبرپاڼې له مخې؛ په دې خبرو کې امیرخان متقي د افغانستان او چین اړیکې مثبتې وبللې او هیله یې څرګنده کړه، چې دواړه هېوادونه به په بېلابېلو برخو کې خپلې اړیکې نورې هم پراخې او عملي کړي.

Published

on

د افغانستان اسلامي امارت بهرنیو چارو وزارت ویلي، چې امیرخان متقي د چین له ځانګړي استازي یوی شیایونګ سره د دواړو هېوادونو ترمنځ د دوه اړخیزو اړیکو پر پراختیا، د سیمې پر وروستیو تحولاتو او د پاکستان له لوري د افغانستان پر ملي حاکمیت د پوځي تېري پر وروستي وضعیت خبرې کړې دي.

د افغانستان بهرنیو چارو وزارت د خپرې شوې خبرپاڼې له مخې؛ په دې خبرو کې امیرخان متقي د افغانستان او چین اړیکې مثبتې وبللې او هیله یې څرګنده کړه، چې دواړه هېوادونه به په بېلابېلو برخو کې خپلې اړیکې نورې هم پراخې او عملي کړي.

نوموړي همداراز ورسره د پاکستان له لوري د افغانستان پر ملي حاکمیت او ځمکني بشپړتیا د وروستیو بریدونو په اړه نه یوازې د افغانستان اسلامي امارت دریځ شریک کړ، بلکې ټینګار یې کړی، چې افغانستان د شخړو پر ځای د ستونزو سوله‌ییز حل ته لومړیتوب ورکوي او غواړي، چې د کړکېچ سطحه لوړه نشي؛ خو د هېواد او خلکو دفاع هم خپل حق بولي.

په خبرپاڼه کې راغلي؛ د چین ځانګړي استازي د پاکستان د وروستیو بریدونو له کبله د شهید شویو افغانانو له کورنیو سره د حکومت د خواشینۍ اوخواخوږۍ د څرګندولو تر څنګ ویلي، چې د افغانستان او پاکستان ترمنځ روانې ستونزې باید د خبرو او ډیپلوماسۍ له لارې حل شي، چې ورسره د سیمې د ثبات لپاره د کړکېچ کچه لوړه نشي.

هغه ټینګار کړی؛ چین په دې اړه له پاکستاني لوري سره هم په تماس کې دی او کوښښ کوي، چي د دواړو ګاونډ هېوادونو تر منځ تاوتریخوالی راکم او رغنده اړیکې رامنځته شي.

Continue Reading

تازه خبرونه

سږ کال د ښځو د حقونو ۳۴۰۰ شکایتونه وارزول شول – امر بالمعروف

یاد وزارت نن(یکشنبه د کب اووه‌لسمه) ویلي، چې له تېرو لس میاشتو راپدېخوا د ښځو د حقونو په اړوند څانګو کې ۳۵۱۱ شکایتونه ثبت شوي دي.

Published

on

د امربالمعروف، نهی عن المنکر او شکایتونو اوریدلو وزارت څرګنده کړې، چې په افغانستان کې د ښځو د شرعي حقونو د ډاډمنولو لپاره یې د ښځو د ستونزو اړوند زرګونه شکایتونه ارزولي او څارلي دي.

یاد وزارت نن(یکشنبه د کب اووه‌لسمه) ویلي، چې له تېرو لس میاشتو راپدېخوا د ښځو د حقونو په اړوند څانګو کې ۳۵۱۱ شکایتونه ثبت شوي دي.

 د دې وزارت د خبرپاڼې له مخې؛ له دې شکایتونو څخه ۳۴۸۱ قضیې ارزول شوې دي او یوازې په تېره اوونۍ کې د کورني تاوتریخوالي ۷۳ قضیې او د جبري واده د ۹ قضیو مخنیوی او د ۱۵ ښځو د میراث حق خوندي شوی دی.

په خبرپاڼه کې دا ټینګار هم شوی، چې د اسلامي امارت د مشر د فرمان له مخې؛ د ښځو د شرعي حقونو د ډاډمنولو او د هغوی پر وړاندې د ظلم او بې عدالتۍ د مخنیوي لپاره هڅې روانې دي.

دې وزارت له هېوادوالو غوښتي؛ که د ښځو د حقونو له سرغړونو یا کورنیو ستونزو سره مخ شوئ؛ نو خپل شکایتونه اړوند چارواکو ته وړاندې کړئ، چې ورته رسېدنه وشي.

Continue Reading

تازه خبرونه

ترکیې په افغانستان کې د سولې او ثبات پر اړتیا ټینګار څرګند کړ

فیدان ویلي: “مونږ د افغانستان د وضعیت ارزونې وخت هم درلود. زمونږ بنسټیزه تمه دا ده، چې افغانستان او ګاونډیان یې سره په سوله کې وي.”

Published

on

د ترکیې بهرنیو چارو وزیر هاکان فیدان د شنبې پر ورځ د ترکي ژبو هېوادونو ټولنې بهرنیو چارو وزیرانو شورا له نارسمي غونډې وروسته په افغانستان کې د سولې او ثبات پر اړتیا ټینګار وکړ.

فیدان ویلي: “مونږ د افغانستان د وضعیت ارزونې وخت هم درلود. زمونږ بنسټیزه تمه دا ده، چې افغانستان او ګاونډیان یې سره په سوله کې وي.”

هغه یادونه کړې؛ د ترکي ژبو هېوادونو ټولنې څو غړي هېوادونه له افغانستان سره ګډه پوله لري او په دې هېوادونو کې ثبات د دوی لپاره اړین دی.

فیدان زیاته کړې، چې د ترکي ژبو هېوادونو ټولنې بهرنیو چارو وزیرانو شورا د افغانستان او پاکستان ترمنځ د مخ پر زیاتېدونکي تاوتریخوالي په اړه هم بحث کړی دی.

Continue Reading
Advertisement

Trending

Copyright © 2025 Ariana News. All rights reserved!