د هلمند ولایت په مرکز لښکرګاه ښار کې د لومړي ځل لپاره یوه هلمندي پانګوال د ۵۲ ډولونه وحشي ژوو او مرغانو د روزلو او پاللو لپاره د شپږ سوه زره امریکایي ډالرو پر لګښت یو ژوبڼ جوړ کړ.

د ژوبڼ مسوول عبدالسلام وایې؛ موخه مو د سیلانیانو لپاره د تفریحي ځای برابرول او د وحشي ژوو د نسل روزنه ده، چې اوسمهال په دې ولایت کې د ورکیدلو په حال کې دي.

د هلمند سیمه‌ییزو چارواکي ويلي؛ هڅه کوي، چې په دې ولایت کې د نادره مرغیو د ورکېدو مخه ونیسي. د هلمند اوسېدونکي وايي، چې حکومت باید ځنګلي ژوند ته ځانګړې پاملرنه وکړي.

مسوولانو ویلې، چې موخه یې له دې کار څخه هلمندیانوته د سیل ځای برابرول او د حیواناتو نسلي روزنه ده.

د هلمند د چاپېریال ساتنې رییس محمد عیسی اغا د دې ډول وحشي ژویو ساتنه د طبیعت لپاره خورا اړینه ګڼي او وایي؛ په تېرو ۴۰ کلونو کې طبیعي ځنګلونه له منځه تللي، وحشي مرغان او ژوي ورک او مهاجر شوي وه، چې اوسمهال یې د بېرته راګرځیدو هڅې کیږي.

د هلمند ولایت اوسیدونکي په داسې حال کې، چې له دې کارهرکلی کوي؛ له خلکو د دې ولایت د ځنګلي ژوند ته د پاملرنې غوښتنه کوي.

د هلمند د چاپېریال ساتنې ریاست د معلوماتو له مخې؛ د اسلامي امارت له بیا واک ته رسیدو وروسته په دې ولایت کې د طبیعي ځنګلونو د ونو پرې کول، د وحشي مرغانو، کبانو او څارویو ښکار په بشپړ ډول بند شوی او لسګونه هغه وحشي حیوانات یې چاپېریال ته خوشې کړي، چې د خلکو لخوا نیول شوي وه.

د اوبو او انرژي وزارت چارسمبالي( سرپرست) عبداللطیف منصور په کابل کې د دغه وزارت د یو شمېر ریيسانو په شتون کې  د ترکمنستان له سفیر خواجه عوضوف سره وکتل .

د اوبو او انرژي وزارت چارسمبالي د دواړو هېوادونو ترمنځ د ښو اړیکو مخینې ته په نغوته(اشاره ) کې د دواړو لورو ترمنځ دوه اړخیزې همکارۍ وستایلې او د ټاپ پروژې د عملي چارو پر چټکتیا یې ټینګار وکړ .

دغه راز د ترکمنستان سفیر د ټاپ پروژې چارو او نورو همغږیو ته په نغوته کې د دغې پروژې د لارې د نقشې د شریکولو غوښتنه هم وکړه.

د اوبو او انرژي وزارت چارسمبالي د ترکمنستان هېواد سفیر ته ډاډ ورکړ، چې د دغې پروژې د لارې نقشه د دې وزارت له لوري وروستۍ شوې او ډېر ژر به له ترکمنستان هېواد سره شریکه شي.

ویل کیږي، چې د دې لیدنې په پای کې د دغې پروژې د چارو د چټکتیا لپاره د دواړو لورو د تخنیکي ډلو ترمنځ پر لیکه( انلاین) د غونډو پر ترسره کولو ټینګار وشو.

د پاکستان تحریک انصاف د مشر عمران خان خور عليمه خان له خپل ورور سره له لیدنې وروسته خبریالانو ته ویلي؛ عمران خان له افغانستان سره د مخ پر زیاتېدونکي تاوتریخوالي په اړه اندېښنه څرګنده کړې او ټینګار کوي، چې افغانستان د پاکستان دښمن ندی او له دې هېواد سره باید له تاوتریخوالي ډډه وشي.

د پاکستان رسنیو څرګنده کړې؛ د سې‌شنبې پر ورځ( د کب اتویشتمه) د پاکستان تحریک انصاف ګوند د مشر عمران خان خور عليمه خان په زندان کې د خپل ورور د وضعیت په اړه له خبریالانو سره خبرې وکړې.

هغې د عمران خان د څرګندونو له مخې ویلي: “تر ۲۰۲۱ کال پورې ترهګري د پام وړ کمه شوې وه؛ خو له ۲۰۲۲ کال راپدېخوا بیا زیاته شوې ده. افغانستان زمونږ دښمن ندی او باید خپل دښمن ترې جوړ نکړو.”

عليمه خان زياته کړې؛ ورور يې ټينګار کړی، چې له یو مسلمان هېواد او ګاونډ سره بايد بې دلیله کړکېچ رامنځته نشي.

هغې دا هم ویلي، چې عمران خان په زندان کې ورځپاڼو یا ټلویزیون ته لاسرسی نلري او له روانو پېښو څخه بې خبره دی.

له دې مخکې هم عليمه خان په زندان کې له خپل ورور سره له لیدنې وروسته د افغانستان او اسلامي امارت په اړه د خپل ورور دریځ خپور کړی و. د هغه د خور د پخوانیو څرګندونو له مخې؛ عمران خان په افغانستان کې د پاکستان پر هوايي برید غبرګون ښودلی و او له دې کړنې یې خپله نارضایتي څرګنده کړې وه.