Connect with us

لوبی

افغانستان او عربي متحده اماراتو د همکارۍ ګډ هوکړه لیک لاسلیک کړ

Published

 on

(Last Updated On: ليندۍ ۶, ۱۴۰۱)

د افغانستان کرکټ بورد ويلي، چې د افغانستان او عربي متحده اماراتو کرکت بورد ترمنځ د هر اړخیزو همکاریو پېنځه کلن هوکړه لیک لاسلیک شو، چې  له مخې به یې د دواړو لوبډلو تر منځ هر کال درې شل آوریزې لوبې کیږي.

د افغانستان کرکت بورد د معلوماتو له مخې؛ د افغانستان کرکت بورد د دغو سیالیو په بدل کې هیڅ لګښت نلري.

دا په عربي متحده اماراتو کې د خپلو سیالیو کوربتوب کوي او د هوکړې له مخې د یاد هېواد لپاره د ویزې ترلاسه کول آسانه دي، چې د پیسو د سپما په برخه کې لویه لاسته راوړنه ده.

د دې ترڅنګ عربي متحده اماراتو د افغانستان کرکت بورد ته د دغه هېواد په سپورتي کمپلیکس کې یو دفتر ورکړی او د بازارموندنې او مالي ملاتړ په برخه کې به لازمې مرستې او همکارۍ هم وکړي.

همدارنګه د افغانستان کرکت بورد وايي، چې د دې هوکړې پر بنسټ به د عزبي متحده اماراتو کرکت بورد د افغانستان په کوربتوب د لوبو پر مهال د دغه هېواد د ملي لوبډلې د مسوولینو او لوبغاړیو لپاره د ویزو په اخیستلو کې د افغانستان کرکت بورد ته آسانتیاوې برابرې کړي.

د افغانستان کرکت بورد اجرائیوي رییس نصیب خان وايي؛ دا له سترو لاسته راوړنو ډک هوکړه لیک دی، چې پر اساس به یې دواړه لوبډلې په ښه توګه ترې ګټه پورته کوي او دا د دوه اړخیزو همکاریو یو ستر پل دی.

نصیب خان زیاته کړې: دا تړون د ۵ کلونو لپاره لاسلیک شوی او مونږ به هر کال د عربي متحده اماراتو د کرکت له ملي لوبډلې سره درې شل آوریزې سیالۍ ترسره کوو، چې د دغو سیالیو په بدل کې به له مونږ څخه د اجازې غوښتنه نکیږي. په هغو لوبو کې، چې مونږ به یې په دې هېواد کې کوربتوب وکړو؛ د ویزې اخیستل به آسانه وي. د افغانستان کرکت بورد لپاره به د دغه هېواد په سپورتي کمپلیکس کې یو دفتر ځانګړی او د دغه هېواد د بازارموندنې له څانګې سره به لازمه همکاري وشي.

نصیب خان زیاته کړې: له دې مخکې مونږ د نورو لوبډلو د کوربتوب لپاره دومره مشخص ځای نه درلود. اوس، چې مونږ د عربي متحده اماراتو له کرکت بورد سره د همکارۍ دغه تړون لاسلیک کړی، مونږ ډاډه یوو، چې په دغه هېواد کې د نورو لوبډلو کوربتوب کولی شو.

د دې ترڅنګ د عربي متحده اماراتو کرکت بورد چارواکي وايي، چې دغه هوکړه لیک د دوه اړخیزو همکاریو لپاره ښه زیری ورکوي او د سیالیو په تنظیم او ګڼو نورو برخو کې به آسانتیاوې رامنځته کړي.

د افغانستان کرکټ بورد د معلوماتو له مخې؛ دغه هوکړه به د کوربه هېواد د یو خوندي او د لاسرسي وړ ځای په رامنځته کولو او لګښتونو کې د ژغورنې په برخه کې د هېواد له کرکت بورد سره ډېره مرسته وکړي.

لوبی

د پاکستان کرکت ملي لوبډله به په راتلونکې میاشت کې له افغانستان سره درې لوبې وکړي

Published

on

(Last Updated On: سلواغه ۱۷, ۱۴۰۱)

د پاکستان کرکت بورد مشر څرګنده کړی، چې د افغانستان ملي لوبډله به د مارچ میاشتې په وروستیو کې له افغانستان سره درې شل آووریزې لوبې وکړي.

د پاکستان کرکت بورد مشر نجم سیتي اعلان کړی، چې له افغانستان کرکت ملي لوبډلې سره به د آسترالیا د لوبې د لغو کېدو د جبران لپاره له افغانستان سره درې شل آووریزې لوبې وکړي.

هغه د یکشنبې پر ماښام (د سلواغې ۱۶) تویت کړی، چې د پاکستان کرکت ملي لوبډله به د مارچ میاشتې په وروستیو کې له افغانستان سره درې شل آووریزې لوبې وکړي.

د پاکستان کرکت بورد مشر زیاته کړې: مونږ پر ورین تندي اعلان کوو، چې مونږ به د آسترالیا د لوبې لغو کولو د جبران لپاره د افغانستان کرکت ملي لوبډلې سره لوبه وکړو.

له دې مخکې د پاکستان کرکت بورد مشر ویلي، چې له افغانستان کرکت ملي لوبډلې سره به درې شل آووریزې لوبې وکړي؛ خو پدې شرط، چې د پاکستان حکومت یې تصویب کړي.

هغه ویلي وه: په حقیقت کې مونږ دغو سیالیو ډېر لیواله نه یو. که یې وګټو او یا هم ماتې وخورو، دا به کوم اغېز ونلري؛ ځکه، چې مونږ دواړه ( افغانستان او پاکستان ) نړیوال جام ته لار موندلې ده.

دا په داسې حال کې ده، چې څه موده وړاندې آسترالیا په افغانستان کې د ښځو د زده‌کړو، کار، مدني او ټولنیزو آزادیو په برخه کې د اسلامي امارت د بندیزونو په غبرګون او اعتراض کې له افغانستان سره درې پنځوس آووریز سوپر لیګ سیالۍ لغو کړې.

Continue Reading

لوبی

د ۲۰ آووریز کرکت نړیوال لیګ ډالۍ اعلان شوې

Published

on

(Last Updated On: سلواغه ۱۸, ۱۴۰۱)

د یکشنبې پر ورځ شل آووریز کرکت نړیوال لیګ د دې سیالیو د لومړي پړاو ډالۍ اعلان کړې، چې ټولټال ارزښت یې یو میلیون و درې سوه زره امریکایي دالره دی.

د دې اعلامیې له مخې؛ د دې تورنمنت یا سیالیو اتلې لوبډلې ته به ۷۰۰ زره دالر او دوه‌یمې لوبډلې ته به ۳۰۰ زره دالر ډالۍ ورکړ شي.

د کرکت شل آووریز نړیوال لیګ د لومړي پړاو سیالي دا مهال په دوبۍ، ابوظبي او شارجه کې ترسره کیږي.

د اماراتو کرکت بورد عمومي منشي مبشر عثماني د دغو ډالیو په اړه ویلي: دغه لیګ پر ورین تندي د اتلې او نایب اتلې لوبډلو ته نغدي جایزې اعلانوي.

هغه زیاته کړې: مونږ له لوبډلو او لوبغاړیو غوښتنه کوو، چې د دې جایزو ګټلو لپاره د زړه له کومي کار او هڅې وکړي. د کرکت شل آووریز نړیوال لیګ لومړی پړاو به د فبرورۍ پر دولسمه نېټه پای ته ورسېږي او دوه لوبډلې به د اتلولۍ جام او نغدي ډالیو د ترلاسه کولو لپاره وروستۍ لوبې ته لار پیدا کړي. زه هیله لرم، چې غوره لوبډله به یې وګټي.

دغه لیګ په تېرو درې اوونیو کې د زړه راکښونکیو نندارو شاهد دی او سیالۍ حذفي پړاو ته د ننوتو په حال کې دي.

د دیزرت وایپرز، ګلف جایانتزاو ام آی اماراتو لوبډلو په راتلونکي پړاو کې خپل ځای تائید کړی. په داسې حال کې، چې د دې پړاو د ځای لپاره شارجه واریرز او دوبۍ کیپیتلز سیالي اوس هم روانه ده.

د دیزرت وایپرز لوبډلې له لس لوبو څخه اووه یې ګټلي دي.

د ګلف جایانتز او ام آی اماراتو له نهه سیالیو په ترتیب سره شپږ او پېنځه لوبې ګټلي دي.

وایپرز او جایانتز د نمرو د جدول په سر کې دي.

له دیزرت وایپرز لوبډلې څخه الیکس هیلز په دې تورنمنت کې تر ټولو ډېرې ۴۶۵ منډې جوړې کړي او دا مهال د زرغون کمربند اتل دی. په همدې حال کې د ګلف جایانتز لوبډلې څخه کریس جاردن ۱۴ ویکتې اخیستي او د سپین کمربند لرونکی دی.

الیکس هیلز تر دې دمه د ۱۸۴ نمرو تر ټولو ارزښتمن لوبغاړی دی او د سور کمربند لپاره سیالۍ رهبري کوي.

له ام آی اماراتو لوبډلې څخه محمد وسیم اوسمهال د ۱۴۸ نمرو له لرلو سره د عربي متحده اماراتو تر ټولو ارزښتمن لوبغاړی دی.

د دې کمربندونو ګټونکي به هر یو د پړاو په پای کې د ۱۵ زره دالرو ډالۍ ترلاسه کړي.

د ارزښتناکو لوبغاړيو لپاره ډالۍ د لیګ لخوا د ځانګړي سیستم رامنځته او لوبغاړیو ته په هره لوبه کې د دوی د هڅو پر بنسټ د ځانګړیو نمرې له مخې ورکول کیږي.

د کرکت شل آووریز نړیوال لیګ په هره لوبه کې پېنځه ډالې ورکړ شوي.

دا ډالۍ د غوره لوبغاړي، غوره توپ اچوونکي، تر ټولو اوږده شپږیزې، غوره څلوریزې او د سیالۍ د غوره لوبغاړي په کټګوریو کې وې، چې د دغو ډالیو هر ګټونکي ۱۵۰۰ دالر ترلاسه کړي دي.

د دغه لیګ له پای لوبې وروسته به د تکړه توپ اچوونکي، تر ټولو اوږدې شپږیزې، غوره څلوریزې او غوره لیوالتیا رامنځته کوونکي په کټګوریو کې هم ډالۍ ورکول کیږي. د دې جایزو ګټونکي به هر یو ۱۵ زره دالر ترلاسه کړي.

د دې سیالیو بل پړاو به د فبرورۍ له اتمې نېټې څخه تر لسمې نېټې پورې ترسره شي. وروستۍ لوبه به د فبرورۍ پر ۱۲ نېټه د دوبۍ په نړیوال لوبغالي کې ترسره شي.

Continue Reading

لوبی

ګلف جایانتز لوبډلې د کرکت نړیوال شل آووریز لیګ بل پړاو ته لار ومندله

Published

on

(Last Updated On: سلواغه ۱۷, ۱۴۰۱)

د کرکت نړیوال شل آووریز لیګ په ۲۷ لوبه کې ګاف جایانتز لوبډلې د شنبې پر ورځ د دیزرت وایپرز لوبډلې ته د ۲۵ منډو پر توپیر ماتې ورکړه او د اړوند سیالیو بل پړاو ته یې لار وموندله.

په دې لوبه کې د ګلف جایانتز لوبغاړي شیمرون هتمایر پر ۳۵ توپونو ۵۴ بریالۍ منډې جوړې کړې، چې په کې له څلور شپږیزو او دوه څلوریزو برخمن شول.

لوبډلمشر جیمز وینس ۳۹ منډې وکړې او د ګلف جایانتز لوبډلې د ۶ لوبغاړیو له سوځېدو سره ۱۸۰ منډې وکړې.

دیزرت وایپرز لوبډلې د ۶ لوبغاړیو پر سوځیدو ۱۵۵ منډې جوړې کړې. تام کوران ډېره هڅه وکړه، چې خپله لوبډله د ۴۲ منډو له جوړولو سره بریا ته ورسوي؛ خو هدف ته ونه رسېده.

دیزرت وایپرز د دغې لوبې پچه ګټلې او توپوهنه یې غوره کړې وه.

د ګلف جایانتز دیوید ویز د خپلې لوبډلې د بریا په اړه ویلي: دا زمونږ لپاره یوه مهمه لوبه وه؛ ځکه، چې مونږ غوښتل په دوه لوبو کې خپل ځای ترلاسه کړ او هر بالر مو د اړتیا په وخت کې ودرېد. آیا افضل خان نن ښه توپ اچونه وکړه. توپ اچوونکي له یو او بل سره ښه مرسته کوي او ټول لوبغاړي خپل مسوولیتونه ترسره کوي.

د دیزرت وایپرز تام کوران له لوبې وروسته وویل: ما فکر کاوه، چې مونږ کولی شو په یوه ټکي کې ځان موخې ته ورسووو. که ما له یوه غوره توپ وهونکي سره لوبه کړې وای، ښايي پایله به یې بل ډول وه. ما هم فکر کاوه، چې لوبډلې مې ښې ډېرې منډې کړي. مونږ لهه توپ سره ځینې تېروتنې وکړې.

د کرکت نړیوال شل آووریز لیګ بل پړاو به د فبرورۍ پر اتمه پیل شي.

د بشپړو څرګندونو لپاره لاندې تړاو کېکاږئ:

CLICK HERE

Continue Reading

Trending

Copyright © 2022 Ariana News. All rights reserved!