د افغانستان د صنایعو او سوداګرۍ وزارت په کابل کې د ۲۵ میلیون دالرو پر پانګونه د سیرومو تولیدي کارخونه پرانیستله.

د  تي‌جي‌ال درمل جوړولو کارخونه، چې د چرخي‌پله په صنعتي پارک کې جوړه شوې؛ په هرو ۲۴ ساعتونو کې د ۱۱۰ زره بېلابېلو طبي سیرومو د تولید وړتیا لري. دغې کارخونې څه دپاسه ۱۰۰۰ کسانو ته هم د کار زمینه برابره کړې ده.

د صنعت او سوداګرۍ وزارت مرستیال د دغې کارخونې د پرانیستې په مراسمو کې ویلي: خصوصي سکتور د هېواد په ابادۍ کې ډېر مهم رول لوبولی او ځوانانو ته کاري زمینه برابروي.

هغه له خلکو وغوښتل، چې د هېواد د صنعت د ودې لپاره د هېواد له تولیداتو ګټه واخلي.

په دې مراسمو کې صنعتکارانو هم له سوداګرۍ وزارت څخه وغوښتل، چې صنعتکارانو ته د ځمکو د وېش، په صنعتي پارکونو کې د برښنا د پرچاوۍ د له منځه وړلو او د هغو توکو د تعرفې د لوړولو په برخه کې پوره پاملرنه وکړي، چې افغانستان پر ځان‌بسیاینې ته راکاږي.

چارواکو د یکشنبې پر ورځ څرګنده کړې، چې په کندوز کې سپن زر دولتي شرکت ۱۵۰ ټنه وچ رومیان اروپايي هېوادونو ته صادر کړل.

د یاد شرکت رییس عبدالحمید اخوندزاده په هغه خبرپاڼه کې، چې مالیې وزارت خپره کړې څرګندوي؛ دا د اسلامي امارت لویه لاسته راوړنه ده، چې د افغانستان د سابو اړوند توکي اروپايي هېوادونو ته صادروي.

د یادونې ده، چې سپین زر دولتي شرکت خپلې چارې له ۲۱ کلن ځنډ وروسته د اسلامي امارت له بیا راتګ سره بېرته فعال شو او اوسمهال مالوچ، غوړي، کنجاړه او کاغذي دسمالونه تولید او بازار ته وړاندې کوي.

د سې شنبې پر ورځ ( د تلې ۴ ) د سوداګرۍ او صنعت وزارت په همکارۍ په هېواد کې د پانګونې د بهیر د ګړندي کولو لپاره د افغانستان او قزاقستان د خصوصي سکتور ترمنځ دوه اړخیزه ناسته جوړه شوه.

د سوداګرۍ او صنعت وزارت مطبوعاتي دفتر څرګنده کړې؛ په دې کتنه کې د دواړو هېوادونو د خصوصي سکتور استازو پر ناالکولي مشروباتو، کریمه ډبرو او منرالونو، کیمیاوي سرې، موټر بیتریو، رخت او نساجۍ، نفتي توکو، اوړو او غنمو، ګرځندوي، رستورانت چلولو او خوراکي توکو بحث او خبرې وکړې.

په دې کتنه کې د قزاقستان سوداګرو او پانګوالو د افغانانو له میلمه‌پالنې مننه وکړه او افغانستان یې د سوداګرۍ او پانګونې لپاره خوندي ځای او مناسب چاپېریال وباله.

همدارنګه د قزاقستان د خصوصي سکتور پر استازیتوب ارمان یاسین تایوف په کابل، بلخ او کندهار ولایتونو کې د نندارتونونو د جوړولو له هڅو خبر ورکړ او وایي، چې په نږدې راتلونکي کې به په قزاقستان کې د افغانستان د تولیدي صنایعو او دغه راز په قزاقستان کې د افغانستان د تولیداتو نندارتونونه جوړ کړي.

له بلې خوا ارمان یاسین تایوف ويلي، چې افغانستان ته د خپل سفر په بهیر کې به د کابل له سوداګرو او پانګوالو پر لیدنې سربېره به د هرات، بلخ او کندهار ولایتونو له پانګوالو سره هم وګوري.