د قزاقستان بهرنیو چارو وزارت ویلي، چې د افغانستان بهرنیو چارو وزیر امیر خان متقي د قزاقستان له بهرنیو چارو وزیر یرمک کوشریبایوف سره په ټیلیفوني اړیکه کې د دوه اړخیزو او سیمه‌ییزو همکاریو د پراختیا په اړه خبرې کړې دي.

په دې خبرو کې د قزاقستان بهرنیو چارو وزیر د وروستیو زلزلو له کبله د افغانستان له خلکو سره د خواخوږۍ پر څرګندولو کابل ته د بشري ماموریت له لېږلو خبر ورکړ، چې ډاکټران، درمل او لومړنۍ اړتیاوې به په کې وي.

امیر خان متقي د افغانستان له خلکو سره د قزاقستان له پرله‌پسې مرستو او ملاتړ د ستاینې تر څنګ څرګنده کړه؛ سږ کال له قزاقستان څخه افغانستان ته د بشري مرستو دوه جوپې رالېږل شوي، چې ۳.۷ زره ټنه وزن لري.

دواړو خواوو د سوداګرۍ، بانکدارۍ، کانونو او ډیجیټل ټکنالوژیو په برخو کې د همکارۍ پر پراخولو ټینګار کړی او د سیاسي خبرو د دوام او د دوستانه اړیکو د پیاوړتیا لپاره یې خپل چمتووالی څرګند کړ.

د اسلامي امارت بهرنیو چارو وزارت ويلي، چې پاکستان د غیر واقعي او غیر عملي مسلو پر راپورته کولو د کابل او اسلام‌آباد ترمنځ د استانبول درېیم پړاو مذاکرات بې پایلې کړل.

د افغانستان بهرنیو چارو وزارت د دوشنبې پر شپه (د لړم نولسمه) یوه رسنیزه خبرپاڼه خپره کړه، چې له مخې یې: د بهرنیو چارو وزارت مالي او اداري مرستیال محمد نعیم په کابل کې میشتو بهرنیو ډیپلوماټانو سره په ناسته کې ویلي؛ پاکستان هڅه کړې، چې د مذاکراتو په بهیر کې د خپلو ناامنیو پړه پر افغانستان واچوي.

محمد نعیم زیاته کړې؛ دا چلند ښیي، چې د پاکستان په پوځ کې ځینې کړۍ شته، چې نه غواړي د کابل او اسلام‌آباد ترمنځ اړیکې د مذاکراتو او تفاهم له لارې حل شي.

نوموړي ویلي؛ اسلامي امارت د مذاکراتو پر دوام او د متقابلې همغږۍ له لارې د ستونزو حل غواړي؛ خو د پاکستان داخلي ننګونې پر افغانستان تپل “غیر منطقي او د نه منلو وړ” ګڼي.

د کډوالو او راستنېدونکو چارو وزارت اعلان کړی، چې په تېرو ۱۵ ورځو کې ۱۵۳ زره ۹۳۱ افغان کډوال له پاکستان، ایران او ترکیې څخه هېواد ته راستانه شوي دي.

د دې وزارت ویاند عبدالمطلب حقاني د دوشنبې پر ورځ (د لړم نولسمه) آریانا نیوز ته ویلي، چې په تېرو څه نا څه دوه اوونیو کې ۲۶۰۴۴کورنۍ، چې ۱۳۶۱۶۹کسان کیږي؛ په خپله خوښه او جبري توګه له پاکستان، ایران او ترکیې څخه افغانستان ته راستانه شوي دي.

د نوموړي د څرګندونو له مخې؛ ۲۴۷۸۷کورنۍ له پاکستان څخه، ۱۲۵۱کورنۍ له ایران او ۶کورنۍ له ترکیې هېواد ته راستانه شوي دي.

حقاني زیاته کړې؛ پردې سربېره ۱۶۶۰۳کسان مجرد دي، چې هېواد ته جبري راایستل شوي او ۱۱۳۲نور د پاکستان له زندانونو څخه خوشې شوي دي.

د کډوالو چارو وزارت ویاند ویلي، چې اسلامي امارت راستنېدونکو کډوالو ته بنسټیز خدمات وړاندې کړي، چې په کې خواړه، څښاک، جامې، روغتیايي خدمات، وړیا سیم کارتونه، نغدې پیسې او د هغوی د لېږد لپاره ټرانسپورټ رانغاړي.