تازه خبرونه
افغان حکومتي او طالب مشرانو د تهران غونډه د ۶ ټکو پر ډاګه کولو پای ته ورسوله

په تهران کې له طالب پلاوي سره د افغان حکومتي سیاستوالو دوه ورځنۍ ناسته نن پنجشنبه د چنګاښ ۱۷ د شپږ ټکو پر ډاګه کولو پای ته ورسیده.
د ایران په کوربتوب دواړو لوریو ټینګار کړی، چې جګړه د افغانستان د ستونزې حل ندی او باید سوله ییز حل وموندل شي.
د افغانستان د پخواني ولسمشر مرستیال یونس قانوني، د اطلاعاتو او فرهنګ پخواني وزیر کریم خرم او د ولسمشر سلاکار سلام رحیمي د تهران په ناسته کې د افغان حکومت د پلاوي له غړیو څخه ول، چې د طالب پلاوي مشري بیا د شېر محمد عباس ستانکزي پر غاړه وه.
د خبرو دواړو ډلو پر لاندې شپږ ټکو هوکړه کړې:
۱ـ پلاوي په افغانستان کې د سولې د راوستو لپاره د ایران هڅې او ښه نیت ستايلی او درناوی یې کوي.
۲- (دواړه لوري د جګړې د ادامې له کبله هېواد ته له پېښو ګواښونو او هغه صدمه، چې د هېواد سلامتۍ ته یې رسولې مشترک درک لري).
۳ – (خبرې اترې په صمیمانه فضا کې تر سره شوې او ټول مسائل په مفصله توګه او په پوره وضاحت سره مطرح شول).
۴ – (دواړو لوریو پرېکړه و کړه؛ هغه موارد لکه له جګړې څخه دایمې سولې ته د انتقال میکانیزم، متفقه اسلامي نظام جوړول او طریقه یې، چې نورو زیاتو مشورو او وضاحتونو ته ضرورت لري په راتلونکې ناسته کې، چې په ممکنه نېږدې راتلونکې کې به جوړه شي تر بحث لاندې راشي او نتیجې ته به ورسېږي.
[دواړه لوري] موافق شول، چې جګړه د افغانستان د ستونزې حل لار نده، باید ټولې هڅې د سیاسي او سوله ییز حل خوا ته توجیه شي.
۵ – ( دواړه لوري د تهران ناسته د افغانستان د ستونزې د سیاسي حل د تقويې لپاره یو نوی فرصت او زمینه ګڼي).
۶ – (دواړه لوري هغه بریدونه، چې د عامو خلکو پر کورونو، ښوونځیو جوماتونو او روغتونونو تر سره کېږي او ملکي تلفات یې رامنځته کړي او هم د عامه تاسیساتو ورانول په کلکه غندي او غواړي، چې عاملین یې د خپلو اعمالو په سزا ورسول شي).
دغه دوه ورځنۍ ناسته د چنګاښ بر ۱۶ او ۱۷ په تهران کې د ایران د بهرنیو چارو د وزیر جواد ظریف پر وینا پیل شوې.
دغه راز په قطر کې د طالبانو د سیاسي دفتر ویاند محمد نعیم ویلي، چې تېره ورځ د سیاسي دفتر پلاوي، د ايران د بهرنيو چارو وزارت او د روسيې فډراسيون د بهرنيو چارو وزارت له پلاویو تر منځ په تهران کې درې اړخیزه ناسته تر سره شوې ده، چې په کې پر سرحدونو او نورو اړوند موضوعاتو بحث او خبرې شوې دي.
همدارنګه د امریکا د بهرنیو چارو وزارت تهران ته د طالب پلاوي سفر جوړونکی وباله.
د امریکا د بهرنیو چارو وزارت ویاند ند پرایس په دې اړه ویلي: دغه ډول هڅې د افغانستان د راتلونکي لپاره ګټورې ثابتېدای شي.
هغه زیاته کړې: د افغانستان ګاونډیان باید په دې هېواد کې رغنده رول ولوبوي. هغه څه، چې ایران غواړي د داسې غونډو پر کوربتوب تر سره کړي؛ په رښتیا جوړونکې دي، چې پایله به یې په راتلونکې کې وګورو.
تازه خبرونه
د ملګرو ملتونو امنیت شورا د افغانستان په اړه غونډه کوي

په ملګرو ملتونو کې د عربي متحده اماراتو سفیره او د امنیت شورا د اوسني پړاو مشرې یوې خبري غونډې ته ویلي؛ ټاکل شوې، چې د افغانستان په اړه د امنیت شورا غونډه د غبرګولی پر ۳۱ / د جون پر ۲۱ نېټه جوړه شي.
د امنیت شورا د اوسني پړاو مشره لانا نصیبه وايي؛ افغانستان د ملګرو ملتونو د امنیت شورا د اجندا په سر کې ځای لري.
په ملګرو ملتونو کې د عربي متحده اماراتو سفیره او د امنیت شورا د اوسني پړاو رییسه لانا نصیبه وایي:
مونږ به د جون پر ۲۱ نېټه د افغانستان په اړه یوه غونډه ولرو. د مارچ په میاشت کې مو د افغانستان په اړه ډېرې غونډې درلودې. زمونږ د شورا اصلي موضوع افغانستان دی. زمونږ دنده د افغانستان د وضعیت ارزونه ده. زموږ تمرکز ډېر پر افغانستان دی او مونږ غواړو په افغانستان کې د ښځو د حقونو پر وضعیت کار وکړو، چې کړکېچن حالت لري.
نوموړې ټینګار کوي، چې عربي متحده امارات به د دغې شورا د غړي او د اوسني پړاو د مشر په توګه د افغانستان د قضیې په اړه د غړیو هېوادونو د همغږۍ د ساتلو هڅه وکړي.
لانا نصیبه ټینګار کوي، چې د افغانستان په چارو کې د ملګرو ملتونو ځانګړی همغږي کوونکي فریدون اوغلو به په نومبر میاشت کې د دغه هېواد د وضعیت په اړه امنیت شورا ته د بیاکتنې بشپړ راپور وړاندې کړي.
دغه ترکی دیپلومات یوه میاشت مخکې په افغانستان کې د ملګرو ملتونو د ځانګړي همغږي کوونکي په توګه ټاکل شوی دی.
د راپورونو پر بنسټ، په پام کې ده، چې د دې غونډې یوه مهمه موضوع به په افغانستان کې د ښځو له حقونو څخه سرغړونې وي.
له دې مخکې ملګرو ملتونو په دوحه کې د افغانستان په اړه د تړلو دروازو ترشاه غونډه کړې؛ خو داسې انګېرل کېږي، چې د افغانستان په اړه د ملګرو ملتونو غونډې کومې پایلې ته رسېدلي نهدي.
دا په داسې حال کې ده، چې فاکس نیوز د جمعې پر ورځ څرګنده کړې؛ څو امریکايي سناتورانو په افغانستان کې د بشري حقونو د مسلې په اړه د اسلامي امارت پر ضد د نویو بندیزونو لګولو طرحه وړاندې کړې ده.
تازه خبرونه
تحریک طالبان پاکستان د افغانستان له خاورې بریدونه کوي – راناثناءالله

د پاکستان د کورنیو چارو وزیر رانا ثناء الله یو ځل بیا ادعا کړې، چې تحریک طالبان پاکستان د افغانستان له خاورې د پاکستان پر ضد بریدونه کوي.
د تحریک طالبان پاکستان فعالیت ظاهراً د اسلامآباد لپاره یوه لویه ستونزه ګرځېدلې ده.
له همدې کبله کله، چې د دغې ډلې د فعالیت خبره راپورته کېږي؛ پاکستاني چارواکي د تور ګوته کابل ته نیسي او وايي، چې دغه ډله له افغانستان څخه د پاکستان پر ضد بریدونه کوي.
د پاکستان د کورنیو چارو وزیر راناثناءالله ویلي: د افغان حکومت دریځ دا دی، چې مونږ د پاکستاني حکومت پر ضد د تحریک طالبان پاکستان ملاتړ نهکوو؛ خو په اړه یې شکایتونه لرو. د دې ډلې کسان له افغانستان څخه پاکستان ته ننوځي. نږدې دوه میاشتې وړاندې یې مونږ ته وویل، چې مونږ به دوی له پولې څخه لرې انتقال کړو، چې پر پاکستان برید ته لاس رسی ونهلري.
اسلامي امارت د پاکستان د کورنیو چارو د وزیر د دغو نویو څرګندونو په اړه څه نهدي ویلي؛ خو له دې وړاندې یې په افغانستان کې د پاکستانيو طالبانو شتون او فعالیت رد کړی دی.
اسلامي امارت په وار وار ټینګار کړی؛ هیچا ته به اجازه ورنهکړي، چې د افغانستان خاوره د نورو هېوادونو پر ضد ورکاروي.
دا په داسې حال کې ده، چې د افغانستان د بهرنیو چارو وزیر امیر خان متقي په مشرۍ د اسلامي امارت یو لوړ پوړي پلاوي څه باندې یوه میاشت مخکې پاکستان ته تللی و او په اسلامآباد کې یې د دغه هېواد له چارواکو سره په لیدنه کې پر سولې، دیپلوماتیکو اړیکو او د دوه اړخیزو همکاریو پر پراخولو ټینګار کړی و.
تازه خبرونه
له اسلامي امارت سره د اوبو د حق په اړه خبرې د ډاډ وړ دي

د ایران د بهرنیو چارو وزیر ویلي، تهران له اسلامي امارت سره د اوبو د حق په اړه د ډاډ وړ خبرې کړې دي.
حسین امیر عبداللهیان د ایران دولتي رسنیو ته وویل: زمونږ د خبرو موضوع د اوبو د حق ده او د [ایران] ولسمشر، حسن کاظمي قومي [ په افغانستان کې د ایران سفیر] ته دنده سپارلې، چې دا موضوع داسې وڅاري، چې د دواړو هېوادونو ترمنځ په مستقیم ډول پرمخ ولاړه شي.
نوموړي د وروستۍ سرحدي نښتې په اړه وویل، چې دا نښته پې پلانه وه او د افغانستان وضعیت د ایران لپاره د پوهېدو وړ دی.
د ایران او افغانستان ترمنځ کړکېچ له هغې وروسته زیات شو، چې تهران کابل د اوبو پر بندولو تورن کړ.
د دواړو هېوادونو تر منځ تاو تریخوالی تېره میاشت له هغې وروسته پیل شو، چې د ایران ولسمشر ابراهیم رییسي ګواښ وکړ، چې اسلامي امارت باید د هلمند سیند په اړه د ایران د اوبو حق ته درناوی وکړي او که نه بیا دې ګیله نهکوي.
د اسلامي امارت چارواکو ټینګار کړی، چې د ایران او افغانستان ترمنځ د ۱۳۵۱ لمریز لېږدیز / ۱۹۷۳ ز. کال د اوبو تړون ته ژمن دي؛ خو د وچکالۍ له کبله دمګړۍ د اوبو له کمښت سره مخ یوو.
-
تازه خبرونه5 days ago
یو شمېر ګړۍ د ایران او افغانستان سرحدي نښتو ته لمن وهي – ایران
-
نړۍ3 days ago
بې پیلوته الوتکو د روسیې د تېلو پر دوه چاڼځایونو برید وکړ
-
سیمه ییز خبرونه4 days ago
په سپين بولدک کې د باروړونکیو موټرو لپاره نارسمي لار پرانستل شوه
-
د هوا حالاتو بدلونونه5 days ago
په ۱۳ ولایتونو کې وروستیو اورښتونو۳۷ کسانو ته مرګ و ژوبله اړولې
-
سوداگري2 days ago
پاکستان له افغانستان، ایران او روسیې سره د جنس پر جنس سوداګرۍ امر کړی
-
سیمه ییز خبرونه5 days ago
د پاکستان او روسیې تر منځ د سوداګرۍ دوه اړخیز بحري لېږد رالېږد پیل شو
-
سوداگري2 days ago
اسلامي امارت د سرپل د کانونو پر استخراج د پانګونې نوی ډاډ څرګند کړ
-
سوداگري3 days ago
د ریاست الوزرا اقتصادي مرستیالۍ د نړیوال بانک له راپور هرکلی وکړ