Connect with us

تازه خبرونه

افغان عالمانو په کابل کې له درې ورځنۍ لویې غونډې وروسته ۱۱ ماده ییز پرېکړه لیک وړاندې کړ

Published

 on

(Last Updated On: چنګاښ ۱۲, ۱۴۰۱)

په کابل کې د افغانستان اسلامي امارت د دیني عالمانو او قومي مشرانو غونډه، چې د پنجشنبې پر ورځ پیل شوې وه د شنبې پر ورځ د ۱۱ ماده ییز پرېکړه لیک پر وړاندې کولو پای ته ورسېده.

په دې تصویب شوي پرېکړه لیک کې له نړیوالې ټولنې غوښتنه شوې، چې دوی په افغانستان کې اسلامي امارت د مشروع حکومت په توګه پر رسمیت وپېژني.

په پرېکړه لیک کې راغلي: مونږ پر نړۍ، ګاونډ هېوادونو، ملګرو ملتونو، نړیوالو ټولنو په ځانګړي توګه له اسلامي هېوادونو او ادارو غواړو، چې د افغانستان اسلامي امارت د یوه مشروع حکومت په توګه پر رسمیت وپېژني.

سربېره پردې د عالمانو په دې لویه غونډه کې ګډون کوونکیو د اسلامي امارت او د دوی د مشرانو پر وړاندې د ټولو لګېدلیو بندیزونو د لرې کولو او د هېواد د کنګل شويو شتمنیو د خوشې کولو غوښتنه وکړه.

د افغانستان اسلامي امارت مشرتابه شیخ هبة الله آخوندزاده د جمعې پر ورځ له ۳۰۰۰ څخه د زیاتو کسانو په درې ورځنۍ غونډه کې ګډون وکړ او په خپله وینا کې یې ګډونوالو ته د جهاد د بریا او د هېواد د خپلواکۍ مبارکي وړاندې کړه.

شیخ هبة الله آخوندزاده، چې ډېر وخت په کندهار ولایت کې وي او ډېر لږ عام محضر ته راوځي؛ د جمعې پر ورځ په خپله وینا کې وویل، چې بهرنیان باید امر ونکړي.

دیني عالمانو په خپل پرېکړه لیک کې ویلي، چې د اسلامي امارت دفاع فرض ده او د داعشیانو د خراسان اسلامي دولت، چې په وروستیو میاشتو کې یې د یو شمېر پېښو مسوولیت منلی؛ ناروا بولي.

د دیني عالمانو لخوا په یوه خپره شوې خبرپاڼه کې راغلي، چې د عالمانو لویې غونډې په دې اړه خپل ۱۱ ماده ییز پرېکړه لیک په لاندې بڼه وړاندې کړی:

۱. اسلامي نظام د الله تعالی ستر نعمت او زمونږ د مؤمن ولس همیشنۍ غوښتنه وه. تجربو ثابته کړې، چې اسلامي نظام له ځان سره عدالت، امنیت، عزت او برکت راوړي. اسلامي نظام زمونږ د جهاد او څه باندې څلورو لسیزو قربانیو، هجرتونو او مشقتونو ستر آرمان او هدف و. دا، چې د الله تعالی پر ځانګړي فضل په ګران هېواد افغانستان کې اسلامي نظام حاکم شوی؛ مونږ یې نه یوازې کلک حمایت کوو، بلکې مرسته، دفاع او هر اړخیز ملاتړ یې د ټول ولس دیني او ملي وجیبه ګڼو.

۲. مونږ د افغانستان اسلامي امارت له زعیم امیرالمؤمنین شیخ الحدیث هبة الله آخوندزاده(حفظه الله) سره خپل بیعت یو ځل بیا تجدیدوو او په کلکه یې ملاتړ کوو. نوموړی مو د افغانستان د شرعي حاکم او اسلامي امارت د امیر په حیث منلی او منو یې او له الله تعالی څخه ورته په ټولو دیني او دنیوي چارو کې توفیق غواړو.

۳. څرنګه، چې اسلامي امارت د افغان ولس له متن څخه راپورته شوی او هیڅ بهرنی جهت د هغه په اقامه کې دخالت نلري او همدا یې د داخلي مشروعیت مؤثق دلیل دی. دغه راز یې په ټول هېواد کې سرتاسري امنیت تأمین کړی، د قدرت جزیرې یې له منځه وړي، افغانستان او د سیمې نورو هېوادونو ته متوجه ګواښونه یې خنثی کړي، په حکومتدارۍ کې یې د فساد، غصب او اختلاس فرهنګ ختم کړی او په افغانستان کې یې یو مرکزي واکمن نظام رامنځته کړی دی. د دې نظام تقویه نه یوازې د افغانستان او سیمې بلکې د ټولې نړۍ په ګټه ده.؛ ځکه، نو د سیمې او نړۍ پر هېوادونو، ملګرو ملتونو او نورو نړیوالو ټولنو، په ځانګړي توګه اسلامي هېوادونو او ټولنو غږ کوو، چې اسلامي امارت د یوه مشروع نظام په حیث پر رسمیت وپېژني؛ مثبت تعامل ورسره وکړي، له افغانستان څخه ټول بندیزونه پورته، د افغان ولس کنګل شوې شتمني آزاده او د هېواد په اقتصادي وده او بیا رغونه کې زمونږ د ملت ملاتړ وکړي.

 ۴. مونږ د اسلامي امارت له لوري د مخدره موادو د کښت، تولید، قاچاق او استعمال د مخنیوي په اړه د صادر شوي فرمان کلک حمایت کوو.

۵. مونږ د متقابل احترام او تعامل اصل ته پر پاملرنه له ګاونډ هېوادونو، سیمې او نړۍ سره د عدم مداخلې له سیاست او دهغوی پرخلاف د افغانستان د خاورې د نه استعمال په اړه د اسلامي امارت له موقف څخه ملاتړ کوو. همدارنګه د بالمثل تعامل پر بنسټ له ګاونډ هېوادونو، سیمې او نړۍ څخه مطالبه لرو، چې د افغانستان په داخلي چارو کې لاسوهنه ونکړي او هیچا ته د دې اجازه نه ورکوي، چې د دوی له خاورې څخه په استفاده د افغانستان پرخلاف فعالیت وکړي.

۶. د افغانستان اسلامي امارت یو حاکم اسلامي نظام دی، چې پر ټول هېواد واک لري او په هېواد کې یې امنیت او عدالت تأمین کړی دی.

د دې نظام پر وړاندې هر ډول مسلحانه مخالفت بغاوت او فساد في الارض ګڼل کیږي، چې دفع کول یې پر امارت او ملت واجب دي. همدارنګه د همدې حاکم اسلامي نظام هر نوع مخالفت، چې له اسلامي شریعت او ملي منافعو سره په ټکر کې وي فساد او ناروا عمل دی.

۷. له ملت غواړو، چې د داعش په نوم فتنه ګر د دې عصر خوارج او باطله ډله ده، چې زمونږ په اسلامي هېواد کې فساد خپروي. له دوی سره هر قسم مرسته او تعلق شرعاً ناروا عمل دی.

۸. پر هغو عالمانو، چې د ټولنیزو رسنیو له لارې اختلافي موضوعات راپورته کوي غږ کوو، چې له مناظرو او زیان اړوونکیو بحثونو څخه په کلکه ډډه وکړي؛ ځکه له دې کبله خلکو ته اختلافات او تشویشونه پیدا کیږي او په ملت کې د فتنې سبب ګرځي.

۹. له اسلامي امارته غواړو، چې عدالت، دیني او عصري تعلیم، صحت، زراعت، صنعت، د اسلامي مقدس شریعت په رڼا کې د اقلیتونو، ماشومانو، میرمنو او ټول ولس حقوقو او په ټوله کې هر اړخیز پرمختګ، اقتصادي ودې او متوازن انکشاف ته ځانګړې پاملرنه وکړي.

۱۰. مونږ د اسلامي امارت له مشرتابه غواړو، چې خپل موجود وحدت نور هم مستحکم، ملي وحدت نور هم پياوړی او ارضي تمامیت وساتي. د ملي مصالحو په تحقق، د فقر او بیکارۍ په مخنیوي او د ولسي هوساینې په لاره کې رغنده ګامونه واخلي.

۱۱. دا، چې اسلامي امارت هېواد ته د بهر ته تللیو شخصیتونو د رابللو بهیر پیل کړی؛ مونږ یې ملاتړ کوو. افغانستان د ټولو افغانانو ګډ کور دی. هیڅوک باید دلته د پردیتوب احساس ونکړي. له هېواده بهر شخصیتونو څخه مو غوښتنه دا ده، چې رامنځته شوی وضعیت یو فرصت وبولي؛ خپل هېواد ته راستانه شي او د پردیو په لمسون د مغرضانه فعالیتونو څخه ډډه وکړي.

 د غونډې بهیر د خبري رسنیو له لارې په ژوندۍ بڼه خپور نشو او او د غونډې جزئیات پخپل د رادیو له لارې  او  د اسلامي امارت د ویاندویانو لخوا له رسنیو سره شریک شوی دی.

د یادونې ده، چې په افغانستان کې تل لویه غونډه یا جرګه د هېواد په سیاسي بهیر کې تاریخي او مهم ځای لري او تل د شخړو د اوارۍ، د ټولنیزو اصلاحاتو او د ملي او نړیوالو پرېکړو د تصویب، د نظام جوړولو، ارزښتونو او ملي ویاړونو د خوندي کولو لپاره جوړې شوې دي.

تازه خبرونه

زه اوس هم د افغانستان ولسمشر یم

Published

on

(Last Updated On: زمری ۲۰, ۱۴۰۱)

د افغانستان پخواني ولسمشر اشرف غني، چې تېر کال یې د اګست پر ۱۵ له هېواده تېښته کړې؛ په خپلې لومړۍ تلویزیوني مرکه کې وایي: د هېواد د اساسي قانون له مخې اوس هم د هېواد ولسمشر یم.

په راتلونکیو څو ورځو کې د افغانستان د جمهوري نظام د سقوط او له هېواده د پخواني ولسمشر اشرف غني د تېښتې یو کال پوره کېږي.

اشرف غني د جمهوري نظام له سقوط وروسته په خپله لومړنۍ تلویزیوني مرکه کې، چې له A.B.N تلویزیون سره یې کړې؛ ادعا کوي، چې د اساسي قانون له مخې اوس هم د افغانستان ولسمشر ګڼل کېږي او تر هغې، چې د هېواد وګړي په قانوني بڼه بل څوک د ولسمشر په توګه و نه ټاکي، نو پخپل ځای به پاتې وي.

هغه وایي: زه د اساسي قانو پر بنسټ ولسمشر یم او تر هغې، چې د افغانستان خلک په قانوني بڼه بل څوک ونه ټاکي؛ زه ولسمشر یم.

اشرف غني د دې پوښتنې په ځواب کې، چې ولې له افغانستان څخه وتښتېد وايي؛ هغه وروستی کس و، چې له افغانستان څخه ووت. د هغه په خبره؛ دا کار یې، ځکه وکړ، چې د داکتر نجيب الله له برخلیک سره مخ نشي.

هغه زیاته کړې، چې له ده مخکې د ملي دفاع وزير په ګډون د کابينې ډېر غړي له افغانستان څخه تښتېدلي وه.

اشرف غني وایي: زه وروستی کس وم، چې له هېواده ووتم او دا هم د دې لپاره، چې د افغانستان د ولسمشر داکتر نجیب ترخه تجربه تکرار نشي.

دغه راز نوموړي زیاته کړې؛ د نظام په سقوط کې ټولو سیاستوالو ونډه درلوده.

هغه د ملي پخلاینې شورا پخوانی مشر عبدالله عبدالله د جمهوريت د ړنګېدو مسوول بولي او پر زلمی خلیلزاد هم نیوکې کوي.

نوموړی په دې اړه وایي: داکتر عبدالله د جمهوریت د نه ټینګښت مسوول دی. په ځانګړي توګه په وروستیو اووه کلونو کې. دوه یم دا، چې د افغانستان د سولې شورا مسوول وې؛ کوم ګام دې پورته کړ؛ د کاغذ پر مخ دې کومه طرحه وړاندې کړه او یا په عمل کې کله ، چې دوحې ته په ځانګړې الوتکه کې ولاړې او د اختر پر ورځ بېرته راغلې؛ ماته دې وویل، چې طالبان هیځ راز حرکت ته چمتو ندي.

د هېواد یو شمېر وګړي د اشرف غني دغه خبرې د شرم وړ بولي او وايي، چې د اوسنیو ټولو اقتصادي بدمرغیو لامل له افغانستان څخه د اشرف غني وتل دي.

د هېواد یو شمېر نور وګړي بیا وایي؛ اشرف غني د بښنې پر ځای بې ګټې خبرې وکړې، ځکه د ده تېښته د حکومت د سقوط لامل شوه، امنیتي بنسټونه له ماتې سره مخ شول او د نجونو ښوونځي اوس هم تړلي دي.

دوی د اوکراین له ولسمشر زیلینسکي سره د ده د پرتلې په اړه وايي، هغه د یو موټي ولس ولسمشر دی او امر يې د هېواد ټول امنیتي ځواکونه مني.

دا په داسې حال کې ده، چې له افغانستان څخه د اشرف غني له وتلو وروسته د هغه لومړي مرستیال امرالله صالح د افغانستان د اساسي قانون له مخې ځان د ولسمشرۍ مشروع سرپرست اعلان کړی دی.

Continue Reading

تازه خبرونه

اسلامي امارت د حجاب په ګډون د شریعت پلي کولو ته ژمن دی

Published

on

(Last Updated On: زمری ۲۰, ۱۴۰۱)

د امربالمعروف او نهی عن المنکر وزارت چارسمبالي ننګرهار ته د سفر پرمهال يوې جوړې شوې غونډې ته څرګنده کړې؛ د حجاب په ګډون ټول صادرشوي فرمانونه تطبيقوو او د مخنیوي په اړه به د نړیوالې ټولنې فشارونو ته تسلیم نشو.

هغه وایي؛ د نړيوالو هيڅ ډول فشار ته نه تسلیمیږي او ټول صادر شوي فرمانونه به تطبيقوي.

نوموړي له امربالمعروف له غړیو سره همکاري د ولس، ملاامامانو او ټولو مسوولينو ګډ مسووليت وباله او زياتوي، چې په تېرو شل کلونو کې فکري او فزيکي يرغل د افغان ملت راتلوونکي نسل ته سخته صدمه رسولې ده.

شیخ محمد خالد حنفي  ويلي؛ په ټول هېواد او ولسواليو کې کابو ۸ زره هڅاند غړي لري، چې د اجتماعي او فردي اصلاحاتو د راوستو لپاره کار کوي.

هغه همداراز د فرمانونو تطبيق په ولسي او حکومتي کچه عام کار وباله او زياتوي، چې هيڅوک ترې مستثنا ندی.

د نوموړي د څرګندونو له مخې؛ د اسلامي امارت فرمانونه تدريجي تطبيقوي او د تطبيق په برخه کې ټول مسوولين اړ دې، چې د امربالعمروف له کارکوونکیو سره همکاري وکړي.

دغه راز د غونډې ګډونوالو د تشکيل د زياتوالي، ترانسپورت او په نورو برخو کې له وزارت څخه د لازمې همکارۍ غوښتنه هم وکړه.

د امربالعمروف سرپرست همداراز ويلي، چې يو شمېر بهرنۍ کړۍ هڅه کوي، چې د يو شمېر خلکو پر مټ  اسلامي امارت تخريب کړي؛ خو هيڅ په لاس نه ورځي.

هغه ویلي، چې د ښځو حقوقو ته درناوی د تېرو شل کلونو پر پرتله په اسلامي امارت کې ډېر غښتلي او خوندي دي.

Continue Reading

تازه خبرونه

حکومت د انرژي او اوبو وزارت په سکتور کې د پانګونې د یو ورځنی کنفرانس کوربتوب وکړ

Published

on

(Last Updated On: زمری ۲۰, ۱۴۰۱)

د انرژۍ او اوبو وزارت په سکتور کې د خصوصي پانګونې د راجلبولو لپاره په کابل کې د دولتي چارواکو، نړیوالې ټولنې د استازیو او د خصوصي سکتور د غړیو په ګډون یو ورځنی کنفرانس جوړ شو.

د رییس الوزرا اقتصادي مرستیال ملا عبدالغني برادر په خپله پرانیستونکې وینا کې څرګنده کړې، چې د افغانستان اسلامي امارت د هېواد پرمختګ او پراختیا ته ژمن دی؛ خو له خلکو یې وغوښتل، چې زغم ولري او زیاتوي؛ ځکه دا هېواد مونږ پخپله جوړوو.

ملا برادر دغه راز په ډاګه کړه، چې افغانستان بالقوه یو بډایه هېواد دی، چې د پانګونې ډېر ښه فرصتونه لري.

نوموړي له سوداګرو وغوښتل، چې په افغانستان کې پانګونه وکړي او افغان حکومت به ورته نه یوازې د آسانتیاوو، بلکې د بشپړ امنيت زمینه هم برابره کړي.

هغه افغانانو ته ډاډ ورکړ، چې د کانونو د استخراج، بندونو په جوړولو او نورو برخو کې پانګونه او کارونه ورځ تر بلې زیاتېږي؛ ښايي په لږ وخت کې افغانستان پر ځان بسیا شي.

د انرژی او اوبو وزارت چارسمبالي عبداللطیف منصور هم استازیو ته په وینا کې ویلي، چی د افغانستان د اوبو لګولو اداره د اوبو مدیریت او د انرژۍ تولید ته ژمنه ده.

عبداللطیف منصور ویلي، چې کنفرانس د پانګوالو لپاره د اوبو او انرژۍ په سکتورونو کې د شته فرصتونو د په ډاګه کولو لپاره جوړ شوی، چې د کورنیو، سیمه ایزو او نړیوالو سوداګرو ته په اړوند سکتورونو کې د پانګوونې زمینه برابروي.

د کانونو او پټرولیم وزارت سرپرست شهاب الدین دلاور هم استازیو ته د وینا پر مهال ویلي؛ اوس د دې وخت رارسېدلی، چې د هېواد خپلواکي وساتو او له طبیعي زېرمو ګټه واخلو.

د کانونو او پترولیم وزارت چارسمبالي شهاب الدین لاور په ډاګه کړې؛ کوچني کانونه د کورنيو پانګوالو لپاره ځانګړي دي، خو که بهرنۍ کمپنۍ غواړي پانګونه وکړي، مشر يې بايد افغان وي.

د دلاور د څرګندونو له مخې، اوس مهال ٥١ واړه کانونه د استخراج په حال کې دي.

د کانونو او پترولیم وزیر شهاب الدین لاور بیات پاور ته هم نغوته وکړه او په ډاګه یې کړه، چې بیات پاور دا مهال ۴۰ میګاواته برښنا تولیدوي او غواړي دغه کچه ۲۵۰ میګاواته ته لوړه کړي.

هغه څرګنده کړه: مونږ د دغه شرکت له پرېکړې هرکلی کوو.

Continue Reading

Trending

Copyright © 2022 Ariana News. All rights reserved!