په افغانستان کې د ملګرو ملتونو د مرستندویه پلاوي (یوناما) مشرې روزا اوتونبایوا او مرستیالې یې انډریکا راټواته د اسلامي امارت د اقتصاد وزارت له چارسمبالي( سرپرست ) دین محمد حنیف سره بحث او خبرې کړې دي.

د اقتصاد وزارت ویاند عبدالرحمان حبیب وایي: دا ناسته او خبرې "د خلکو پر اقتصادي اړتیاوو او پرمختیایي لومړیتوبونو" راوڅرخېدې او دا ټینګار وشو، چې "بشري مرستې اغېزمنې او رڼې پلې شي."

د خبرپاڼې له مخې؛ د اقتصاد وزارت چارسمبالي په دې ناسته کې ټینګار وکړ، چې په روان کال کې باید د نړیوالو ادارو پاملرنه په هېواد کې پراختیایي فعالیتونو او د پروژو پلي کولو ته راواوړي، چې ورسره معیشتي ستونزې حل او د غربت او بې کارۍ کچه راټیټه شي.

د خصوصي سکټور غړي وايي؛  که په افغانستان کې د ملګرو ملتونو د ادارو له لوري د هېواد د خصوصي  سکټور او د اقتصادي  پروژو په  برخه کې همکاري پراخه شي؛ نو نه یوازې به د کرنې سکټور وکولی شي په هېواد کې د بې‌ کارۍ کچه راټیټه کړي، بلکې د خلکو د ورځینیو عوایدو پر زیاتوالي به هم مثبتې اغېزې ولري.

د خصوصي سکټورغړي وايي؛ که د نړیوالو مرستیندویه بنسټونو له لوري په هېواد کې له انکشافي او اقتصادي پروګرامونو سره همکاري پرا خه شي له دې سره به په هېواد کې زرګونه کسانو ته د دوا مداره کار د زمینې ترڅنګ د ملي اقتصاد پر پراختیا هم مثبتې اغئزې وکړي.

په پاکستان کې د افغانستان سفارت شارژدافیر سردار احمد شکیب د ملګرو ملتونو د کډوالو عالي کمیشنرې میرمن فیلیپا کینډلر سره وکتل او په اسلام‌آباد او راولپنډۍ کې یې د امنیتي ځواکونو لخوا د افغان کډوالو د نیولو او ځورولو په اړه اندېښنه څرګنده کړې ده.

دې سفارت د چارشنبې پر ورځ ( د مرغومي شپږویشتمه) په یوه خبرپاڼه کې ویلي، چې سردار احمد شکیب په دې ناسته کې ټینګار وکړ؛ هغه کډوال، چې قانوني اسناد لري باید ملاتړ یې وشي.

د نوموړي د څرګندونو له مخې؛ د پاکستان پولیسو د افغانانو کورونه تلاشي کړل او افغان کډوال یې ونیول. هغه وګړي، چې ویزې او قانوني اسناد لري نیول کیږي او په ځینو مواردو کې له دوی څخه رشوت او ډیرې پیسې هم غوښتل کیږي.

دغه راز پاکستاني پولیسو ویلي؛ هغه افغانان، چې اسناد لري او که نه باید له اسلام‌آباد او راولپنډۍ څخه ووځي.

د دغې خبرپاڼې له مخې؛ میرمن فیلیپا کینډلر ویلي، چې هغې ته د پاکستاني پولیسو لخوا له افغان کډوالو سره د ناوړه چلند په اړه شکایتونه رسېدلي، چې په راتلونکو ورځو کې به پدې اړه له پاکستاني چارواکو سره خبرې وکړي.

د ننګرهار ولایت په مرکز جلال‌آباد ښار کې د کبانو پلورونکي وايي، چې په نورو ولایتونو کې د هوا له سړېدو سره د ننګرهار د کبانو بازار ښه شوی دی.

کب پلورونکو زیاته کړې؛ د دې ولایت پر خلکو سربېره د نورو ولایتونو خلک هم د کبانو د خوړلو او اخیستلو لپاره ننګرهار ولایت ته راځي.

د ننګرهار اوسېدونکي د کبانو د بازار په اړه وایي، چې د کب غوښې بیه لوړه ده او باید راټیټه شي.

د کب پلورونکو د څرګندونو له مخې؛  په دې بازار کې هر ډول کبان شته، خو ګراس کبان لوړه بیه لري. دوی زیاتوي، کورني کبان ښه کیفیت لري؛ خو دې ولایت ته ډېر کبان له پاکستان څخه واردېږي.

یو شمېر هغه خلک، چې د کب خوړلو لپاره راغلي وايي؛ بیې لوړې شوې دي او باید راټیټې شي، چې هرڅوک یې وخوري.

د ننګرهار سیمه‌ییز چارواکي وايي؛ په دې ولایت کې د کبانو لسګونه فارمونه شته او هڅه کوي، چې د کبانو د فارمونو له زیاتېدا سره ننګرهار پر ځان ‌بسیا کړي.