Connect with us

تازه خبرونه

امریکا دې په کابل کې خپل سفارت بېرته پرانیزي – شېر محمد ستانکزی

Published

 on

(Last Updated On: وری ۹, ۱۴۰۲)

د اسلامي امارت د بهرنیو چارو وزارت سیاسي مرستیال له امریکا څخه په کابل کې د سفارت د بېرته پرانستلو غوښتنه کړې ده.

شېرمحمد عباس ستانکزي د عربي متحده اماراتو په دوبۍ کې د افغانستان له قونسلګرۍ څخه د لیدنې پرمهال څرګنده کړې: راځئ خپل مسوولیتونه ترسره کړو. راشئ خپل سفارت خلاص کړئ. مونږ ستاسې امنیت ته پاملرنه کوو. کله، چې تاسې راشئ؛ نور هېوادونه به هم همدا کار وکړي. اوس ډېر هېوادونه له مونږ سره په ځانګړیو ناستو کې وايي، چې که امريکا له تاسې سره خپلې اړيکې بېرته ټينګې کړي؛ مونږ به له ځنډ پرته راشو.

په داسې حال کې، چې اسلامي امارت د اسلامي شریعت او ملي ګټو په رڼا کې له نړۍ سره د مثبت تعامل په لټه کې دی؛ خو امریکا وايي، چې هیڅ هېواد اسلامي امارت پر رسمیت نه پېژني.

د افغانستان لپاره د امریکا د سفارت چارسمبالې له یو شمېر افغان ښځینه خبریالانو سره په انلاین ناسته کې ویلي، سره له دې، چې د افغانستان یو شمېر دیپلوماتیک مرکزونه اسلامي امارت ته سپارل شوي؛ خو هیڅ هېواد د اسلامي امارت د پېژندلو پلان نه‌لري.

کرن دیکر همداراز ټینګار کړی، چې په افغانستان کې دننه د اسلامي امارت او د ښځو او نرینه وو ترمنځ د ښو اړیکو جوړول د نړۍ له نورو هېوادونو سره د اسلامي امارت د ښو اړیکو معنی لري.

هغې ویلي: مونږ له دغو ټولو هېوادونو اوریدلي؛ دوی پلان نه‌لري، چې د طالبانو (اسلامي امارت) حکومت د افغانستان د مشروع حکومت په توګه پر رسمیت وپېژني. زما په اند زما د هېواد په ګډون هیڅ هېواد نشته، چې د طالبانو (اسلامي امارت) حکومت پر رسمیت وپېژني. که طالبان (اسلامي امارت) د نړۍ له نورو هېوادونو سره ښې اړیکې غواړي؛ باید د خپل هېواد له ښځو او نرینه وو سره ښې اړیکې ولري.

په ورته وخت کې د امریکا د بهرنیو چارو وزارت ویلي، چې پر ښځو د بندیزونو دوام به په اوږد مهال کې د اسلامي امارت او د نړۍ د هېوادونو ترمنځ د عادي اړیکو د ټینګېدو مخه ونیسي.

اسلامي امارت په وار وار ویلي، چې په افغانستان کې د فشار پالیسي کار نه‌کوي او د نړۍ هېوادونه باید له افغانستان سره تعامل وکړي؛ ځکه، چې کابل د امریکا په ګډون له ټولو هېوادونو سره د اړیکو ټینګول غواړي.

د اسلامي امارت د ویاند مرستیال بلال کریمي وایي: د هېواد سیاسي او یا بهرنۍ مسایل باید د افغانستان له داخلي مسایلو سره ونښلول شي. د افغانستان داخلي مسایل د افغانستان له خلکو سره تړاو لري. د افغانستان خلک د هېواد د داخلي مسایلو په اړه خپلواکه پرېکړه کوي.

په تېره څه کم یوه میاشت کې تهران او عربي متحده اماراتو د افغانستان سفارت ومانه او د ترکیې په استانبول کې د افغانستان قونسلګري اسلامي امارت ته وسپارل شوه.

تازه خبرونه

ملګرو ملتونو او مرستندویه ادارو له افغانستان سره د مرستې بودجه کمه کړه

Published

on

(Last Updated On: غبرګولى ۱۶, ۱۴۰۲)

د ملګرو ملتونو د بشري مرستو د همغږۍ دفتر د دوشنبې پر ورځ په ډاګه کړې؛ ملګرو ملتونو او بشري ادارو د ۲۰۲۳ ز. کال لپاره افغانستان ته د بشري مرستو د رسولو بودجه ۳ اعشاریه ۲ میلیارد دالرو ته راټیټه کړه، چې د تېر کال پر پرتله ۴ اعشاریه ۶ میلیارد دالره کمه شوې ده.

رویترز راپور ورکړی، چې د ملګرو ملتونو د بشري چارو د همغږۍ دفتر څرګنده کړې؛ د افغانستان اسلامي امارت د ښځینه مرستندویه کارکوونکیو د محدودیتونو په پایله کې “د عملیاتي شرایطو بدلون” د بیاکتنې له پلان سره مرسته کړې.

اسلامي امارت افغان میرمنې د انجو ګانو او ملګرو ملتونو په دفترونو کې له کار کولو منع کړې دي.

مرستندویه ادارو خبرداری ورکړی، چې دا کار به د مرستو رسولو بهیر نور هم اغېز من کړي.

په اعلامیه کې ویل شوي، چې افغانستان اوس هم د نړۍ تر ټولو ناوړه بشري ناورین دی، چې دوه پر درېیمه برخه وګړي یې بشري مرستو ته اړتیا لري.

ځینو بشري چارواکو او ډیپلوماتانو خبرداری ورکړی چې د نړیوال بحران او اقتصادي لومړیتوبونو د ارزونې لپاره د ښځینه کارکونکو او تمویل کونکو حکومتونو په اړه د IEA محدودیتونو له امله افغانستان ته د تمویل احتمالي کمښت خبرداری ورکړی.

اوس هم څرګنده نه‌ده، چې د تعدیل شوې بودجې څومره برخه به د بهرنیو تمویلونکیو لخوا تمویل شي.

په ۲۰۲۲ کې د افغانستان لپاره نړیواله بشردوستانه غوښتنه ۴.۴ میلیارد دالره وه، چې شاوخوا ۳ اعشاریه ۲ میلیارد دالر یې ترلاسه کړل.

د دغې ټولنې د څرګندونونو له مخې؛ له تېر کال راپدیخوا د اړمنو کسانو شمېر ډېر شوی دی.

د ملګرو ملتونو پراختیايي ادارې د اپریل په میاشت کې وړاندویېنه کړې وه، چې که په مرستو کې ۳۰ سلنه کموالی راشي؛ نو د افغانستان اقتصاد به له سقوط سره مخ او انفلاسیون به لوړ شي.

Continue Reading

تازه خبرونه

د بدخشان مرستیال والي په موټر بم چاودنه کې ووژل شو

Published

on

(Last Updated On: غبرګولى ۱۶, ۱۴۰۲)

د بدخشان سیمه ییز چارواکي تائیدوي، چې نن سهار (د غبرګولي ۱۶ ) په فیض‌آباد ښار کې د موټر بم چاودنې له کبله د دغه ولایت د مرستیال والي نثار احمد احمدي په ګډون دوه کسان وژل شوي دي.

دغه چاودنه نن سهار شاوخوا اته بجې د فيض‌آباد ښار د محکمې په څلور لارې کې رامنځته شوې ده.

د بدخشان د اطلاعاتو او فرهنګ رییس معزالدین احمدي ويلي، چاودنه د بدخشان ولایت د مرستیال او سرپرست مولوي نثار احمد احمدي پر موټر شوې ده.

نوموړی وايي، چې په دې برید کې شپږ کسان نور ټپیان شوي دي.

هغه زياته کړې، چې ټپيان ولايتي روغتون ته لېږدول شوي او په‌دې اړه کشفي او استخباراتي ارګانونو له لوري نورې پلټنې روانې دي.

تر اوسه کوم کس یا ډلې د دغه برید پړه پر غاړه نه‌ده اخیستې.

عيني شاهدانو ويلي، چې په دې موټر بم چاودنه کې مرستيال والي او د هغه موټر چلوونکى وژل شوي او يو شمېر نور ملکي وګړي ټپيان دي.

له‌دې مخکې هم د دغه ولايت امنيه قومندان او د کانونو رييس په ورته چاودنو کې وژل شوي وه.

نثار احمد احمدي د اسلامي امارت له رامنځته کېدو راپدیخوا د بدخشان والي د مرستیال په توګه کار کاوه او په دې وروستیو کې د والي د نشتوالي له کبله د دغه ولایت د سرپرست دنده هم ور پر غاړه وه.

Continue Reading

تازه خبرونه

د ناروې د کډوالو شورا د افغانستان په کندهار کې د میرمنو په ګډون فعالیتونه بیا پیل کړل

Published

on

(Last Updated On: غبرګولى ۱۶, ۱۴۰۲)

د ناروې د کډوالو شورا په ډاګه کړې، چې په کندهار ولایت کې یې د ښځینه او نرینه کارکوونکیو په ګډون خپل فعالیتونه بیا پیل کړي دي.

د ناروې د کډوالو شورا مشر وايي؛ ښځې وتوانېدلې، چې په کندهار او د افغانستان په يو شمېر نورو سيمو کې خپل بشري فعاليتونه بيا پيل کړي او د دوى بشري مرستې د نرينه او ښځينه همکارانو، نجونو او هلکانو له مساوي ونډې سره تر سره کیږي.

 د ناروې د کډوالو شورا رییس یان اګلند وایي: زه خوشحاله یم، چې دا تائیدوم، چې مونږ په کندهار کې او همدارنګه د افغانستان په یو شمېر نورو سیمو کې خپل ډېري بشري عملیات بیا پیل کړي دي. زمونږ ټول کار د نرینه وو، ښځو، نجونو او هلکانو لپاره یو شان دی او د ښځو او نرینه وو پر مساوي ګډون روان دی.

 یو شمېر حقوق پوهان د مرستو په رسولو کې د ښځو ونډه خورا مهمه ګڼي او له اسلامي امارته غواړي، چې ټولو ښځو ته په ملي او نړیوالو ادارو کې د کار کولو اجازه ورکړي.

په دې وروستیو کې ملګرو ملتونو ویلي، چې له افغانستان سره د دې ټولنې مرستې کمې شوي دي.

د اقتصاد وزارت چارواکي وايي، د هېواد د بهرنیو اسعارو د زېرمو کنګل کېدل او د ځینو محدودیتونو لاملونه د بېوزلۍ د پراخېدو لامل شوي دي.

دا په داسې حال کې ده، چې له دې مخکې ګڼو نړیوالو مرستندویه ادارو اعلان کړی و، چې د ښځو پر کار بندیز په افغانستان کې د مرستو رسولو بهیر زیانمن کړی او له ښځینه کارکوونکیو پرته نه‌شي کولی خپلو کارونو ته دوام ورکړي.

Continue Reading

Trending

Copyright © 2022 Ariana News. All rights reserved!