ژغورونکیو د سې شنبې پر ورځ ټول ۴۱ کارګران، چې د همالیا د غرونوپه یوه ویجاړ شوي تونل کې بند پاتې ول؛ له ۱۷ ورځو هڅو او کیندنو وروسته را وایستل شول، چې په ټول هند کې یې د خوښۍ ولولې راوپارولې.

رویترز راپور ورکړی، چې د هند د ځینو بې‌وسو ایالتونو د ټیټ عاید لرونکيو کارګرانو د ژغورلو هڅې له شپږ ساعتونو څخه ډېر وروسته پیل شوې. دا تونل د نومبر پر ۱۲نېټه د اوتراکند په ایالت کې نړېدلی و.

دوی د ۹۰سانتي مترو پر پلنوالي د یوې پولادي پایپ له لارې راوایستل شول او ټول بهیر په یو ساعت کې بشپړ شو.

د ژغورنې ډلې مشر وکيل حسن ويلي: د هغو روغتیاي حالت ډېر ښه دی او بالکل د ډاډ وړ دی … لکه زما او يا ستاسې. د دوی د روغتیایي حالت په اړه اندئښنه نشته.

لومړی کس، چې را ایستل شوی یو ټیټ ونی سړی و، چې خړ ژمنی بنیان او ژیړه سخته خولۍ یې پر سر وه. د هندي دود سره سم پر ګلانو وپوښل شو او د ایالت د اعلی وزیر پوشکار سینګهـ دهمي او د فدرالي لویو لارو د مرستیال وي کي سینګهـ له درانه هرکلی سره مخ شو.

ځینې ​​په خندا بهر راووتل او دهمي کلک په غېږ کې ونیول. په داسې حال کې، چې نورو ترې مننه څرګنده کړه.

لومړي وزیر نریندرا مودي په ایکس پاڼه کې لیکلي؛ زه غواړم خپلو ټولو هغو ملګرو ته، چې په تونل کې بند پاتې ول ووایم؛ ستاسو زړورتیا او زغم د ټولو لپاره الهام دی.

هغه زیاته کړې: دا د خوښۍ ځای دی، چې د اوږدې مودې له تمې وروسته به زمونږ دا ملګري اوس له خپلو عزیزانو سره وویني. په دې سخت وخت کې د دې ټولو کورنیو زغم او زړورتیا د ستاینې وړ ده.

تلویزیوني چینلونو راپور ورکړی، چې مودي وروسته له ژغورل شویو کسانو سره په تیلیفون خبرې وکړې او د دوی د وضعیت په اړه یې وپوښتل.

د سریندرا میرمن رجني تودو، چې میړه یې له نورو ځوانانو سره بنده و ویلي؛ مونږ خوښ او راحت یوو ما په کورنۍ کې ټولو ته ویلي، چې هغه راوتلی دی.

ځايي اوسېدونکي، چې له تونل بهر راټول شوي وه؛ پر پټاکیو، خواږو او شعارونو یې له هند ستاینه وکړه او دا شېبه یې ونمانځله.

دغو ۴۱ کسانو ۱۷ ورځې د یوه پایپ له لارې خواړه، اوبه، رڼا، اکسیجن او درمل ترلاسه کول؛ خو د سختو برمه کولو ماشینونو په مرسته د تونل د کیندلو هڅې د خرابې هوا له امله له خنډ سره مخ شوې وې.

هندي چارواکو د سې شنبې پر ورځ ویلي؛ د ژغورونکيو ډله له هغو ۴۱ کسانو یوازې شپږ یا اووه متره واټن لري، چې له دوه اوونیو ډېر د همالیا د لویې لارې په تونل کې بند پاتې دي.

دا د هند له ټولو بې‌وزله ایالتونو څخه د ټیټ معاش لرونکي کارګران دي، چې د نومبر پر ۱۲ د تونل له ړنګیدو راپدیخوا د اوتراکند ایالت په څلورنیم کیلومتره تونل کې بند پاتې دي.

چارواکو ویلي؛ د موږکانو پر نوم نومول شوي کان کیندونکي، چې د دوشنبې پر ورځ د ماشینونو له ناکامۍ وروسته د ډبرو او جغلو له لارې د لاس په واسطه د کیندلو لپاره راوړل شوي وه؛ په یوه شپه کې یې ښه پرمخ ولاړل.

رویترز راپور ورکړی، د ژغورنې مشر دیپک پاتل ویلي، هغو ته د رسېدو لپاره شاوخو ۶ یا ۷ متره پاتې دي او د سې شنبې پر ورځ به ټول وژغورل شي.

دوی ته د پایپ له لارې خواړه، اوبه، رڼا، اکسیجن او درمل رسیږي.

د دوشنبې د ورځې د هوا حالاتو اټکل د هغو ۴۱ کارګرانو د ژغورنې عملیاتو ته نورې ستونزې رامنځته کړي، چې دوه اوونۍ مخکې د هند همالیا د غرونو په یوه تونل کې بند پاتې ول؛ خو د مرستو تنظیموونکي ډاډ ورکوي، چې ورسره ډغرو وهلو ته چمتوالی لري.

رویترز راپور ورکړی، چې د هند د ځینو بې‌وزلو ایالتونو کارګران د نومبر له ۱۲ نېټې راپدیخوا د اوتراکند ایالت کې په څلورنیم کیلومتري تونل کې بند پاتې دي.

خرابه هوا له برښنا، ږلۍ او ټيټې تودوخې سره غرونو ته نږدې کیږي؛ خو د مرستې تنظیم کوونکیو ویلي، چې دوی به ورسره ډغرې ووهي.

د NHIDCL رییس محمود احمد، چې د تونل په جوړولو او مرستو رسولو کې هڅې کوي ویلي؛ دوی (د ژغورنې ډلې) روزل شوي، چې په هر ډول شرایطو کې کار وکړي، نو دا زمونږ لپاره د اندېښنې وړ نه‌ده.

یو څلویښت بند پاتې کسان خواړه، اوبه، رڼا، اکسیجن او درمل د یوه نري پایپ له لارې ترلاسه کوي؛ خو د دوی د ایستلو لپاره د تونل د کیندلو هڅې له خنډونو سره مخ شوې.

د برمه کولو ماشینونه زیانمن شوي او ژغورونکیو د لاس په واسطه کیندلو ته لار اواره کړې ده.

د یکشنبې پر ورځ دوی د خلکو د راایستلو لپاره بله لار پرانستله، چې موخه یې د پورتنۍ برخې سوري کول او د هغو راایستل دي.

د برمه کولو SJVNL  شرکت مشر جسونت کپور ویلي: مشکلات به وي، له ستونزو سره به مخ کیږو؛ خو مونږ ورته چمتو یوو.

د دوشنبې پر ورځ پر تندر او ږلۍ سربېره، لږ تر لږه د سانتي ګرید ۹ درجې وړاند ویېنه شوې ده.

دغه تونل د چار دام د لویې لارې یوه برخه ده، چې د لومړي وزیر نریندرا مودي یوه له سترو پروژو څخه ده، چې موخه یې د هندوانو څلور زیارتونه د ۸۹۰ کیلومتره سړک له لارې نښېدا ده.

چارواکو تر دې دمه نه‌دي ویلي، چې د تونل د نړېدو لامل څه دی؛ خو په سیمه کې له دې مخکې هم ځمکه ښوېدنې، زلزلې او سیلابونو لیدل شوي دي.