چین د چارشنبې پر ورځ اعلان وکړ، چې پاکستان او افغانستان غواړي خپلې ډیپلوماتیکې اړیکې ښې کړي.

 دا څرګندونې د افغانستان او پاکستان د بهرنیو چارو وزیرانو ترمنځ په دې هېواد کې له غیر رسمي درې اړخیزې غونډې وروسته رامنځته شوې دي.

د دې غونډې په بهیر کې امیر خان متقي او اسحاق ډار په اصولو کې هوکړه وکړه، چې ژر تر ژره د یو او بل حکومتونو ته سفیران واستوي.

د رویټرز د څرګندونو له مخې؛ دا اعلان د چین بهرنیو چارو وزیر وانګ یی له غونډې وروسته کړی دی.

د چین  بهرنیو چارو وزارت لخوا د خپرې شوې خبرپاڼې له مخې؛ وانګ يي ویلي، چې دواړو لوریو د ډیپلوماټیکو اړیکو د ښه کولو لپاره خپله لېوالتیا ښودلې ده.

هغه زیاته کړې: “چین له دې هڅې هرکلی کوي او لېواله دی، چې د افغانستان او پاکستان ترمنځ د اړیکو د ښه کولو لپاره هڅې روانې وساتي او مرسته وکړي.”

د خبرپاڼې له مخې، د پاکستان بهرنیو چارو وزارت ویلي، چې دوی “په دوه اړخیزو اړیکو کې د مثبت پرمختګ په ګډون له ډیپلوماټیکو ښکېلتیاوو، سوداګرۍ او ټرانزیټ آسانتیاوو زیاتوالو” هرکلی کوي.

د افغانستان بهرنیو چارو وزارت چارسمبالي “له دواړو هېوادونو سره د سیاسي او اقتصادي اړیکو پر اړتیا ټینګار کړی او هیله څرګندوي، چې په راتلونکي کې به په دې برخو کې نور پرمختګ هم وشي.”

تېره میاشت په کابل کې د امیر خان متقي او اسحاق ډار له لیدنې وروسته تاوتریخوالی کم شو. په دې غونډه کې امیر خان متقي له پاکستان څخه د لسګونه زرو افغانانو د شړلو په اړه خپله اندېښنه څرګنده کړه.

د چارشنبې د ورځې غونډه په بیجینګ کې د اړیکو د ښه‌والي یوه بله نښه وه او په پای کې دواړو خواوو هوکړه وکړه، چې ژر تر ژره په کابل کې د بهرنیو چارو وزیرانو درې اړخیزه غونډه وکړي.

پاکستان او افغانستان د یو بل په پلازمېنو کې سفارتونه لري؛ خو دا سفارتونه شارژدافیران اداره کیږي، نه رسمي سفیران.

چین لومړنی هېواد و، چې په کابل کې یې د اسلامي امارت لخوا ټاکل شوی سفیر ومانه. که څه هم تر اوسه یې په رسمي ډول اسلامي امارت پر رسمیت ندی پېژندلی.

د افغانستان بهرنیو چارو وزارت چارسمبالي امیر خان متقي د چین بهرنیو چارو له وزیر سره په ناسته کې هغې بین الحکومتي ستونزې ته نغوته(اشاره) وکړه، چې افغان سوداګر د هېواد د زراعتي محصولاتو او نورو توکو د صادراتو پر وخت ورسره مخ دي او په دې اړه یې د بین الحکومتي کمیسیون د ګډ کار غوښتنه هم وکړه.

د بهرنیو چارو وزارت د خبرپاڼې له مخې؛ امیر خان متقي په بېجنګ کې د چین بهرنیو چارو له وزیر وانګ يي‌ سره د لیدنې پر مهال پر دوه اړخیزو اړیکو او اقتصادي همکاریو د ټینګار تر څنګ ډاډ څرګند کړ، چې په نږدې راتلونکي کې به د دواړو هېوادونو تر منځ سوداګزیر حجم د پام وړ کچې ته پورته شي.

امیر خان متقي یو ځل بیا یادونه وکړه، چې د افغانستان خاوره به هېڅکله د ګاونډ هېوادونو پر وړاندې ونه‌کارول شي.

د بهرنیو چارو وزارت په خبر پاڼه کې راغلي؛ د چین ولسي جمهوریت د بهرنیو چارو وزیر وانګ يي ژمنه وکړه، چې د افغانستان سیاسي او اقتصادي ملاتړ به روان ساتي او هڅه به کوي، چې د زراعتي محصولاتو او نورو افغان وارداتو په برخه کې شته خنډونه له منځه یوسي.

دغه راز وانګ يي زیاته کړې، چې د افغانستان د ښه ګاونډي په حیث به چین د افغانستان په اقتصادي وده کې هېڅ راز همکارۍ ونه‌سپموي.

ویل کیږي، چې پاکستان، افغانستان او چین د یوې درې اړخیزې غیر رسمي ناستې په بهیر کې د سوداګرۍ پر زیاتوالي، افغانستان ته د چین-پاکستان اقتصادي دهلیز (CPEC) غځولو او سوداګرو ته د صادراتي آسانتیاوو د رامنځته کولو هوکړه هم شوې ده.

د چین، پاکستان او افغانستان بهرنیو چارو وزیرانو هوکړه کړې، چې د یو کمربند او لارې نوښت (BRI) په اړه پر همکارۍ سربېره افغانستان ته به د چین-پاکستان اقتصادي دهلیز (CPEC) هم وغځول شي.

د پاکستان بهرنیو چارو وزارت ویلي؛ د چین بهرنیو چارو وزیر وانګ یي او د افغانستان بهرنیو چارو وزارت چارسمبالي امیر خان متقي او د پاکستان بهرنیو چارو وزیر محمد اسحاق ډار په بیجینګ کې یوه غیر رسمي درې اړخیزه غونډه کړې ده.

 دغه راز زیاته شوې، چې په دې درې اړخیزه ناسته کې د سیمه‌ییز امنیت، اقتصادي اړیکو، درې اړخیزه همکارۍ او له ترهګرۍ سره د مبارزې د ګډو ژمنو په اړه خبرې شوې دی.

ویل کیږي، چې پر یو مناسب مهال به په کابل کې د دې هېوادونو د بهرنیو چارو وزیرانو شپږمه درې اړخیزه غونډه هم جوړه شي.