Connect with us

تازه خبرونه

انټوني بلینکن د غني له یوې وروستۍ ټیلیفوني اړیکې پرده پورته کړه

Published

 on

(Last Updated On: لړم ۱۰, ۱۴۰۰)

انټوني بلینکن په یوه نوې مرکه کې ويلي؛ یوه ورځ مخکې له دې، چې اسلامي امارت کابل ته دننه شي اشرف غني ورته په ټیلیفوني خبرو کې په سوله ییزه توګه د واک سپارلو ډاد ورکړی و.

نوموړي زیاته کړې: اشرف غني ورته ویلي وه، چې د دوحې له تړون څخه د اسلامي امارت د سرغړونې په صورت کې به تر خپلې وروستۍ سلګۍ جګړه وکړي؛ خو په سبا یې د ژمنې له عملي کولو پرته له افغانستان څخه وتښتید.

د طالبانو په مشرۍ د اسلامي امارت د نوي حکومت له کار څخه څه باندې دوه میاشتې تیریږي؛ خو تر اوسه د دغې پوښتنې ځواب، چې د اشرف غني په مشرۍ پخوانی حکومت ولې په یوه ورځ کې رانسکور شو، نه دی موندل شوی.

د تېر نظام د ژر نسکوریدو پړه امریکا پر اشرف غني او د تېر حکومت چارواکي یې پر امریکا اچوي؛ خو د مسوولیت منلو ته یې تر دې دمه یو لوری هم  حاصر شوی ندی.

د امریکا د بهرنیو چارو وزیر انټوني بلینکن په خپله نوې مرکه کې د افغانستان د پخواني حکومت د ژر نسکوریدو پړه پر اشرف غني اچوي او له اشرف غني سره د وروستۍ ټیلفوني اړیکې جزییات داسې بیانوي: مونږ له سقوط څخه یوه ورځ مخکې له ولسمشر غني سره ټیلیفوني خبرې درلودې؛ مونږ فشار راوست، چې ډاډه شو. هغه چمتو و له هغه پلان سره سم، چې مونږ غوښتل عملي یې کړو؛ پرمخ ځي او د هغه له مخې به په سوله ییز توګه نوي حکومت ته، چې مشري به یې د طالبانو پرغاړه وي واک لیږدول کیږي، چې د هغه په رڼا کې به بیا ټولګډونه حکومت، چې د ټولنې ټول افغانان به په کې برخه لري رامنځته شي. هغه په ټیلیفون کې راته وویل، چې هغه دې کار ته حاضر دی او که طالبان له پلان سره سم مخته لاړ نشي؛ نو حاضر دی، چې تر وروستۍ سلګۍ جګړه وکړي؛ خو په سبا یې وتښتید.

سره له دې، چې د امریکا پوځي چارواکي او سیاسي احزاب د امریکا له متحدینو سره یوځای له افغانستان څخه د امریکايي ځواکونو د وتلو پر کړنلارې نیوکه کوي او هغه په نړیواله کچه د امریکا د حیثیت ماته بولي؛ خو د امریکا د بهرنیو چارو وزیر په افغانستان کې خپله موخه، چې د بن لادن وژل ول ترلاسه او نه یې غوښتل نور په افغانستان کې پاتې شي.

امریکا همداراز د خپلو اتباعو او افغان همکارانو خوندي ایستلو ته ژمن پاتې شو؛ خو افغانستان ورسره مادي او معنوي زیان ولید. 

د امریکا بهرنیو چارو وزیر انټونی بلینکن وایي: مونږ له خپل ۷۰۰ کسیز ټیم سره یوځای د بهرنیو چارو په وزارت کې په اوونۍ کې ۲۴ ساعته کار کوو، د امریکايي وګړیو او افغان همکارانو د خوندي ایستلو بهیر هره ورځ روان دی او تر هغې، چې خپله ژمنه مو نه وي پوره کړي؛ خپلې هڅې به روانې ساتو.

امریکا او د پخواني حکومت چارواکي د رامنځته کېدونکي معنوي، اقتصادي او مالي ناورین له مسوولیته تېښتي؛ خو د افغانستان عام او خاص وګړي یې له ستونزو سره مخ کړي دي. په داسې حال کې، چې  د افغانستان د خلکو لپاره دا مهمه نده، چې په هېواد کې د روان ناورین مسوول امریکایان دي که د تېر حکومت چارواک اشرف غني. هغه څه، چې اوس د افغانستان د خلکو لپاره پر هیلې بدل شوي د افغانستان په نوم هېواد کې د ژوندي پاتې کیدو لپاره د یوې مړۍ ډوډۍ موندل دي او بس.

ــــــــ

کمپاین- مرستې ته سترګې پر لاره!

د خپلو نغدي مرستو لپاره لاندې اوبپاڼې ته ورشئ:

www.helpafg.org

آریانا نیوز او آریانا نړیوالې ټلویزیوني شبکې؛ د بیات بنیاد له دې نوښته، چې په افغانستان کې اړمنو کورنیو ته د خوراکي توکو د برابرولو لپاره بسپنې راټولوي، هر اړخیز ملاتړ کوي.

مونږ د بیات بنیاد د رسنیز همکار په توګه له تاسې د مرستې غوښتنه کوو، چې دا بنسټ وکولی شي په دې سخت وخت کې د افغان اړمنو کورنیو ته خواړه چمتو کړي.

که له کومې ستونزې سره مخ شوئ پر لاندې برښنا لیک اړیکې ونیسئ:

info@bayatfoundation.org

تازه خبرونه

افغان بیسیم د کونړ په چغان کې 3G خدمتونه فعال کړل

Published

on

(Last Updated On: وری ۸, ۱۴۰۲)

چغان د کونړ د مرکز یوه لرې پرته سیمه ده، چې خلک یې د افغان بیسیم له 3G انترنیتي خدمتونو برخمن شول.

چارواکي وايي، د دغو خدمتونو له پيلېدو سره به د چغان تر څنګ يو ​​شمېر سيمې او ولسوالۍ هم له دغو خدمتونو برخمنې شي.

د کونړ د مخابراتو رییس سجاد وايي: د چغان په یوه لوړ ځای کې د افغان بیسیم سایت پرانیستل شو. دا یو ډېر ښکلی ځای دی. دا په مرکز پورې اړه لري او د مرورې ولسوالۍ او وټه پور ولسوالۍ ځینې سیمې یې هم  پوښلي. مونږ د افغان بیسیم شرکت څخه مننه کوو.

په کونړ کې د اترا دفتر مشر اعجازالحق یوسفزی وايي: په پام کې ده، چې د کونړ ټولو ولسوالیو ته د مخابراتي خدمتونو د وړاندې کولو پروګرام وغزیږي.

د کونړ سیمه ییز چارواکي په دغه ولایت کې د افغان بیسیم مخابراتي شبکې د مخابراتي او انترنیتي خدمتونو د وړاندې کولو له کبله خوښي څرګندوي او وايي، چې د دې شبکې خدمات په کونړ ولایت کې پوره معیاري دي.

د کونړ والي احمد طحه وايي: له هر څه لومړی د افغان بیسیم له کارکوونکیو څخه مننه کوو، چې د کونړ خلکو ته یې دا خدمات وړاندې کړ. مونږ له ټولو شرکتونو او بنسټونو غواړو، چې د کونړ غرني ولایت ته دا ډول خدمات وړاندې کړي.

د کونړ والي مرستیال عبدالله حقاني وايي: کونړ یو غرنی ولایت دی. د ستنو شمېر بسنه نه‌کوي. زمونږ هیله دا ده، چې د خلکو ستونزې اوارې کړو او اسانتیا رامنځته کړو.

ځايي اوسیدونکي د افغان بیسيم شبکې له دغه کار څخه خوښي څرګندوي او غواړي، چې د دغه ولايت په ټولو لرې پرتو سيمو کې خلکو ته مخابراتي خدمات وړاندې شي.

د کونړ ولایت یو اوسیدونکی حیات الله نومی وايي: د دې سایت پرانیستل د دغو دوه ولسونو لپاره لویه لاسته راوړنه ده. له دې سره دغه دوه درې له مرکز سره ونښلول شوې. هغه ستونزې، چې پخوا خلک ورسره مخ ول، اوس حل شوې دي.

په ختیځ زون کې د افغان بیسیم مخابراتي شبکې مسوولین د کونړ خلکو ته ډاډ ورکوي، چې دغه شرکت به د دغه ولایت ټولو لرې پرتو سیمو ته مخابراتي خدمات وړاندې کړي.

په ختیځ زون کې د افغان بیسیم مخابراتي شبکې مشر عطاالله ساحل وايي: دا سایت د دانګام، غازي‌آباد، ناړۍ، وټه‌پور او تر نورستان پورې د دغو دوه درو لپاره مهم رول لوبوي. که دا سایت  نه وي؛ نور سایتونه نشي کولی دا خدمتونه وړاندې کړي.

دا په داسې حال کې ده، چې افغان بیسیم شبکې د امنیت له رامنځته کېدو سره نه یوازې په ختیځ زون کې خپل مخابراتي خدمتونه پراخ کړي، بلکې په دې وروستیو کې یې دغې شبکې د دغه زون ډېرې لرې پرتې سیمې د 3G او 4G انترنیتي خدمتونو تر پوښښ لاندې راوستې دي.

Continue Reading

تازه خبرونه

د امریکا ولسي جرګې له افغانستان څخه د بې مسوولیته وتلو د اسنادو احضاریه لاسلیک کړه

Published

on

(Last Updated On: وری ۸, ۱۴۰۲)

د امریکا ولسي جرګې د بهرنیو اړیکو کمیتې مشر د دوشنبې پر ورځ هغه فرعي غوښتنه لاسلیک کړه، چې پر بنسټ به یې د امریکا بهرنیو چارو وزارت له افغانستان څخه د ځواکونو د وتلو په اړه اسناد وړاندې کړي.

مایکل مک کاول د امریکا د ولسمشر جو بایدن د ولسمشرۍ پر مهال له افغانستان څخه د بې مسوولیته وتلو او له همغه وخته د رامنځته شویو پېښو په اړه څېړنې پیل کړې دي.

د رویترز د څرګندونو له مخې؛ جمهوري غوښتونکي او ځینې دیموکراتان وايي، چې هیڅکله د بې مسوولیته وتلو او دا، چې د کابل په هوايي ډګر کې ۱۳ امریکايي پوځیان ووژل شول؛ بشپړ حساب ورکړ شوی ندی.

مک کاول د بهرنیو چارو وزارت ته د دوشنبې تر ورځې وخت ورکړی و، چې اسناد چمتو او وړاندې کړي.

مک کاول په ډاګه کړې؛ له بده مرغه د بهرنیو چارو وزیر انتونیو بلینکن له ځواب ورکولو ډډه وکړه او زه یې دې ته اړ کړم، چې د دې کمیتې د رییس په توګه خپله لومړۍ فرعي غوښتنه او احضاریه صادره کړم.

هغه ویلي، چې دغه احضاریه به د سې شنبې پر سهار وسپارل شي.

وال ستریت ژورنال په ۲۰۲۱ ز. کال کې په ډاګه کړې وه، چې په افغانستان کې شاوخوا دوه‌ویشت امریکایي دیپلوماتانو د یوه تش په نامه مخالف له لارې بلینکن ته د ۲۰۲۱ کال د جولای په میاشت کې د طالبانو لاس ته د کابل د احتمالي سقوط خبرداری ورکړی و.

بلینکن تېره اوونۍ د استماعیه ناسې په بهیر کې ویلي وه، چې دې وزارت خپل څه نا څه معلومات وړاندې کړي او د نورو چمتو کولو لپاره کار کوي؛ خو ځینې ځانګړي معلومات او توضیحات شته، چې یوازې لوړ پوړیو چارواکو ته باید وړاندې شي. دا د هغه چا د هویت خوندي کول دي، چې مخالفت یې څرګند کړی و.

دا په داسې حال کې ده، چې د رویترز د څرګندونو له مخې؛ د بهرنیو چارو وزارت د ویاند ویدانت پاتل ویلي، چې دا زمونږ لپاره اړینه ده، چې د مخالف کانال بشپړتیا وساتو؛ خو مونږ چمتو یوو، چې اړوند معلومات د توجیهي ناستو یا نورو میکانیزمونو له لارې وړاندې کړو.

Continue Reading

تازه خبرونه

جاپان له افغانستان سره څه باندې ۲۱ میلیون دالر مرسته وکړه

Published

on

(Last Updated On: وری ۸, ۱۴۰۲)

د ملګرو ملتونو د ماشومانو وجهي صندوق (یونیسف) د جاپان هېواد لخوا افغانستان سره د روغتیا او پوهنې په برخو کې د ۲۱ اعشاریه ۶ میلیون دالرو پر ارزښت د مرستې ډاډ څرګند کړی دی.

یونیسف له افغانستان سره د روغتیا او پوهنې په برخو کې د جاپان له ملاتړه ستاینه کړې ده.

یونیسف پرون ( د وري ۶ / د مارچ ۲۶) په یوه راپور کې څرګنده کړې، چې له دغو مرستو څخه ۱۸ میلیون دالر به له ۱۸ میلیون څخه ډېرو افغان ماشومانو او میندو ته د واکسینو پر برابرولو او ۳ اعشاریه ۶ میلیون دالر به د افغانستان د دولتي ښوونځیو د بېخبناوو پر جوړولو ولګول شي.

د دغه راپور له مخې: هغه واکسینونه، چې ټاکل شوې په افغانستان کې د ماشومانو او میندو لپاره له دغې مرستې چمتو شي؛ د شري، روتا ویروس، تیتانوس، دیفتریا، پولیو، هپاتیت بی او داسې نور رانغاړي.

د ملګرو ملتونو د ماشومانو وجهي صندوق دا هم ویلي، چې دا مرستې له یونیسف سره په ۲۰۲۳ کال کې مرسته کوي، چې شاوخوا ۱۰ میلیون ماشومانو ته د پولیو واکسین چمتو شي.

خپاره شوي معلومات په ډاګه کوي، چې د دغو مرستو ۳ اعشاریه ۶ میلیون دالر به د یونیسف له لارې په ۲۰ ښوونځیو کې د ۵۰۰۰ ښځینه زده‌کوونکیو په ګډون ۱۰ زره زده‌کوونکیو ته د پاکو اوبو او روغتیا ساتنې په برخه کې ولګول شي.

Continue Reading

Trending

Copyright © 2022 Ariana News. All rights reserved!