د ریاست الوزراء اداري مرستیال ويلي، که څوک وغواړي زمونږ د هېواد په کورنیو چارو کې لاسوهنه وکړي؛ له افغانستان څخه دفاع مو شرعي او نړیوال حق دی.

عبدالسلام حنفي دغه څرګندونې په کابل کې د يوه سوداګريز کمپلکس د پرانيستې په مراسمو کې کړې دي.

نوموړي زیاته کړې: « که څوک د افغانستان په کورنیو چارو کې لاسوهنه وکړي؛ په هغه صورت کې له افغانستان څخه دفاع مو شرعي او نړیوال حق دی. که څوک مو پر ډبره ووهي؛ مونږ اړ یوو، که پر ډبره یې ونه‌شو وهلی پر لوري یې یوه لوټه غورځولی شو.”

حنفي یو ځل بیا د سیمې او نړۍ له هېوادونو سره پر تعامل او ښو اړیکو ټینګار وکړ او وایي، چې د ګاونډ هېوادونو تر منځ کړکېچ د هیچا پر ګټه ندی.

هغه زیاته کړې: « دا د هیڅ ګاونډ پر ګټه نده، چې تر منځ یې تاوتریخوالی وي. څومره، چې اړیکې ښې وي؛ هومره د ګاونډ هېوادونو پر ګټه وي. له همدې کبله د افغانستان اسلامي امارت تل له دې سوله‌ییز سیاست او دوستانه اړیکو ملاتړ کوي.»

نوموړی څرګندوي؛ « د نړۍ له هېوادونو سره د افغانستان اسلامي امارت تګلاره دا ده، چې مونږ له هر چا سره مثبت تعامل غواړو.»

اسلامي امارت د ملګرو ملتونو په امنیت شورا کې د پاکستان د استازي منیر اکرم هغه ادعاوې رد کړې،  چې ګواکې افغانستان د داعش ډلې لپاره د “د جذب مرکز” دی.

د اسلامي امارت د بهرنیو چارو وزارت په خپره شوې خبرپاڼه کې د نوموړي ادعاوې بې بنسټه یادې شوې او پر پاکستان تور ولګول شو، چې هڅه کوي له خپلو کورنیو مسایلو پام بلې خوا واړوي.

د بهرنیو چارو وزارت ټینګار کړی، چې د اسلامي امارت واک ته له رسیدو راپدېخوا په افغانستان کې د داعش او نورو افراطي ډلو د له منځه وړلو په برخه کې د پام وړ پرمختګ شوی دی.

د بهرنیو چارو وزارت ویلي، چې پاکستان دا تورونه له داخلي بې ثباتۍ څخه د پام اړولو لپاره د یوې وسیلې په توګه کاروي.

دې وزارت پر نړیواله ټولنه غږ کوي، چې په افغانستان کې شوي پرمختګونه ومني او په هېواد کې د تور لګولو څخه ډډه وکړي.

دا څرګندونې د دوشنبې پر ورځ د ملګرو ملتونو د امنیت شورا په غونډې رامنځته شوي اړ د داعش د ګواښ په اړه په کې بحث وشو.

د ترهګرۍ پر وړاندې د مبارزې لپاره د ملګرو ملتونو د عمومي منشي مرستیال ولادمیر ورونکوف ویلي، چې په افغانستان کې د داعش- خراسان ملاتړي “په اروپا کې د بریدونو پلانونه درلودل او په فعاله توګه هڅه کوله، چې د منځنۍ آسیا هېوادونو څخه کسان استخدام کړي.”

ورونکوف په تېرو شپږو میاشتو کې د نړیوال تروریزم وضعیت په اړه جزئیات وړاندې کړل او وایي، چې “په افغانستان کې داعش- خراسان اوس هم یو جدي ګواښ دی.”

په ملګرو ملتونو کې د روسیې سفیر هم په افغانستان کې د داعش- خراسان موضوع راپورته کړه او څرګندوي، چې ” په افغانستان کې پاتې امریکایي وسلو ته د داعش په څېر د ترهګرو ډلو لاسرسی د اندېښنې وړ دی.

افغانستان اوسمهال په ملګرو ملتونو کې استازی نلري او تل یې غوښتنه کړې، چې خپله څوکۍ اسلامي امارت ته وسپارل شي او ټینګار کوي، چې د اسلامي امارت له ګډون پرته د افغانستان یا د هغې د شاملولو په اړه هر ډول بحث بې معنا دی.

اسلامي امارت هم تل په افغانستان کې د داعش د فعالیت ادعاوې رد کړې او اعلان یې کړی، چې دا ډله له هېواد څخه له منځه وړل شوې ده.

دا په داسې حال کې ده، چې اسلامي امارت په افغانستان کې د پاتې شویو امریکايي وسلو په اړه اندېښنې بې بنسټه بللي او په وار وار یې ټینګار کړی، چې ټولې پاتې امریکايي وسلې او پوځي تجهیزات د حکومت په کنټرول کې دي او هیڅ ډله یا فرد ورته لاسرسی نلري.

د ملګرو ملتونو امنیت شورا غړو په یوه ناسته کې د داعش ډلې لخوا رامنځته شوي ګواښونه وڅېړل او د دې ډلې د فعالیتونو او تازه ځواکونو د جذب په  اړه یې خپلې اندېښنې څرګندې کړي.

د امریکا، روسیې او پاکستان استازو د داعش خراسان څانګې ګواښونه جدي وبلل او د دوی پر وړاندې یې د مبارزې غوښتنه وکړه.

له ترهګرۍ سره د مبارزې په برخه کې د ملګرو ملتونو د رییس دفتر د امنیت شورا په ناسته کې د خراسان څانګې داعش ډله د افغانستان او نړۍ لپاره یو لوی ګواښ یادکړی دی.

د ملګرو ملتونو ټولنې دې لوړ پوړي چارواکي زیاته کړې، چې افغانستان ته د تروریستي ډلو د سفرونو راپورونه شتون لري. 

له ترهګرۍ سره د مبارزې په برخه کې د ملګرو ملتونو د دفتر رییس ولادیمیر ایوانوویچ ورونکوف   ویلي: ” د خراسان داعش ډله افغانستان، سیمې او نړۍ ته ګواښونه پېښوي. سربېره پر دې په افغانستان کې دننه حملې، په اروپا کې داعشیان پر تروریستي بریدونو مرتکب شوي او هڅه کوي، چې د مرکزي آسیا څخه نوي کسان جذب کړي. همدا رنګه راپورنه شته، چې بهرنۍ ترهګرې ډلې افغانستان ته سفر کوي.”

د دې ناستې پر دوام امریکا هم په افغانستان او سیمه کې د داعش ډلې پر ځواکمن کېدو اندېښنې ښودلي دي.

د ملګرو ملتونو په امنیت شورا کې د امریکا استازې دوروټی شیا وایي: “هغه ډلې، چې له مرکزي آسیا څخه بهر له داعش سره تړاو لري؛ په ځانګړي توګه د داعش خراسان ډله هم یو نړیوال ګواښ ګڼل کیږي. مونږ په خراسان کې د داعش څانګې د وړتیا په اړه هم اندېښمن یوو، چې پلان جوړونه، بریدونه ترسره کول او همدارنګه د نويو کسانو د استخدام، دغه اندېښنې په ځانګړي ډول افغانستان او پاکستان په تړاو ډېرې شوې دي.”

په دې ناسته کې د پاکستان استازي هم په افغانستان کې د داعش شتون لوړ یاد کړ. 

په ملګرو ملتونو کې د پاکستان استازي منیر اکرم ویلي: ” دا مهال په افغانستان کې له ۲۰ څخه زیاتې ترهګرې ډلې فعالې دي او دا هېواد د داعش د تمویل، اسانتیا او تسهیلاتو او د جذب اصلي مرکز ګرځېدلی دی. له همدې کبله، زه غواړم بیا تکرار کړم، چې افغانستان د داعش لپاره د جلب او جذب اصلي مرکز ګرځېدلی او مونږ هغه ادعا ردوو، چې داعش په پاکستان کې پټن ځایونه لري. مونږ همدا اوس له داعش او ټی ټي پي سره په جګړه کې ښکېل یوو.”

د ملګرو ملتونو ر امنیت شورا په ناسته کې د روسیې سفیر ویلي، چې په افغانستان کې د داعش شتون او فعالیت تصادفي ندی. د امریکا هغه وسلې، چې په افغانستان کې پاتې دي د داعش لاس ته لوېدلې دي.

په ملګرو ملتونو کې د روسیې سفیر واسیلی نبنزیا ویلي: ” مونږ نشو کولی، چې په افغانستان کې د داعش فعالیت او حضور نالیدلی ونیسو. دا یو تصادف ندی. ناټو ځواکونو، چې افغانستان په ناڅاپي ډول پرېښود ډېری وسلې یې هلته پرېښودي؛ نو دا وسلې د داعش او نورو ډلو لاس ته لویدلي.”

په ملګرو ملتونو کې د چین استازی فو کانګ وایي: ” ترهګرې ډلې لکه داعش او القاعده اوسمهال په افغانستان کې ډېر فعال دي او له یو بل سره همکاري کوي. دوی غواړي، چې په افغانستان کې امنیتي وضعیت کمزوری کړي، بلکې سیمه‌ییزې او نړیواله سوله او امنیت له خطر سره مخ کړي. د چین حکومت غواړي، چې په افغانستان کې د ټولو ترهګرو ډلو له منځه وړلو لپاره محسوس او پلي کېدونکي اقدامات وکړي.

اسلامي امارت تل ټینګار کړی، چې افغانستان خاوره د هیڅ هېواد لپاره ګواښ ندی او زیاتوي، چې په سیمه کې د دې ډلې فعالیتونه په افغانستان پورې تړاو ن‌لري.