نړۍ
بایډن امریکا ته د روسیې د تیلو او ګازو پر واردولو بندیز ولګاوه
د امریکا ولسمشر جو بایډن د سې شنبې پر ورځ پر اوکراین د روسیې د برید په غبرګون کې د روسیې د تېلو او ګازو پر وارداتو بندیز ولګاوه؛ که څه هم ورسره نرخونه لوړ هم شول.
رویټرز راپور ورکړی، چې بایډن په خپله ټلویزیوني وینا کې څرګنده کړې: مونږ د روسیې د تېلو او ګازو ټول واردات منع او اقتصادي شیریان یې پرې کوو.
بایډن ژمنه کړې، چې امریکایي عسکر به اوکراین ته د جګړې لپاره نه ځي؛ خو نوموړي د اوکراین د خلکو لپاره نه یوازې د امریکا د ملاتړ غوښتنه وکړه، بلکې د اوکراینیانو د بري غږ یې هم پورته کړ.
بایډن له وینا وروسته د بندیز په اړه خپل اجرائیوي فرمان لاسلیک کړ.
د رویټرز د راپور له مخې، بندیز سمدلاسه پلي کیږي؛ خو پیرودونکيو ته ۴۵ ورځې وخت ورکوي، چې شته تړونونه پای ته ورسوي.
بایډن ویلي، چې د امریکا او د متحدینو بندیزونه د روسیې اقتصاد زیانمن کړی او دا ژمنه یې هم وکړه، چې د جګړې د مخنیوي لپاره پر مسکو فشارونه او بندیزونه؛ ځکه روان ساتي، چې له ۲ میلیون ډېر خلک یې له هېواده تېښتې ته اړ کړي دي.
د یادونې ده، چې بایډن د اوکراین لپاره د ۱۲ میلیارډو ډالرو مرستې د تصویبولو غوښتنه هم کړې ده.
