په ملګرو ملتونو کې د عربي متحده اماراتو سفیره او د امنیت شورا د اوسني پړاو مشرې یوې خبري غونډې ته ویلي؛ ټاکل شوې، چې د افغانستان په اړه د امنیت شورا غونډه د غبرګولی پر ۳۱ / د جون پر ۲۱ نېټه جوړه شي.

د امنیت شورا د اوسني پړاو مشره لانا نصیبه وايي؛ افغانستان د ملګرو ملتونو د امنیت شورا د اجندا په سر کې ځای لري.

په ملګرو ملتونو کې د عربي متحده اماراتو سفیره او د امنیت شورا د اوسني پړاو رییسه لانا نصیبه وایي:

مونږ به د جون پر ۲۱ نېټه د افغانستان په اړه یوه غونډه ولرو. د مارچ په میاشت کې مو د افغانستان په اړه ډېرې غونډې درلودې. زمونږ د شورا اصلي موضوع افغانستان دی. زمونږ دنده د افغانستان د وضعیت ارزونه ده. زموږ تمرکز ډېر پر افغانستان دی او مونږ غواړو په افغانستان کې د ښځو د حقونو پر وضعیت کار وکړو، چې کړکېچن حالت لري.

نوموړې ټینګار کوي، چې عربي متحده امارات به د دغې شورا د غړي او د اوسني پړاو د مشر په توګه د افغانستان د قضیې په اړه د غړیو هېوادونو د همغږۍ د ساتلو هڅه وکړي.

لانا نصیبه ټینګار کوي، چې د افغانستان په چارو کې د ملګرو ملتونو ځانګړی همغږي کوونکي فریدون اوغلو به په نومبر میاشت کې د دغه هېواد د وضعیت په اړه امنیت شورا ته د بیاکتنې بشپړ راپور وړاندې کړي.

دغه ترکی دیپلومات یوه میاشت مخکې په افغانستان کې د ملګرو ملتونو د ځانګړي همغږي کوونکي په توګه ټاکل شوی دی.

د راپورونو پر بنسټ، په پام کې ده، چې د دې غونډې یوه مهمه موضوع به په افغانستان کې د ښځو له حقونو څخه سرغړونې وي.

له دې مخکې ملګرو ملتونو په دوحه کې د افغانستان په اړه د تړلو دروازو ترشاه غونډه کړې؛ خو داسې انګېرل کېږي، چې د افغانستان په اړه د ملګرو ملتونو غونډې کومې پایلې ته رسېدلي نه‌دي.

دا په داسې حال کې ده، چې فاکس نیوز د جمعې پر ورځ څرګنده کړې؛ څو امریکايي سناتورانو په افغانستان کې د بشري حقونو د مسلې په اړه د اسلامي امارت پر ضد د نویو بندیزونو لګولو طرحه وړاندې کړې ده.

د پاکستان د کورنیو چارو وزیر رانا ثناء الله یو ځل بیا ادعا کړې، چې تحریک طالبان پاکستان د افغانستان له خاورې د پاکستان پر ضد بریدونه کوي.

د تحریک طالبان پاکستان فعالیت ظاهراً د اسلام‌آباد لپاره یوه لویه ستونزه ګرځېدلې ده.

له همدې کبله کله، چې د دغې ډلې د فعالیت خبره راپورته کېږي؛ پاکستاني چارواکي د تور ګوته کابل ته نیسي او وايي، چې دغه ډله له افغانستان څخه د پاکستان پر ضد بریدونه کوي.

د پاکستان د کورنیو چارو وزیر راناثناءالله ویلي: د افغان حکومت دریځ دا دی، چې مونږ د پاکستاني حکومت پر ضد د تحریک طالبان پاکستان ملاتړ نه‌کوو؛ خو په اړه یې شکایتونه لرو. د دې ډلې کسان له افغانستان څخه پاکستان ته ننوځي. نږدې دوه میاشتې وړاندې یې مونږ ته وویل، چې مونږ به دوی له  پولې څخه لرې انتقال کړو، چې پر پاکستان برید ته لاس رسی ونه‌لري.

اسلامي امارت د پاکستان د کورنیو چارو د وزیر د دغو نویو څرګندونو په اړه څه نه‌دي ویلي؛ خو له دې وړاندې یې په افغانستان کې د پاکستانيو طالبانو شتون او فعالیت رد کړی دی.

اسلامي امارت په وار وار ټینګار کړی؛ هیچا ته به اجازه ورنه‌کړي، چې د افغانستان خاوره د نورو هېوادونو پر ضد ورکاروي.

 دا په داسې حال کې ده، چې د افغانستان د بهرنیو چارو وزیر امیر خان متقي په مشرۍ د اسلامي امارت یو لوړ پوړي پلاوي څه باندې یوه میاشت مخکې پاکستان ته تللی و او په اسلام‌آباد کې یې د دغه هېواد له چارواکو سره په لیدنه کې پر سولې، دیپلوماتیکو اړیکو او د دوه اړخیزو همکاریو پر پراخولو ټینګار کړی و.

د ایران د بهرنیو چارو وزیر ویلي، تهران له اسلامي امارت سره د اوبو د حق په اړه د ډاډ وړ خبرې کړې دي.

حسین امیر عبداللهیان د ایران دولتي رسنیو ته وویل: زمونږ د خبرو موضوع د اوبو د حق ده او د [ایران] ولسمشر، حسن کاظمي قومي [ په افغانستان کې د ایران سفیر] ته دنده سپارلې، چې دا موضوع داسې وڅاري، چې د دواړو هېوادونو ترمنځ په مستقیم ډول پرمخ ولاړه شي.

نوموړي د وروستۍ سرحدي نښتې په اړه وویل، چې دا نښته پې پلانه وه او د افغانستان وضعیت د ایران لپاره د پوهېدو وړ دی.

د ایران او افغانستان ترمنځ کړکېچ له هغې وروسته زیات شو، چې تهران کابل د اوبو پر بندولو تورن کړ.

د دواړو هېوادونو تر منځ تاو تریخوالی تېره میاشت له هغې وروسته پیل شو، چې د ایران ولسمشر ابراهیم رییسي ګواښ وکړ، چې اسلامي امارت باید د هلمند سیند په اړه د ایران د اوبو حق ته درناوی وکړي او که نه بیا دې ګیله نه‌کوي.

د اسلامي امارت چارواکو ټینګار کړی، چې د ایران او افغانستان ترمنځ د ۱۳۵۱ لمریز لېږدیز / ۱۹۷۳ ز. کال د اوبو تړون ته ژمن دي؛ خو د وچکالۍ له کبله دمګړۍ د اوبو له کمښت سره مخ یوو.