نن ( چارشنبه د وږي اته‌ویشتمه / د سپټمبر اتلسمه ) د ازبکستان د فوټبال نړیوال جام سیالیو پر پېنځمه ورځ افغانستان په C ګروپ کې له ارجنټاین سره لوبه کوي.

دا لوبه به د کابل پر وخت د ماښام پر ۷:۰۰ بجو د تاشکند په همو آرینا کې پیل شي.

په داسې حال کې، چې دواړو لوبډلو په خپلو لومړنیو سیالیو کې خپلو سیالانو ته ماتې ورکړي؛ تاریخ د ارجنټاین په ګټه دی، چې د نړۍ پر کچه پېنځم ځای لري، خو د افغانستان ملاتړي افغان لوبډله خوښوي، چې په دېرشم مقام کې ده.

افغان مینه‌وال، چې د دې لوبې لپاره تاشکند ته روان شوي؛ ترې د اور لوبې او ګل اچونې تمه کیږي، ځکه دواړه لوبډلې د بریا لپاره لوبه کوي.

افغان لوبغاړی اکبر کاظمي له لوبې مخکې په خبرو کې ویلي:  فکر کوم، چې دا به د ملاتړو لپاره ډېره زړه‌راکښونکې ننداره وي. ډېرې موخې به ولري.

مونږ غواړو ښکلي فوټسال ولوبوو او ارجنټاین هم همدارنګه. مونږ به پوره هڅې وکړو؛ ځکه، چې غواړو د خپل ګروپ لومړی ځای خپل کړو.

دغه راز ټاکل شوې، چې د چارشنبې پر ورځ انګولا - اوکراین، لیبیا - قزاقستان او اسپانیا د نیوزیلینډ پر وړاندې لوبې وکړي.

هغه افغان مینه‌وال، چې نشي کولی د نن شپې لوبه حضوري وویني؛ کولی شي د لوبې د لیدو لپاره آریانا ټلویزیون وګوري.

اریانا ټلویزیوني شبکه د دې نړیوال جام رسمي خپرونکې ده او هره ورځ دا لوبې پر ژوندۍ بڼه خپروي.

د افغانستان کرکټ ملي لوبډله د چارشنبې پر ورځ د متحده عربي اماراتو په شارجه لوبغالي کې له جنوبي افریقا سره درې یو ورځنۍ نړیوالې لوبې کوي.

ټاکل شوې دغه لوبه د کابل پر وخت مازیګر څلور بجې د شارجې په لوبغالي کې ترسره شي.

افغانستان او سویلي افریقا له دې مخکې پېنځه ځلې له یو بل سره مخ شوي دي؛ دوه ځله د یو ورځنیو نړیوالو سیالیو (۵۰ اوره) او درې ځله په ۲۰ اوره سیالیو کې سره مخ شوي، چې په دې ټولو لوبو کې ​​سویلي افریقا مخکښه پاتې شوې ده.

افغانستان، چې په ۲۰۱۷ کال کې د کرکټ نړیوالې شورا (ICC) بشپړ غړیتوب ترلاسه کړ؛ په سپین بال ټیسټ لوبو کې له هند او سویلي افریقا پرته نورو ټولو ته یې ماتې ورکړې ده.

د سویلي افریقا کرکټ لوبغاړي لونګي نګدي د دوشنبې پر ورځ ویلي، چې افغانان په همدې خاطر د پام وړ دي.

نګيدي ویلي، د کرکټ لوبډلې نظر یوازې د هغه څه پر بنسټ دی، چې خلک یې فکر کوي؛ خو دا تل رښتیا نه‌وي.

هغه زیاته کړې: د افغانستان د لوبې په اړه د هر چا نظر پر مونږ اغېز نکوي؛ ځکه، چې مونږ ولیدل چې د نورو نړیوالو لوبډلو پر وړاندې څه کولی شي.

هغه وایي: مونږ د لوبو دغه لړۍ ساده نه بولو. دوی د نړۍ پر کچه کرکټ لوبغاړي او د سیالیو ګټونکي لري او پخپل وخت کولی شي د نړۍ غوره لوبډلې ماتې کړي.

دې لوبغاړي زیاته کړې: مونږ  دا پېښه لیدلې؛ ځکه، نو فکر نه کوم، چې څوک به دوی ته د کمزوري پر سترګه وګوري. مونږ یقینا پوهیږو، چې مونږ څه کوو.

باید وویل شي، چې د دې هېواد د کرکټ ستوری راشد خان ارمان به په دغو درې یو ورځنیو نړیوالو سیالیو کې ګګډون ولري؛ ځکه هغه ټپ یې رغېدلی، چې له کبله یې د نیوزیلینډ پر وړاندې له ټیسټ لوبوبې برخې پاتې شو.

د يادونې ده، چې د دې سياليو لومړۍ لوبه به سبا ترسره شي، دوه‌يمه او درېيمه لوبه به پر ترتيب د وږي پر دېرشمه او د تلې پر لومړۍ نېټه ترسره شي.

له دې مخکې د افغانستان کرکټ بورډ د دغو لوبو لپاره د ملي لوبډلې د ۱۷ لوبغاړو نوملړ اعلان کړی دی.

د دغه نوملړ له مخې، ابراهیم ځدراڼ او مجیب الرحمن د ټپي کېدو له کبله په دې سیالیو کې ګډون نشي کولی.

د افغانستان د ملي لوبډلې مشري به حشمت الله شهیدي کوي.

د يادونې ده، چې د هېواد ملي لوبډله د سويلي افريقا او هند لوبډلو ته پر ماتې ورکولو بريالۍ شوې نده.

فوټسال په تېرو څو لسیزو کې له نړیوال شهرته برخمن شوی او د یوې سرچینې د اټکل له مخې په ټوله نړۍ کې ۱۲ میلیون لوبغاړي دا لوبه ترسره کوي.

د دې لوبې اسانه ترسره کېدا او د لاسرسي ښه‌والي د فوټسال د روزونکیو لپاره یوه لازمي سرچینه ګرځیدلې، چې موخه یې د لوبغاړو وده او بریا ده؛ خو د فوټسال مقررات پیچلي دي - په ځانګړي توګه هغه، چې د فیفا په سږني فوټسال نړیوال جام لپاره پلي کیږي.

دلته هغه څه دي، چې تاسې ورته اړتیا لرئ او باید پرې پوه شئ.

یوه لوبه ۴۰ دقیقې غځیوي. دا په حقیقت کې ۴۰ دقیقې توپ په لوبه کې وي؛ ځکه کله، چې غږ پورته کیږي – کله، چې توپ له ډګره وځي تېروتنه اعلانیږي - وخت ساتونکي ساعت بندوي، چې لوبه بیا پیل شي.

دوه ۲۰ دقیقې نیمه پر ۱۵ دقیقو ځنډ وېشل کیږيي. که د غوراوي پړاو لوبه له ۴۰ دقیقو وروسته مساوي شي؛ د اضافي وخت دوه پېنځه دقیقې دورې به ترسره شي.

لوبډلې

د ازبکستان ۲۰۲۴ لوبډلې ۱۴ لوبغاړي لري. هره لوبډله په یو وخت کې پېنځه لوبغاړي لري؛ څلور ډګرني لوبغاړي او یو ور یا ګول ساتونکی دی؛ خو که ایستل شوي نه‌وي.

بدیلونه

روزونکي کولی شي لامحدود بدیلونه رامنځته کړي. لوبغاړی څو ځله بدلیدلی شي؛ د لوبغاړي د بدلیدنې لپاره هیڅ محدودیت نشته.

د څلور ثانیې قاعده یا قانون

یو ور ساتونکی باید توپ په خپله نیمه کې له څلور ثانیو ډېر ونه ساتي او باید خوشې یې کړي. که هغه دا کار ونکړي؛ سیالې لوبډلې ته به یوه غیر مستقیمه توپ‌وهنه وبښي. دا توپ‌وهنه د کارنر په ګډون هم باید په څلور ثانیو کې تر سره شي کنه سیاله لوبډله به له غیر مستقیمې ازادې توپ‌وهنه برخمنه شي.

ګول ساتونکي پخپل واک کې لري

یو ځل، چې ورساتونکي په خپله نیمه کې توپ لمس کړ؛ تر هغې، چې سیال د توپ مالکیت ونلري؛ اجازه نه ورکول کیږي، چې بیا په خپله نیمه کې دننه هغه لمس کړي.

توپ‌وهل

هیڅ توپ‌وهنه نشته. کله، چې توپ له کرښې ونه‌وځي یا کارنر نه‌وي توپ باید بېرته دننه شي.

راټول شوي فولونه یا تېروتنې

کله، چې یوې لوبډلې په یوه نیمه کې پېنځه تېروتنې یا فولونه کړي وي؛ هر ورپسې فول یا تېروتنه به د دوی سیال ته د دوه‌یمې پینالټۍ له ځای څخه ( ۱۰ مټرۍ) د سیالې لوبډلې د ور پر لوري پرته له خڼده توپ وهنه تر سره کوي. که تېروتنه یا فول ور یا ګول ته نږدې رامنځته شوې وي؛ کولی شي له همغه ځایه ووهل شي چېرته، چې رامنځته شوې ده. د لومړۍ نیمه تېروتنه یا فول په نیمه لومړۍ کې پاکیږي؛ خو د دوه‌یمې نیمې تېروتنې یه فول د اړتیا له مخې په اضافي وخت کې ترسره کیږي.

سره کارتونه

لوبغاړي د دوه ژیړو کارتونو یا مستقیم سور کارت له ډګره ایستل کیږي. بیا د دوی لوبډله یوازې له څلور لوبغاړو سره لوبه کوي تر هغې، چې سیال ګول ته ورسیوي یا دوه دقیقې لپاره. که سیال ګول ووهي، یا یو ځل دوه دقیقې پوره شي که نه، یو بدیل لیږل کیدی شي. ایستل شوي لوبغاړي لوبې ته د داخلېدو اجازه اجازه نلري.

چټک ورساتونکي یا ګول کیپران

چټک ورساتونکی هغه وخت وي، چې د ورساتنې لوبغاړی لنډمهاله راودانکي او د ورساتونکي دنده پرغاړه واخلي. دا کار هغه وخت ترسره کېدی شي، چې یوه لوبډله وروسته پاتې وي او هڅه کوي په برید کې له سیالې ډلې مخکې شي. یو چټک ورساتونکی باید تر شا د ورساتونکې جامې پخپل نمبر ولري.

ټایم اوټونه یا وخت تېرونه

هر مشر روزونکي یو ټایم اوټ لري، چې له کبله یې ۶۰ ثانیې لوبه له خپلو لوبغاړو سره د خبرو لپاره درولی شي. یو مشر روزونکی کولی شي یوازې هغه وخت ټایم اوټ اعلان کړي، چې توپ له لوبې ووځي او لوبډله یې بیا پیل کړي. په اضافي وخت کې ټایم اوټ نه وي.

د پینالټۍ وهل

که د ناک آوټ پړاو لوبه د اضافي وخت وروسته مساوي شي؛ د پینالټي وهل پایله ټاکي. هره هغه لوبډله، چې وروسته له پېنځه پینالټۍ مخکښه شي؛ ډګر ته ځي. که له پېنځه پینالټۍ وروسته بیا هم لوبډلې مساوي شي کچه وي، ناڅاپي مرګ به رامنځته شي. هغه لوبغاړي، چې ټپي شوي یا له لوبې څخه وتلي وي د پینالټۍ اجازه نلري.

لوبغاړي اجازه لري، چې د پینالټۍ په بهیر کې د ورساتونکي دنده تر سره کړي. لوبډلو ته اجازه ورکول کیږي، چې د پینالټۍ پرمهال خپل ورساتونکي بدل کړي.