تازه خبرونه
ترکمنستان د افغانستان د ریل پټلۍ د کارکوونکیو د وړتیا لوړولو لپاره سکالرشیپونه ځانګړي کړل
د ترکمنستان سفیر خواجه عوض اوف ویلي، عشق آباد د افغانستان د ریل پټلۍ د کارکوونکیو د وړتیالوړولو لپاره ۲۸ سکالرشیپونه ځانګړي کړي دي.
هغه زياته کړې؛ د دغو سکالرشیپونو اسناد يې د افغانستان د اوسپنې پټلۍ مشر بخت الرحمن شرف ته وړاندې کړي دي.
ټاکل شوې، چې دغه کارکوونکي به د څلور میاشتو لپاره په ترکمنستان کې د ریل پټلۍ د اړوند بېلابېلو برخو زدکړې وکړي.
نوموړي پرته له دې، چې د اسلامي امارت پر رسميت پيژندلو ټینګار وکړي وایي، چې په عشق آباد کې د افغانستان له نوي حکومت سره نږدې همکاریو ته چمتو دي.
دا په داسې حال کې ده، چې د ترکمنستان ولسمشر قربانقلي بردي محمدوف په افغانستان کې له نویو پرمختګونو وروسته په خپله لومړنۍ وینا کې ویلي، چې هېواد یې له اسلامي امارت سره نږدې همکارۍ ته چمتو دی.