د کډوالو او راستنېدونکو چارو وزارت اعلان کړی، چې په تېرو ۱۵ ورځو کې ۱۵۳ زره ۹۳۱ افغان کډوال له پاکستان، ایران او ترکیې څخه هېواد ته راستانه شوي دي.

د دې وزارت ویاند عبدالمطلب حقاني د دوشنبې پر ورځ (د لړم نولسمه) آریانا نیوز ته ویلي، چې په تېرو څه نا څه دوه اوونیو کې ۲۶۰۴۴کورنۍ، چې ۱۳۶۱۶۹کسان کیږي؛ په خپله خوښه او جبري توګه له پاکستان، ایران او ترکیې څخه افغانستان ته راستانه شوي دي.

د نوموړي د څرګندونو له مخې؛ ۲۴۷۸۷کورنۍ له پاکستان څخه، ۱۲۵۱کورنۍ له ایران او ۶کورنۍ له ترکیې هېواد ته راستانه شوي دي.

حقاني زیاته کړې؛ پردې سربېره ۱۶۶۰۳کسان مجرد دي، چې هېواد ته جبري راایستل شوي او ۱۱۳۲نور د پاکستان له زندانونو څخه خوشې شوي دي.

د کډوالو چارو وزارت ویاند ویلي، چې اسلامي امارت راستنېدونکو کډوالو ته بنسټیز خدمات وړاندې کړي، چې په کې خواړه، څښاک، جامې، روغتیايي خدمات، وړیا سیم کارتونه، نغدې پیسې او د هغوی د لېږد لپاره ټرانسپورټ رانغاړي.

د ملګرو ملتونو پراختیایي پروګرام(یو‌ان‌‌ډي‌پي) ویلي؛ افغانستان اوس هم په نړۍ کې د انرژۍ له سختو بحرانونو سره مخ یو داسې هېواد دی، چې له ۸۰ سلنې څخه ډېر نفوس یې برښنا ته لاسرسی نلري.

یو‌ان‌‌ډي‌پي زیاته کړې؛ په کلیوالي سیمو کې ډېری کورنۍ اوس هم د پخلي او تودوخې لپاره پر لرګیو او جامدو سونګ توکو تکیه لري، چې د اندېښنې وړ روغتیایي، امنیتي او چاپېریالي خطرونه رامنځته کوي.

دې بنسټ په ټول هېواد کې د نوې کېدونکي انرژۍ له پراخولو سره دا خطرونه څه نا څه له بدلېدا سره مخ کړي دي.

دې ادارې ویلي “د لمریزو تختو او کوچنيو برښنایي شبکو پر نصبولو مو د یو شمېر ښوونځيو، روغتونونو او کار و باري ځایونو برښنا تأمین شوې؛ ځکه ټولنو ته رڼا، برښنا او نوي فرصتونه راوړو.”

له ۲۰۲۱ راپدېخوا د یو‌ان‌‌ډي‌پي پروګرامونو ۵ زره ۴۶۲روغتیایي مرکزونو، ۱۵۳ ښوونیزو بنسټونو او ۸۵۴ سوداګریزو مرکزونو په ګډون له ۶ زره ۴۶۹څخه ډېرو برښنایي مرکزونو ته، چې ډېری یې ښځې اداره کوي؛ برښنا رسولې ده. دې هڅو کورنیو او سوداګرۍ ته د بسپنو پر ورکولو او له مالي ادارو سره د کار کولو له لارې انرژي د لاسرسي وړ کړې ده.

د ملګرو ملتونو پراختیايي پروګرام (یو‌ان‌‌ډي‌پي) له دوه میلیون ډېرو افغان میرمنو ته پاکه، خوندي او دوامداره انرژۍ برابره، د ژوندانه کیفیت یې ښه کړی او د کورنیو او ټولنو لپاره یې روښانه راتلونکې رامنځته کړې ده.

د دې پروګرام کاري نوښت ښیي، چې نوې کېدونکې انرژي نه یوازې پر غیر صحي سونګ توکو تکیه کموي، بلکې له روغتیایي، ښوونیزو او روزنیزو اقتصادي سکټورونو ملاتړ کولی شي په افغانستان کې د ثبات او ودې لپاره هم زمینه  برابره کړي.

د ترکیې ولسمشر رجب طیب اردوغان څرګنده کړې؛ د ترکیې بهرنیو چارو او دفاع وزیران او د استخباراتو مشر روانه اوونۍ پاکستان ته سفر کوي، چې د اسلام‌آباد او کابل د اوربند په اړه ورسره بحث وکړي.

د اردوغان د څرګندونو له مخې؛ د دې درې اړخیز سفر هدف د دایمي اوربند وروستي کول او د اسلام‌آباد او کابل ترمنځ د سولې ډاډمنول دي.

د ترکیې ولسمشر زیاته کړې؛ هېواد یې په پاکستان کې ترهګریز بریدونه او د پاکستان او افغانستان ترمنځ کړکېچونه له نږدې څاري او هیله من دی، چې د ترکیې تر څارنې لاندې خبرې اترې به د دواړو هېوادونو تلپاتې ثبات ته ښې پایلې ولري.