تازه خبرونه
خلک دې د باختري خزانې له خوندیتوبه ډاډمن شي- وحید عمر
د عامه اړیکو او ستراتیژۍ په چارو کې د ولسمشر غني ستر سلاکار وحید عمر ویلي؛ د کابینې د پرېکړې پر بنسټ به له ملي شورا، مدني ټولنې او رسنیو وغوښتل شي، چې د سرو د زیرمو په ګډون له باختري خزانې لیدنه وکړي.
وحید عمر په خپل ټویټ کې زیاته کړې: دا خزانه د تاریخ له لوړو او ژورو خوندي پاتې ده او اوس هغه وخت رارسېدلیو چې زموږ خلک یې د ساتنې په اړه ډاډ ترلاسه کړي.
هغه زیاته کړې، چې پر پلان یې کار روان دی.
له دې مخکې د ولسي جرګې یو شمېر غړیو ویلي وه، چې د باختري خزانې په ګډون د سرو زیرمه خوندي نده او د خوندي ساتنې لپاره باید کوم بهرني هېواد ته امانت وسپارل شي.
دا په داسې حال کې ده، چې حکومت د ملي شورا د غړو دا څرګندونه له ملي ګټو سرغړونه بولي او د پارلمان له غړو یې وغوښتل، چې باید له مسوولیته دکې څرګندونې وکړي.