د راپورونو له مخې؛ د عمران خان زوی قاسم خان ویلي؛ هغه او ورور ته دې اجازه ورکړ شي، چې د پلار لیدو لپاره پاکستان ته سفر وکړي.

نوموړي د پلار روغتیايي وضعیت نازک بللی او څرګندوي، چې هغه د ۹۱۴ ورځو راپدېخوا په انفرادي بند کې دی.

په راپورونو کې راغلي؛ عمران خان د زندان له امنیت او خوراکي آسانتیاوو څخه راضي دی؛ خو ځان له پوره  روغتیایي آسانتیاوو بې برخې بولي.

دا په داسې حال کې ده، چې د پاکستان سترې محکمې د تحریک انصاف ګوند بنسټوال او پخواني لومړي وزیر عمران خان ته، چې په اډیاله زندان کې دی له خپلو شخصي ډاکټرانو سره د لیدنې او خپلو زامنو قاسم او سلیمان سره د ټیلیفوني خبرو اجازه  ورکړې ده.

په متحده عربي اماراتو کې د اسلامي امارت سفير بدرالدين حقاني په ابوظبۍ کې د اتحاد ملي هوايي شرکت له پلاوي سره، چې مشري يې راحيل صديق کوله؛ ليدنه وکړه.

په اماراتو کې د افغانستان سفارت د خبرپاڼې له مخې: په دې ليدنه کې د ابوظبۍ– کابل الوتنو د پيل په اړه، چې ټاکل شوې د مارچ پر ۲۸مه پيل شي؛ د الوتنو د مهالوېش، ټرانسپورټي آسانتياوو او د دواړو ښارونو ترمنځ د هوايي تګ راتګ په اړه بحث او د نظرونو تبادله وشوه.

د اتحاد شرکت مسوولانو ويلي؛ دا شرکت اوس د نړۍ ۹۹ ښارونو ته الوتنې لري او ټينګار يې کړی، چې د کابل– ابوظبۍ الوتنو پيل به د دواړو هېوادونو ترمنځ د اقتصادي او سوداګريزو اړيکو د پياوړتيا تر څنګ، له نړۍ سره د افغانستان د اړيکو په پراختيا کې هم اغېزمن رول ولوبوي.

ویل کیږي، چې بدرالدين حقاني د دغو الوتنو له پيل هرکلی وکړ او د مسافرو لپاره يې د هر اړخيزو آسانتياوو پر برابرولو ټينګار وکړ. نوموړي د ټکټونو د بيو او د سفر اړوند لګښتونو د کمولو په برخه کې د ځانګړې پاملرنې غوښتنه هم کړې ده.

رویټرز خبري سرچینې راپور ورکړی، چې د سپوږمکیو د وروستیو انځورونو له مخې؛ امریکايي ځواکونو له ایران سره د کړکېچ له زیاتېدا سره سم د منځني ختیځ په تر ټولو لویې اډې «العدید» کې «پاتریوت» توغندي پر هوايي دفاعي سیسټم نصب کړل، چې د احتمالي برید په صورت کې یې د  کارونې زمینه برابره وي.

دا پرېکړه ښيي، چې د دواړو هېوادونو ترمنځ د کړکېچ له زیاتېدا سره سم د نښتې خطر هم لوړ شوی دی.

د امریکا ولسمشر ډونالډ ټرمپ یو ځل بیا ګواښ کړی، چې که خبرې اترې ناکامې شي، پر ایران به پوځي برید وکړي.

دغه راز ایران هم خبرداری ورکړی، چې په منځني ختیځ کې به د امریکا ټولې اډې د احتمالي غچ اخیستونکو بریدونو هدف وګرځي.

د سپوږمکۍ انځورونه ښيي، چې په «العدید» اډه کې د پاتریوت توغندیو شاوخوا ۱۰ سیسټمونه پر درندو تاکتیکي لاریو ځای پر ځای شوي دي.

شنونکي وایي، دا کړنې د توغندیو تحرک زیاتوي او د چټک لېږد یا د دفاعي جوړښت د بدلون زمینه برابروي.

د سیمې له نورو اډو ترلاسه شوي ورته انځورونه هم د پوځي حضور زیاتوالی ښيي:

د اردن موفق سلطي اډه: ۱۷  F15-E جنګي الوتکې، ۸  A-10 جنګي الوتکې، ۴ C-130  ټرانسپورټي الوتکې او ۴ چورلکې؛ همداراز د اډې په بله برخه کې ۴ EA-18G  برښنايي جګړې الوتکې لیدل شوې دي.

د سعودي عربستان د شاهزاده سلطان اډه: یوه C-5 او یوه C-17 الوتکه؛ د تېر ډسمبر پر پرتله زیاتوالی ښيي.

په هند اقیانوس کې دیه‌ګو ګارسیا: د جنورۍ له پای ته رسېدو وروسته ۷ نورې الوتکې زیاتې شوې دي.

په عمان کې د دخان اډه: د فبرورۍ پر لسمه د جنورۍ د پېنځه‌ویشتمې پر پرتله د الوتکو شمېر زیات شوی دی.

ایران هم د تهران کرمانشاه، سمنان او د فارس خلیج ساحل ته نږدې تل‌توغندیزې اډې جوړې او د «شهید باقري» نومې الوتکه‌وړونکې بېړۍ یې بندرعباس ته نږدې ځای پر ځای کړي، چې خپل دفاعي چمتووالی زیات کړي.

دا وروستۍ پوځي هڅې په داسې حال کې، چې د واشنګټن او تهران ترمنځ کړکېچ د ایران د اټومي او توغندیزو پروګرامونو او د وسله‌والو ډلو له ملاتړ سره د تړاو له کبله زیات شوې دي.