Connect with us

تازه خبرونه

خلیلزاد د تاوتریخوالي پر کمولو او اوربند اعلانولو ټینګار څرګند کړ

خپور شوی

 په

(Last Updated On: ليندۍ ۳۰, ۱۳۹۹)

په افغانستان کې د سولې لپاره د امریکا ځانګړي استازي زلمي خلیلزاد د غزنې د پیښې له قربانیانو سره د خواخوږۍ څرګندولو تر څنګ یو ځل بیا له حکومت او طالبانو غوښتي، چې د افغانانو هیلو ته درناوی وکړي او جګړه ودروي.

د یادونې ده، چې اوړمه ورځ په غزني کې موټربم چاودنې د ۱۲ ماشومانو په ګډون ۱۵ ملکي وګړي وژلي دي.

خلیلزاد په یو لړ ټویټونو کې په ډاګه کړې؛ حکومت او طالبان باید د خپلو خلکو هیلو ته درناوی وکړي او ژر تر ژره سیاسي هوکړې ته ورسیږي.

هغه ډاډ ورکړی، چې په دې اړه امریکا د افغانستان له خلکو سره ولاړه ده.

هغه زیاته کړې؛ دواړه خواوې باید له نړیوال ملاتړه په هېواد کې د ناچاوده توکو او ماینونو خطراتو ته لاسرسی ومومي، چې د ماشومانو او لویانو ژوند خوندي شي.

دغه راز خليلزاد د تاوتريخوالي زياتوالی غندلې او هغه يې د سولې د بهیر شنډوونکی نومولی دی.

هغه پدې اړه څرګنده کړې: مونږ د روانې لوړې کچې لرونکی تاوتریخوالی غندو او ټول هغه کسان محکوموو، چې دغه راز خونړیو او له وحشته ډکو بریدونو ته اجازه ورکوي او یا یې ترسره کوي.

نوموړي څرګنده کړې؛ د دوی موخه له کرکې، جنګ او وحشته داده، چې د سولې، تاوتریخوالي کمولو او د هوسا افغانستان  غوښتونکي افغانان بېوسې کړي؛ دا دښمن باید رسوا او ورټل شي.

خلیلزاد زیاته کړې، چې په دې وروستیو کې د افغانانو په ځانګړي توګه د ملکي وګړیو وژنه خورا عامه شوې ده.

خلیلزاد دا هم ویلي، چې په هېواد کې روانې جګړې خپل مشروعیت له لاسه ورکړی.

نوموړي دا ټینګار هم کړی، چې د امریکا او طالبانو د تړون او د امریکا – افغانستان د ګډې اعلامیې په شتون کې د سولې لپاره پراخې نړیوالې مرستې او د افغانانو د خپلمنځي خبرو پیل، د هغه لوی شمېر افغانانو، چې سولې او امنیت ته لیواله او اړ دي؛ افغان وژنې او جګړې خپل مشروعیت له لاسه ورکړی دی.

دا په داسې حال کې ده، چې په ټول هېواد کې تاوتریخوالي په ځانګړي توګه هدفي وژنې خورا ډېرې شوې دي.

تازه خبرونه

که هند په کابل کې د سفارت پرانیستې ته لیواله وي؛ نو د تېر حکومت له چارواکو سره دې اړیکې پرې کړي

خپور شوی

په

توسط

(Last Updated On: غبرګولى ۲, ۱۴۰۱)

په دوحه کې د اسلامي امارت د سیاسي دفتر مشر وايي، که هند له اسلامي امارت سره د ښو سیاسي او اقتصادي اړیکو د ټینګولو په لټه کې وي؛ نو په کابل کې دې خپل سفارت بېرته پرانیزي.

په دوحه کې د اسلامي امارت د سیاسي دفتر مشر سهیل شاهین ویلي؛ که هند غواړي، چې په افغانستان کې خپل سفارت بېرته پرانیزي، باید له پخوانیو حکومتي چارواکو سره خپلې اړیکې پرې کړي.

هغه وايي، اسلامي امارت د سیاسي استازولیو د بشپړ امنیت تامین ته ژمن او د ټولو هندي ډیپلوماټانو د امنیت ټینګولو ته چمتو دی.

د اسلامي امارت دغه لوړپوړي چارواکي دا هم ويلي، چې ښوونځيو ته د نجونو د بېرته تګ د آسانتیاوو لپاره یې یوه کمیټه جوړه کړې، چې په اړه به یې ډېر ژر پرېکړه وشي.

سهیل شاهین څرګندوي؛ هند کولی شي په افغانستان کې خپلې ټولې نیمګړې پروژې بشپړې کړي او پر نویو پروژو پانګونه وکړي.

هغه زیاته کړې؛ د هند په ګډون د ټولو بهرنیو دیپلوماتانو امنیت ته مونږ ژمن یوو. دا زمونږ مسوولیت دی او مونږ بشپړ امنیت برابر کړی دی. هند کولی شي په افغانستان کې خپلې اقتصادي پروژې بشپړې کړي او نوې پروژې پیل کړي؛ خو هند باید له پخوانيو دولتي چارواکو سره همکاري ونکړي. اسلامي امارت چمتو دی، چې له دغه هېواد سره د دوه اړخیزو هېوادنیو ګټو پر بنسټ اړیکې ولري.

هغه زیاتوي، چې اسلامي امارت د نړیوال مشروعیت لپاره ټول اصول پوره کړي او باید په رسمیت وپېژندل شي.

هغه ټینګار کړی، چې مونږ د نړیوال مشروعیت لپاره ټول اړین شرایط  برابر کړي؛ امنیت تامین شوی، مونږ د خلکو ملاتړ لرو، پولې مو تر څارنې او کنټرول لاندې دي. له مونږ سره باید د سیاسي انګېزو پر بنسټ چلند ونشي.

د تېر کال د اګست پر پېنځلسمه د اسلامي امارت له بیا واکمنېدو راپدیخوا شاوخوا شل هېوادونو او اروپايي ټولنې په افغانستان کې خپلې استازولۍ او سفارتونه پرانستي دي او همدارنګه په روسیه، چین، ایران، پاکستان، قطر، ترکمنستان او یو شمېر آسیایي هېوادونه کې سیاسي استازي لري.

Continue Reading

تازه خبرونه

افغانان باید خپلې ټولې ستونزې د خبرو له لارې حل کړي

خپور شوی

په

توسط

(Last Updated On: غبرګولى ۲, ۱۴۰۱)

د تېر حکومت یو شمېر سیاسي څېرو ويلي؛ دوی چمتو دي، چې ټولې ستونزې د خبرو اترو له لارې حل کړي؛ خو له دې مخکې باید د افغانستان ټول قومونه د خپل هېواد په نظام کې ځانونه وویني.

له افغان شخصیتونو سره د اړیکو نیولو د کړنلارې له اعلان یوه ورځ وروسته؛ د تېر حکومت یو شمېر سیاستوال او پېژندل شوې څېرو د خبرو اترو  لپاره چمتوالی ښودلی دی.

د افغانستان د خلکو د اسلامي وحدت ګوند مشر محمد محقق ویلي؛ د هېواد په نظام جوړولو کې د افغانستان ټولو توکمونو شتوالی د اسلامي امارت لپاره د تېر حکومت د دغو سیاستوالو او مشهورو شخصیتونو له اساسي شرطونو څخه دی.

کارپوهانو هم ويلي، چې د خلکو د باور د ترلاسه کولو لپاره باید په دې کمیسیون کې نورو کسانو ته هم ونډه ورکړ شي.

د حق او عدالت ګوند مشر معین څمکني ويلي، چې یو شمېر سیاستوال به دا کړنلاره ونه مني ؛ ځکه د دوی په وینا له اسلامي امارت څخه د بهر کسانو له شتون پرته به د کمیسیون کار ستونزمن وي.

دا کړنلاره،  چې پېنځلس مادې لري دا پکې ندي ویل شوي، چې پخوانیو سیاسي څېرو ته به سیاست او یا په حکومت کې د ګډون زمینه برابره کړي، بلکې یوازینۍ لویه موخه خبرې نه بلکې د دې سیاستوالو د سر او مال خونديتوب، د مشروع غوښتنو منل او په هېواد کې ژوند کول دي.

Continue Reading

تازه خبرونه

لویدیځ باید د افغانستان په اړه خپل نظر بدل کړي:  دفاع وزیر

خپور شوی

په

توسط

(Last Updated On: غبرګولى ۲, ۱۴۰۱)

د اسلامي امارت د دفاع وزارت چارسمبالي په کابل کې د یکشنبې پر ورځ د غبرګولي لومړۍ د پخواني مشرتابه ملا اختر محمد منصور د شپږم تلین په مراسمو کې څرګنده کړې، چې لویدیځ هېوادونه باید د افغانستان په اړه پخپلو کړنو او اندونو کې بدلون راولي.

 په دې مراسمو کې د ملي دفاع وزارت چارسمبالي مولوي محمد یعقوب مجاهد پر امریکا غږ وکړ، چې په افغانستان کې د خپلې شل کلنې مفکورې د عملي کولو هڅه دې نکوي او له اسلامي امارت سره دې تعامل وکړي.

نوموړي ویلي؛ که امریکا وي یا اروپا او یا نور هېوادونه، باید هغه ذهنیت بدل کړي، چې د افغانستان په اړه یې له شل کلونو راپدیخوا درلود. دوی باید افغانستان ته په بل ډول وګوري.

په دې مراسمو کې د لومړي وزير مرستيال ملا عبدالغني برادر ويلي؛ د طالبانو د مشر منصور په مشرۍ د طالبانو په وسلواله مبارزه کې د افغانستان استخباراتي ادارې د پام وړ پرمختګ کړى دى.

د لومړي وزير مرستيال عبدالسلام حنفي خلکو ته ډاډ ورکړ چې په افغانستان کې به د بې عدالتۍ مخه ونيول شي .

هغه ویلي: مونږ دا خپل اسلامي مکلفيت ګڼو او د هر هغه چا مخه نیسو، چې د افغانستان په هر ځای کې پر خلکو ظلم کوي.

د بهرنیو چارو وزارت چارسمبالي مولوي امیرخان متقي په همدې مناسبت جوړې شوې غونډې ته وویل: که اسلامي امارت د بهرنیانو غوښتنو ته غاړه کیښوده؛ نو د پخواني حکومت د مشر اشرف غني له برخلیک سره به مخ شي.

د بهرنیو چارو وزارت سیاسي مرستیال شیر محمد عباس ستانکزي ویلي، چې اسلامي امارت باید نجونې ښوونځيو ته پریږدي.

ښځو ته خپل شرعي حقوق ورکړ شوي ندي؛ یوه کونډه اوس هم نشي کولی خپل میړه وټاکي. یوه نجلۍ نشي کولی خپل میړه وټاکي. که یوه ښځه د میراث حق وغواړي، هرڅوک به پرې وخاندي.

ده وويل چې نجونو ته د زدکړې حق ورکړ شوی ندی.

نوموړی وایي: په افغانستان کې ښوونه او روزنه شته؛ خو داسې نده، چې باید څنګه وي. دوی ته د دوی حقوق ورکړي. چيرته، چې ښځې کولی شي اسلام او شريعت زدکړي. دوی په مدرسو او ښوونځیو کې زده کړې کوي.

ده څرګنده کړې؛ د هغو حکومتونو وخت لنډ وي، چې  ملت یې ملاتړی نه وي.

د اسلامي امارت پخوانی مشرتابه ملا اختر منصور د ۲۰۱۶ زېږدیز کال د مۍ پر ۲۱ د پاکستان په بلوچستان ایالت کې د امریکا د بې پیلوټه الوتکې په برید کې له وژل کېدو مخکې شاوخوا یو کال د مشرتابه دنده تر سره کړې وه.

Continue Reading

Trending

Copyright © 2022 Ariana News. All rights reserved!