Connect with us

تازه خبرونه

خلیل زاد کابل ته راغلی، چې د خپلمنځي خبرو پیلولو ته د حل لار ومومي

Published

 on

(Last Updated On: زمری ۱۰, ۱۳۹۹)

د افغانستان د سولې لپاره د امریکا ځانګړي استازي زلمي خلیلزاد د جولای پر ۲۹ کابل ته راغلی او له افغان مشرانو سره په کتنه کې یې د خپلمنځي خبرو د پیلولو خنډونو اړ ناندرو ته د حل لارې پر موندلو بحث او خبرې اترې کړې دي.

په کابل کې د امریکا سفارت د پنجشنبې پر ورځ څرګنده کړ، چې خلیلزاد له ولسمشر اشرف غني، د ملي پخلاینې عالی شورای له مشرعبدالله عبدالله، پخواني ولسمشر حامد کرزي او یو شمېر نورو چارواکو سره لیدلي دي.  

یاد سفارت په ډاګه کړې، چې خلیلزاد د خپلمنځي خبرو د پیل پر پاتې ننګونو، د اختر له اوربند وروسته د تاوتریخوالي پر کمولو او د بندیانو پر پوره آزادولو خبرې اترې تر سره کړې دي.

خلیلزاد د وینو تویولو بر درولو او د سولې لپاره له دې تاریخي ف رصته پر ګټه پورته کولو ټینګار کړی دی.

د یاد سفارت په اعلامیه کې راغلي، چې خلیلزاد د خپلو سیمه ییزو او نړیوالو سفرونو په اړه هم افغان مشرانو ته معلومات وړاندې کړي دي.

دا په داسې حال کې ده، چې په قطر کې د طالبانو د سیاسي دفتر غړي او ویاند ویلي، چې دوی د حکومتي بندیانو پاتې ۸۲ کسان هم خوشې کړل.

سهیل شاهین دا ډاډ هم ورکړی، چې طالبانو د بندیانو د خوشې کولو بیر پهای ته رسولی او د هوکړې له مخې یې د ۱۰۰۰ حکومتي بندیانو شمېر بښپړ کړی دی.

شاهین د چارشنبې پر ورځ د افغانستان له حکومت وغوښتلو، چې د دوحې د هوکړې له مخې دې پاتې طالب بتدیان خوشې کړې، چې خپلمنځی خبرو ته زمینه برابره شي.

طالبانو د اختر درې ورځنی اوربند هم اعلان کړې، چې پر امنیتي ځواکونو به بریدونه نکوي.

په کابل کې د ایران سفیر بهادر امینیان حکومت او طالبانو ته ویلي، چې پاتې خنډونه دې هم لیرې کړي، خپلمنخي خبرې بیل شي.

تازه خبرونه

د بدخشان مرکز فیض‌آباد ښار کې چاودنې ۱۱ کسان وژلي او له ۳۰ ډېر ټپیان دي

Published

on

(Last Updated On: غبرګولى ۱۸, ۱۴۰۲)

د کورنیو چارو وزارت د یوې خبرپاڼې پر خپرولو تائید کړې، چې نن (پنجشنبه) سهار د بدخشان فیض‌آباد ښار په نبوي جومات کې د بدخشان د پخواني مرستیال والي د فاتحې د مراسمو پر مهال د چاودنې له کبله ۱۱ کسان وژل شوي او له ۳۰ ډېر ټپیان دي.

د کورنیو چارو وزارت ویلي، چې د دې پېښې په اړه به نور جزئیات وروسته وړاندې کړي.

د کورنیو چارو وزارت دغه برید د اسلام او افغانستان د دښمنانو کار بللی او ویلي یې دي، چې د دې پېښې عاملین به ونیسي.

تر اوسه کومې ډلې د دې برید مسوولیت نه‌دی منلی.

د راپورونو له مخې، په دې مراسمو کې د بدخشان ولایت د سیمه ییزو چارواکو په ګډون ګڼو دولتي چارواکو ګډون کړی و؛ خو تر اوسه په دې اړه جزئیات نه‌دي ورکړ شوي، چې دولتي چارواکو ته زیان اوښتی که نه.

په همدې حال کې د اقتصاد وزارت مرستیال عبداللطیف نظري آریانانیوز ته په یوه غږیزه څرګندونه کې کې ویلي، هغه خبرونه، چې په دې چاودنه کې د اقتصاد وزیر قاري دین محمد حنیف وژل شوی، حقیقت نه لري.

عبدللطیف نظري ویلي: د هېواد د اقتصاد د وزیر د شهادت خبر دروغ دی او حقیقت نه‌لري. جلالتمآب د اقتصاد وزیر په کابل کې خوندي او روغ دی.

له دې مخکې داسې راپورونه خپاره شوي وه، چې ګویا قاري دین محمد حنیف نن د فیض‌آباد ښار په نبوي جومات کې د بدخشان د پخواني مرستیال والي د فاتحې د مراسمو پر مهال په چاودنه کې وژل شوی دی.

د بدخشان مرستیال والي نثار احمد احمدي د سې شنبې پر ورځ د بدخشان په مرکز فیض‌آباد ښار کې د موټر بم د چاودنې له کبله ووژل شو.

داعش ډلې د بدخشان د مرستیال والي د وژلو پړه پر غاړه اخیستې ده.

Continue Reading

تازه خبرونه

ملت دې نور هم متحد شي – سراج الدین حقاني

Published

on

(Last Updated On: غبرګولى ۱۸, ۱۴۰۲)

د افغانستان اسلامي امارت د کورنیو چارو وزیر سراج الدین حقاني د هېواد له بهر میشتو افغانانو غوښتي، چې راستانه شي او ملت نور هم متحد کړي.

د کورنیو چارو وزارت د څرګندونو له مخې؛ سراج الدین حقاني د دوشنبې پر سهار ( د غبرګولي ۱۵ ) د بلخ ولایت له چارواکو، عالمانو او قومي مشرانو سره د دغه ښار د ولایت مقام په تالار کې وکتل.

سراج الدین حقاني دغې غونډې ته د وینا پر مهال ویلي: دښمنان د افغانانو د وېشلو لپاره ډېرې دسیسې جوړوي؛ خو دلته د تعصب ریښې هیڅکله ولسي نه‌وې، بلکې پردیو راته راوړي او یوازې سیاسي جنبه یې درلوده.

د افغانستان دښمنانو هڅه وکړه، چې هېواد ووېشي؛ خو د شمال مجاهدينو او د ملي یووالي ژورو رېښو ثابته کړه، چې مونږ متحد ملت یوو. زمونږ واقعي حالت همدا دی، چې له پنجشېره د پکتیکا زلزله ځپلیو ته او له روزګانه د بدخشان د طبیعي افتونو له کبله اغېزمنو خلکو ته د مرستې لاسونه ور وغزېدل. زمونږ وحدت طبیعي دي، افغانان په عقایدو او باورونو کې ژورې رېښې لري.

په دې کتنه کې د بلخ ولایت مرستیال مولوي ابو ادریس نوموړي ته د ښه راغلاست تر څنګ څرګنده کړې، چې دا د بلخ ولایت د مجاهدینو د سرښندنو او د الله تعالی د لوی فضل او رحمت پایله ده، چې مونږ مشران په خپل منځ کې وینو.

هغه زیاته کړې؛ مونږ د اسلامي نظام په رامنځته کولو کې سترې قربانۍ ورکړي او اوس د نظام بقا د ایماندارۍ، صداقت او یووالي قربانیو ته اړتیا لري. مونږ یو ملت یوو او باید نور هم سره متحد شو.

د بلخ ولایت د عالمانو شورا رییس شیخ محمد سعد هاشمي په غونډه کې د وینا پر مهال ویلي: امنیت ته په ټولو ادیانو، دولتونو او ولسونو کې لومړیتوب ورکړ شوی دی. د اوسني امنیت امتیازات اسلامي امارت ته منسوبېږي، باید د اسلامي امارت هڅې په ملي او نړیواله کچه وستایل شي.

سراج الدین حقاني د سخي صاحب د مزار د بیارغونې او د روضې د انګړ د دیني مدرسې لپاره د کتابتون په جوړولو کې د مرسته ژمنه وکړه. دغه راز د روضې په انګړ کې جوړ شوي تاریخي موزیم ته د کندهار والي حاجي وفا ځانګړې پاملرنه وستایل شوه او د ځینو ستونزو د حل لپاره یې له ځینو مشورې برخمن کړل.

د غونډې په پای کې کورنیو چارو وزیر سراج الدین حقاني په ډاګه کړه: مونږ هغه مهال د حکومت واک تر لاسه کړ، چې هر څه ګډوډ ول، دغه جنجالي حالت مصروفه وساتلو؛ نو، له همدې کبله مې پر ځنډ د راتګ عذر ومنئ.

هغه افغانان، چې تبلیغاتو او پروپاګند وډار کړل، وطن یې پرېښود؛ بېرته دې راستانهٔ شي؛ ځکه دا وطن د ټولو ګډ او د امن کور دی.

دغه راز سراج الدین حقاني په خپلو خبرو کې د جهاد خاطرو ته په نغوته کې څرګنده کړه: د جهاد په پیل کې ډېرو خلکو د وسله‌والې مبارزې پر ځای د سازش د طریقو کارول راته پر ګوته کول، خو د مجاهدينو د قربانۍ او استقامت له کبله په ټولو ازمايښتونو کې بريالي شوو.

د کورنیو چارو وزیر یو ځل بیا خلکو ته د عمومي عفوې یادونه وکړه.

هغه زیاته کړه: “امیر المومنین [د اسلامي امارت مشرتابه ] د سولې لپاره عمومي بښنه اعلان کړه او له بښنې وروسته که څوک سرغړونه وکړي؛ د شریعت له مخې ورسره چلند کیږي.

د کورنیو چارو وزیر همدا راز امنیتي ځواکونو ته د دسپلین د ساتلو سپارښتنه وکړه او ویې ویل، چې د نظام بقا په ښو اخلاقو کې نغښتې ده.

هغه مجاهدینو ته سپارښتنه وکړه: د نظام بقا په ښو اخلاقو کې ده؛ قدرت او مقام کله کله په انسان کې تکبر او غرور پیدا کوي، په غرور کې د انسان عقل او فکر له منځه ځي. امیرالمؤمنین حفظه الله به راته ویل، چې له ښو اخلاقو پرته بل څه نه‌لرو او باید له خپلو ماتحتانو سره ښه چلند وکړو.

سراج الدین حقاني د اسلامي امارت د مشرتابه پیغام هم ځواکونو او د بلخ چارواکو ته داسې په ډاګه کړ:

مجاهدینو ته مې پیغام دا دی، چې شپه او ورځ د ولس په خدمت کې اوسئ. حتا هغه مجاهدین، چې په رسمي توګه په دندو کې نه‌دي؛ د الله تعالی او رسول پر وړاندې مسوولیت لري، چې د نیکو اعمالو له لارې او پر لوړو اخلاقو د مجاهدت عالي صفاتو ته پابند پاتې شي.

هغه یو ځل بیا ټینګار وکړ، چې زمونږ نظام ټولګډونه دی، قومي مشرانو، عالمانو او نورو مسلکي کادرونو ته هم د خدمت په برخه کې زمینه برابره کړئ.

سراج الدین حقاني دا هم ویلي: عالمان زمونږ معنوي او روحاني رهبران دي او د هغوی په لارښوونه کې د دنیا او اخرت کامیابي نغښتې ده. زمونږ په ګټه او تاوان کې ولس را شریک دی.

هغه په پای کې په ډاګه کړه: د پردیو د فرهنګ له تسلط څخه د ځوانانو د ژغورلو لپاره باید خپل اسلامي او افغان فرهنګ او فکر ته وده ورکړو او داسې محبوب یې کړو، چې خلک یې پخپله ومني.

Continue Reading

تازه خبرونه

د بدخشان د مرستیال والي د فاتحې په مراسمو کې چاودنه شوې

Published

on

(Last Updated On: غبرګولى ۱۸, ۱۴۰۲)

په بدخشان ولایت کې سیمه ییزو سرچینو له یوې بلې چاودنې خبر ورکوي.

دا چاودنه نن پنجشنبه (د غبرګولي ۱۸ ) له غرمې مخکې پر ۱۰:۵۰ دقیقو په فیض‌آباد ښار کې د نبوي جومات تر څېرمه رذامنځته شوې ده.

دغه چاودنه هغه ځای ته څېرمه رامنځته شوې، چې په کې د بدخشان والي د مرستیال او چارسمبالي د فاتحې مراسم روان ول. نوموړي د سې شنبې پر ورځ ( د غبرګولي ۱۶ ) په یوه ښاري موټر بم چاودنه کې خپل خوږ ژوند له لاسه ورکړی دی.

د بدخشان د اطلاعاتو او فرهنګ رییس معز الدین احمدي هم چاودنه تائید کړې ده؛ خو د دې پېښې د مرګ و ژوبلې په اړه څه نه‌وايي.

عیني شاهدان وايي، د چاودنې هدف د بغلان پخوانی امنیه قومندان و او ویل کېږي، چې په دې پېښه کې نوموړی وژل شوی دی.

سرچینه زیاتوي، چې له چاودنې وروسته په سیمه کې جګړه هم پیل شوې ده.

تر اوسه د دې چاودنې د بڼې او احتمالي مرګ و ژوبلې په اړه معلومات نشته.

د بدخشان امنیتي چارواکي په دې اړه څه نه‌وايي.

دا په داسې حال کې ده، چې دوه ورځې وړاندې د والي مرستیال مولوي نثار احمد د داعش ډلې په موټربم برید کې وژل شوی دی.

د تازه پېښې پړه تر اوسه کومې ډلې پر غاړه نه‌ده اخيستې.

Continue Reading

Trending

Copyright © 2022 Ariana News. All rights reserved!