د دوشنبې پر ورځ د ا.ا.ا د بهرنیو چارو وزارت چارسمبالي مولوي متقي پر مشرۍ د پلاوي غړیو د ناروې له چارواکو سره د خبرو پر لومړۍ ورځ یکشنبه وکتل او د هېواد د روانو حالاتو په اړه یې ورسره خبرې وکړې.

د افغانستان اسلامي امارت په خبرپاڼه کې راغلي، چې د ناروې په پلازمېنه اوسلو کې د افغان لنډمهالي حکومت د چارسمبالي او یو شمېر شخصیتونو ترمنځ یوه ورځنۍ ګډه ناسته ترسره شوه.

د خبرپاڼې له مخې؛ د غونډې په بهیر کې ګډونوالو په پوره زغم د یو او بل اندونه او نظرونه واورېدل او د افغانستان پر اوسني وضعیت یې څرګندونې وړاندې کړې.

دوی ټینګار وکړ، چې افغانستان د ټولو افغانانو ګډ کور دی او څرګندوي، چې ټول افغانان باید د هېواد د سیاسي، اقتصادي او امنیتي غوړېدا او هوساینې لپاره ګډې هڅې وکړي.

دغه راز په ډاګه شوې: د غونډې ګډونوالو ومنله، چې همغږي او ګډې هڅې د افغانستان د ټولو ستونزو یوازنۍ حللار ده.

د اسلامي امارت استازیو دا هم ویلي، چې ټولو ګډونوالو دا ډول غونډې د هېواد په ګټه وبللې.

د افغانستان اسلامي امارت استازي شفیع الله اعظم د خبرو د لومړۍ ورځې په پای کې اسوشیټیډ پرس ته څرګنده کړې، چې له لویدیځو چارواکو سره لیدنه د افغان حکومت د مشروعیت لپاره یو ګام و او دا ډول بلنه او اړیکه به مرسته وکړي، چې اروپایی ټولنه، امریکا یا یو شمېر نور اړوند هېوادونه د افغان دولت ناسم انځور له منځه یوسی.

د ناروې د بهرنیو چارو وزارت تېره اوونۍ په ډاګه کړې وه، چې افغان استازي د جنورۍ له ۲۳ تر ۲۵ نېټې اوسلو ته بلل شوي، چې د ناروې له چارواکو، نړیوالې ټولنې او نورو افغانانو سره وګوري؛ خو دا غونډې د اسلامي امارت مشروعیت یا رسمیت پېژندنه نه ښيي، بلکې باید له دغو چارواکو سره خبرې وشي، چې د ناوړه بشري ناورین مخه ونیول شي.

دا په داسې حال کې ده، چې د اسلامي امارت پلاوی به نن د ناروې په پلازمېنه اوسلو کې د امریکایي استازیو په ګډون د اروپایي ټولنې، بریټانیا،فرانسې، جرمني ایټالیا او ناروې له استازیو سره هم د افغانستان پر سیاسي، امنیتي او بشري وضعیت خبرې وکړي.