د آریانا افغان هوایي شرکت رییس بخت الرحمن شرافت له خپل مل پلاوي سره یوځای د ترکیش ایرلاینز له اجرائیوي رییس بلال إکشي سره د لیدنې پر مهال په هوايي سکټور کې د دوه اړخیزو همکاریو پر پراختیا خبرې کړې دي.

آریانا هوایي شرکت ويلي، چې په دې لیدنه کې دواړو خواوو د هوايي ټرانسپورټ پر پراختیا، مسافرو او باري خدماتو معیاري کولو او د تخنیکي او عملیاتي تجربو تبادلې ټینګار څرګند کړی دی.

د آریانا افغان هوایي کشرکت رییس د ترکیش ایرلاینز له نړیوالو تجربو ستاینه وکړه او د دواړو هېوادونو ترمنځ یې د هوايي ټرافیک، سوداګرۍ او ګرځندوی اړیکو په پیاوړتیا کې د دې شرکت رول مهم وباله.

د ترکیش ایرلاینز اجرائیوي رییس هم د آریانا افغان هوایي شرکت له وروستي پرمختګ ستاینه وکړه او ژمنه وشوه، چې ترکیه په تخنیکي روزنه، رغونه او د هوايي عملیاتو ښه کولو کې ګډې همکارۍ ته چمتو ده.

ویل کیږي، چې دواړو خواوو د هوايي ټرانسپورټ د پیاوړتیا او پراخولو لپاره د ګډو تخنیکي او عملیاتي ډلو پر جوړولو ټینګار کړی دی.

د پاکستان رسنیو راپور ورکړی، چې د افغانستان او پاکستان ترمنځ د وروستیو کړکېچونو له کبله نن له ۵۰ ورځو بندېدا وروسته د تورخم اړینه لار د بشري دلایلو له مخې پر محدوده توګه پرانیستل شي.

د ګمرک چارواکو ویلي، چې د لارې بندېدا دواړو خواوو ته د لاریو اوږده کتارونه جوړ کړي؛ زرګونه موټرونه د وارداتو، صادراتو او ټرانزیټي توکو لېږد ته ولاړ پاتې دي.

پاکستان افغانستان ته سمنټ، درمل، میوې او سابه صادروي ​​او له افغانستان څخه د ډبرو سکاره، تازه او وچه میوه واردوي.

د پاکستانيو رسنیو د څرګندونو له مخې؛ د تورخم لار هره ورځ په اوسط ډول د ۸۵۰ میلیون ټنو پر ارزښت دوه اړخیزې سوداګرۍ ته آسانتیا برابروي.

په دې لار کې بند پاتې موټر چلوونکي وايي، چې د اوبو او خوړو لپاره مناسب شرایط نشته؛ نور خپل  لګښتونه پوره کولی نشي او ډېری یې د سختې سړې هوا له کبله ناروغه شوي دي.

یوه ورځ مخکې د پاکستان د لومړي وزیر مرستیال او بهرنیو چارو وزیر اسحاق ډار اعلان کړی؛ ملګرو ملتونو له اسلام‌آباد څخه غوښتي، چې د لارې د بندېدا پر پرېکړه بیاکتنه وکړي.

 ډار زیاته کړې؛ له مشرتابه سره له مشورې وروسته شونې ده، چې افغانستان ته اړین بشري توکي صادر کړي.

د پاکستان بهرنیو چارو وزیر ټینګار کړی؛ د اسلام‌آباد یوازنۍ تمه له افغان حکومت څخه دا ده، چې د افغانستان خاوره باید د پاکستان پر وړاندې د ترهګرۍ د اډې په توګه ونه کارول شي. دا هغه غوښتنه ده، چې د افغانستان اسلامي امارت پر ځلونو ټینګار کړی، چې د دوی خاوره به د هیڅ هېواد پر وړاندې ونه کارول شي.

د تورخم لارې بیا پرانیستل کولی شي د دواړو هېوادونو ترمنځ سوداګرۍ او بشري مرستو ته آسانتیا برابره کړي او د ۵۰ ورځني بندښت له کبله رامنځته شوي فشارونه راکم کړي.

د بلخ ولایت د پختې پروسس کوونکو ويلي؛ دا اړین کرنیز محصول سږکال له بې ساري اقتصادي رکود سره مخ شوی او دوی یې له درندو مالي زیانونو سره مخ کړي دي.

د یو شمېر بزګرانو او پروسس کوونکو د څرګندونو له مخې؛ د دې محصول بیه دومره راټیټه شوې، چې دوی ان خپل لګښتونه هم نشي پوره کولی.

دوی ټینګار کړی؛ که ملاتړ یې ونشي، نو دوی به له سخت اقتصادي بحران سره مخ شي.

د بلخ صنایعو او سوداګرۍ ریاست مرستیال نصیر احمد نیازي ويلي، چې د پختې د صادراتو او بازار موندنې لپاره به ډېر ژر بدیلې لارې چارې رامنځته شي؛ ځکه له څو هېوادونو سره د تړونونو پر لاسلیک خبرې روانې دي.

د بلخ د کرنې او اوبو لګولو ریاست د څرګندونو له مخې؛ تېر کال په دې ولایت کې پر شاوخوا ۲۸۰۰۰ هکټاره ځمکه پخته کرل شوې وه، چې ۵۶۰۰۰ ټنه حاصل یې ورکړ. اوس پر ۳۰۰۰۰ هکټاره ځمکه پخته کرل شوې او حاصل یې ۶۰۰۰۰ ټنو ته رسېدلی دی.