د افغانستان او پاکستان روان کړکېچ سترې سیمه‌ییزې پروژې ځنډولې دي- د روسیې سفیر

په پاکستان کې د روسیې سفیر الرت پي خوروف ویلي، چې د افغانستان او پاکستان ترمنځ کړکېچونو سیمه‌ییزې سوداګرۍ ته زیان رسولی او په سویلي او مرکزي آسیا کې یې د انرژۍ سترې او بېخبنایي پروژې ځنډولې دي.

خوروف په یوه مرکه(پوډکاسټ) کې ویلي؛ د پاکستان، مرکزي آسیا او روسیې ترمنځ سوداګریزې اړیکې هم تر منفي اغېز لاندې راغلې دي. په ځانګړي توګه د پاکستان د درمل جوړونې سکټور زیان لیدلی دی.

هغه زیاته کړې؛ د «افغان ټرانس» په ګډون اړینې بېخبنایي پروژې ځنډېدلې دي. په داسې حال کې، چې د کاسا-۱۰۰۰ او ټاپي ته ورته د انرژۍ د سترو پروژو برخلیک هم روښانه نه‌دی.

خوروف ویلي: که د دواړو لوریو غوښتنه موجوده وي؛ روسیه چمتو ده، چې د افغانستان او پاکستان ترمنځ منځګړیتوب وکړي.

د روسیې سفیر زیاته کړې؛ د افغانستان اوسني حکومت له بندیزونو سره – سره د شتمنیو پر کنګل کېدا او سختو بانکي محدودیتونو سربېره خپل ټینګار او اغېزمنتیا ښودلې ده.

هغه وایي؛ دا حکومت کولی شي ان له رسمي نړیوال رسمیت پرته هم له سیمه‌ییزو او نړیوالو شریکانو سره رغنده اړیکې وساتي.

خوروف ویلي؛ ښايي نور هېوادونه هم د افغانستان حکومت پر رسمیت وپېژني.

نوموړي دا هم ویلي: که لویدیځ هېوادونه د افغانستان کنګل شوې شتمنۍ آزادې کړي؛ حکومت به وکولی شي داسې بشپړ اغېزمن فعالیت وکړي، چې ان د ترهګرۍ ضد هڅو او د کډوالو د ستونزو په څېر ننګونو ته په نړیواله رسېدنه کې مرسته وکړي.

د نجونو د زده‌کړو په اړه د روسیې سفیر ټینګار کړی، چې د بشري حقونو اساسي اصول باید د افغانستان د حکومت په ګډون د ټولو لوریو له‌خوا رعایت شي؛ ځکه زده‌کړو ته لاسرسی د هېواد د اوږدمهاله پرمختګ اړتیا ده.