Connect with us

سوداگري

د افغانستان بانک ته د افغانیو نوي بانکنوټونه وسپارل شول

Published

 on

(Last Updated On: لړم ۱۹, ۱۴۰۱)

د افغانستان بانک عالي شورا یوه غړي د چارشنبې پر ورځ رویترز ته ویلي؛ یوه پولنډي شرکت په روانه اوونۍ کې د افغانستان بانک ته د نړیوالو بانکي سیستمونو له لارې د افغانيو نوي بانکنوټونه وسپارل.

د افغانستان بانک ته د نویو افغانیو سپارل د بدلون استازیتوب کوي؛ تېر کال کله، چې د افغانستان اسلامي امارت واک ته ورسید، نو ورسره په پراخه کچه د نړیوال مالي سیستم اړیکې پرې او بانکي راکړه ورکړه ودرول شوه.

باختر دولتي خبري آژانس هم خبر ورکړى، چې د افغانیو دغه ټولګه د چارشنبې پر ورځ( د لړم ۱۸) رارسېدلې ده.

د رویترز د څرګندونو له مخې؛ د افغانستان بانک له پولنډي شرکت سره د خپلو بانکنوټونو د چاپ لپاره قرارداد کړی و، خو د جولای تر پیل پورې ونه توانید، چې تادیه پیل کړي.

له تېر یو کال راپدیخوا تازه بانکنوټونو ته لاسرسی بند و او د افغانستان نغدې پیسې مخ پر زړېدو؛ نوټونه ټوټه ټوټه شوي یا د راکړې ورکړې لپاره سلېښت وساتل شول او ورسره د نغدو پیسو کموالی هم رامنّته شو.

د امريکا د بهرنيو چارو وزارت يوه وياند ويلي: د افغانستان بازارونه په ټولیزه توګه پر نغدو پيسو چلېږي؛ خو شته بانکنوټونه مخ پر خرابېدو دي… د افغانستان بانک به وکولی شي، چې زاړه او خراب شوي بانکنوټونه بدل کړي، چې ورسره به نه یوازې د افغانانو د خوراکي او نورو د اړتیا وړ توکو د پېرلو وس ښه کړي، بلکې اقتصادي او بانکي وضعیت به هم ورسره ښه شي.

د افغانستان بانک د عالي شورا غړي شاه محرابي ویلي؛ د امریکا د خزانې وزارت لخوا بانکونو او شرکتونو ته د افغانستان بانک لخوا د راکړې ورکړې د اجازه ورکولو له کبله به هغوی تر نیوکو لاندې نه راځي.

محرابي زیاته کړې: د راکړې ورکړې دغه آسانتیاوې، چې د اړوند خزانې لخوا آسانې شوي؛ ټول افغانان یې هرکلى کوي.

هغه ویلي، چې بانکنوټونه د سې شنبې پر ورځ ورسپارل شوي. دغه قرارداد د ۱۰ میلیارد افغانیو پر ارزښت د نویو وړو بانکنوټونو لپاره و. دوه یم قرارداد له فرانسوي شرکت سره د ورته ارزښت لپاره شوی دی.

د افغانستان د مالیې وزارت یوه ویاند رویترز خبري آژانس ته ویلي؛ د افغانستان بانک نوي بانکنوټونه یوازې د زړو بانکنوټونو د بدلولو لپاره کارول کیږي، نه د بودیجې د تمویل لپاره.

شاه محرابي ویلي، چې د افغانستان بانک به خپلې مالي ډاډ ترلاسه او نغدي افغانۍ خپرې کړي.

هغه ویلي؛ بانک هوکړه کړې، چې د درېیمې ډلې د څارنې تابع وي او د امریکا د خزانې څارنه د دې چارې لپاره تائید شوې ده.

د یادونې ده، چې له دې مخکې د امریکا د خزانې ادارې او حکومت د افغانستان بانک د ګنګل شویو شتمنیو نیمایي ۳.۵ میلیارد دالر د سویس په ژینو کې د پېسو یوه صندوق ته د استولو ډاډ څرګند کړی و، چې د افغانستان له اقتصاد سره د مرستې لپاره ترې کار واخیستل شي.

سوداگري

د ازبکستان وارداتي برښنا به په ۲۴ ګړیو کې له افغانستان سره ونښلیږي

Published

on

(Last Updated On: سلواغه ۴, ۱۴۰۱)

 د ازبکستان د انرژۍ وزارت څرګنده کړی، چې افغانستان ته به د چارشنبې پر ورځ د برښنا صادرات بیا پیل کړي.

 افغانستان ته د ازبکستان برښنا د جدي له څلیریشتمې نېټې په بشپړه توګه پرې شوې وه. د ازبکستان د انرژۍ وزارت یې د پرې کېدو دلیل تخنیکي ستونزې بللې وې.

د ازبکستان د انرژۍ وزارت په ډاګه کړې؛ په ازبکستان کې تولیدېدونکې برښنا یوازې د کورني لګښت لپاره ده. د برښنا یوازې یوه برخه د حکومتونو ترمنځ د هوکړې پر بنسټ افغانستان ته صادریږي.

د افغانستان د بهرنیو چارو وزارت د ویاند مرستیال ضیا احمد تکل وايي، چې د ازبکستان ۲۵۰ میګاواته برښنا به په راتلونکیو څلیریشت ګړیو کې له افغانستان سره ونښلیږي.

د کابل د برښنا رییس مولوي حکمت الله آخوندزاده وايي، د برښنا اساسي ستونزه په ازبکستان کې رامنځته شوې تخنیکي ستونزو ده. هغه وایي: یوه ستونزه، چې له مونږ سره شریکه شوې د ازبکستان په څاګانو کې د ګازو کمښت دی، چې د برښنا د تولید لپاره کارول کیږي.

په کابل او د هېواد په یوشمېر ولایتونو کې د برېښنا نشتوالي خلک له ګڼو ستونزو سره مخ کړي دي؛ خو دا، چې په راتلونکیو څو ساعتونو کې به بېرته برښنا ونښلیږي؛ خلک هیله من کړي دي.

یو شمېر کارپوهان وايي؛ د افغانستان اسلامي امارت ته په کار ده، چې هغه هېوادونه، چې له افغانستان سره تړونونه لري؛ د تړون بشپړ پلي کولو ته اړ کړي.

دا په داسې حال کې ده، چې د افغانستان برښنا شرکت د څرګندونو له مخې؛ د دوشنبې پر ورځ د ترکمنستان په پلازمېنه عشق‌آباد ښار کې د وارداتي برښنا غزولو تړون لاسلیک شو.

افغانستان اوسمهال خپله د اړتیا وړ برښنا له ازبکستان، تاجکستان، ترکمنستان او ایران څخه اخلي.

Continue Reading

سوداگري

د لومړي ځل لپاره افغان باروړونکیو لاریو ترکیې ته د افغانستان محصولات ولېږدول

Published

on

(Last Updated On: مرغومی ۲۹, ۱۴۰۱)

د ترانسپورت او هوايي چلند وزارت څرګنده کړې؛ د لومړي ځل لپاره د افغانستان صادراتي توکي افغان لاریو د آقینې بندر له لارې ترکیې ته ولېږدول.

دغه وزارت د چارشنبې پر ورځ څرګنده کړې؛ له دې وروسته به د هېواد صادراتي مالونه د کورنیو ترانسپورتي شرکتونو لخوا د بار وړونکیو موټرو په وسیله، چې د افغانستان نمبر پلیټونه به ولري؛ ترکیې ته صادر شي.

دغه وزارت زیاته کړې؛ د صادراتو بهیر له آقینې بندر څخه پیل شوی، چې له ترکمنستان او ایران څخه له تېرېدو وروسته ترکیې ته رسېږي.

Continue Reading

سوداگري

د تېر پر پرتله د ننګرهار ګمرک عواید ۳۰ سلنه ډېر شوي – چارواکي

Published

on

(Last Updated On: مرغومی ۲۸, ۱۴۰۱)

په  ننګرهارولایت کې د ګمرک او سوداګرۍ ریاست مسوولینو ولس ته د حساب ورکونې په خبرې ناسته څرګنده کړې، چې د تېر پر پرتله يي په عوايدو کې ۳۰ سلنه ډېروالی راغلي دي.

د ننګرهار اطلاعات او فرهنګ ریاست پر نوښت جوړه شوې دوه‌یمه خبري ناسته کې د ګمرک او صنعت او سوداګرۍ ریاست په دې ناسته کې د ننګرهار ګمرک ریيس ولس ته د څرګندونو پر مهال څرګنده کړه؛ د تېر پر پرتله يې اوسني عواید اووه سوه پېنځه اتیا ميلیون افغانیو ته رسېدلي، چې کابو دېرش سلنه لوړ شوي دي.

نوموړي يې لامل د فساد، عوایدو د تېښتې مخنیوی او له پخوا د صادراتو او وارداتو د کچه زیاتوالي بولي.

د ننګرهار ګمرک رییس مولوي عبدالهادي ابرار وايي: عواید يې د تېر پر پرتله دېرش سلنه زیات شوي او د فساد د مخنيوي ترڅنګ يې سوداګرو ته بېلابېلې اسانتیاوې رامنځته کړي دي.

نوموړي همدراز په ګمرک او تورخم کې سوداګرو ته د تېر پر پرتله د اسنتیاوي د رامنځته کیدو خبره هم وکړه او زیاته کړې یې ده، چې د تېر پر څير یو ځل بیا د سوداګرۍ له اړخه د ننګرهار ګمرک لومړي مقام ته ورسوي.

نوموړي زیاته کړې؛ د سردارمحمد داود خان د پلان له مخې به د تورخم ښارګوټی به د ډکې اړوند سیمې ته راولیږدوي او په تورخم کې به هم د سوداګرۍ د پرمختګ لپاره تاسیسات جوړکړي.

د ننګرهار د صنعت او سوداګرۍ رییس مولوي عبدالبصیر پاچا هم د تېر کال پر پرتله د سږني کال په نهو میاشتو کې د عوایدو د دوه برابره زیاتوالي خبره کوي او وایي، چې روان کال کې د سوداګرو ګڼو ستونزو ته رسیدنه شوې ده.

نوموړي زیاته کړې؛ د اسلامي امارت له حاکمیت راوروسته په دې ولایت کې اته نویو کارخونو فعالیت پیل کړی او تردې دمه پنځوس اعشاریه درې میلون و اووه سوه دېرش زره اته سوه افغانۍ راڼه عواید راټول شوي، چې د تېر کال پر پرته د سږني کال عواید يي په نهو میاشتو کې دوه برابره زیات شوي دي.

د صنعت او سوداګرۍ ریاست د څرګندونو له مخې؛ دمګړۍ د دې ولایت په صعنتي ښارګوټي او ښار کې ۳۵۰ وړې او غټي تولیدي کارخونې فعاله دي، چې اته  زره کسان په کې کار کوي. د صنعت او سوداګرۍ ریاست مسوولینو همدراز څرګنده کړې، چې په روان کال کې د ګڼو پانګوالو جوازونه ثبت او راجستر شوي هم دي.

Continue Reading

Trending

Copyright © 2022 Ariana News. All rights reserved!