د رییس الوزرا سیاسي مرستيال د کابل پوهنتون د ټولنيزو علومو پوهنځي له استادانو او د افغانستان پېژندنې د ماسټرۍ پروګرام زده‌کړیالانو ته د خبرو پر مهال ویلي: اسلامي امارت له ګاونډ هېوادونو او نړۍ سره ښې اړیکې غواړي؛ خو هېڅکله پر اسلامي اصولو جوړجاړی ته جمتو ندی او نه هم د نورو د خوشالولو لپاره  اسلامي شعایر تر پښو لاندې کوي.

مولوي عبدالکبیر ویلي؛ اسلامي امارت د اسلامي نظام د ټینګښت ترڅنګ د سیاست او اقتصاد په ډګر کې د افغانستان د عزت او وقار لپاره هم کار کوي او له نړۍ سره د مثبت تعامل د ساتلو تر څنګ په بېلابېلو هېوادونو کې ۴۰ رسمي استازي لري.

د اسلامي امارت د ویاند مرستیال حمدالله فطرت ویلي، چې اسلامي امارت له ګاونډ هېوادونو او نړۍ سره ښې اړیکې غواړي، خو هیڅکله د اسلام پر  اصولو جوړجاړی ته تیار ندی او نه هم د نورو د خوښۍ لپاره اسلامي شعایرتر پښو لاندې کوي.

د رییس الوزراء سیاسي مرستیال زیاته کړې، اسلامي امارت د هیچا په کورنیو چارو کې لاسوهنه نکوي او دغه راز هیچا ته هم د افغانستان په کورنیو چارو کې د لاسوهنې اجازه ورکوي.

د اسلامي امارت مسوولانو له استادانو او زده‌کړیالانو وغوښتل، چې د علمي څېړنو او کنفرانسونو له لارې نړۍ ته د افغانستان رښتیني انځور وړاندې کړي.

د کابل پوهنتون د ټولنیزو علومو استاد فیض ځلاند په مسلکي برخو کې د ځوانو کدرونو د ګمارلو غوښتنه وکړه.

د ټولنیزو علومو په پوهنځي کې د افغانستان پېژندنې په برخه کې د ماسټرۍ پروګرام تازه پیل شوی او د فراغت لومړۍ دوره یې ټولنې ته وړاندې کړه.

د ملګرو ملتونو د بشري حقونو شورا د چارشنبې پر ورځ یو پرېکړه لیک تصویب کړ، چې په افغانستان کې یې د خپل ځانګړي راپور ورکوونکي دنده د یوه کال لپاره وغځوله.

په یاد پرېکړه ليک کې د افغانستان د بشري حقونو پر وضعيت د اندېښنې پر څرګندولو له اسلامي امارت وغوښتل شول؛ هغه تګلارې دې لغو کړي، چې بشري حقونه تر پښو لاندې کوي.

په دې پرېکړه ليک کې د امربالمعروف او نهی عن المنکر قانون ته نغوته شوې او څرګندوي؛ دغه قانون د ښځو او نجونو پر وړاندې د تبعيض او ظلم يو داسې سيسټم رامنځته کوي، چې د بشريت ضد جرم ګڼل کېږي.

د ملګرو ملتونو د بشري حقونو شورا هم له اسلامي امارت غوښتي، چې افغانستان ته د بشري حقونو په برخه کې د ملګرو ملتونو د ځانګړي راپور ورکوونکي پر ورتګ د بندیز لګولو پرېکړه دې لغو کړي.

دې شورا له ریچارډ بنیټ څخه غوښتي، چې عدالت ته د ښځو او نجونو د لاسرسي او د تبعیض د بېلابېلو بڼو د اغېزو په اړه یو راپور چمتو او نهه‌پنځوسمې غونډې ته یې وړاندې کړي.

په افغانستان کې د بشري حقونو لپاره د ملګرو ملتونو ځانګړي راپور ورکوونکي ریچارډ بنیټ په ایکس پاڼه کې لیکلي: زه په خپلواکه او بې طرفه توګه له ملاتړه برخمن ماموریت ترسره کوم؛ د افغانانو لپاره د بدلون رامنځته کولو لپاره کار کوم او د سرغړونو د مستند کولو لپاره به راپور وړاندې کړم.

د بشري حقونو د څار ټولنې په خبرپاڼه کې نیوکه کړې، چې د بشري حقونو د ډلو له پرله‌پسې غوښتنو سره - سره دغه پرېکړه‌لیک په افغانستان کې له بشري حقونو څخه د جدي سرغړونو د ځواب ویلو لپاره یو میکانیزم نه‌لري.

دا په داسې حال کې ده، چې اسلامي امارت ویلي؛ اسلامي شریعت مو سره کرښه ده او د ښځو او نجونو د حقونو په ګډون ټولو بشري حقونو ته ژمن دي او دا د افغانستان خپله کورنۍ مسله ده.