تازه خبرونه
د افغانستان له زلزله ځپلیو سیمو سره دې مرستې ډېرې شي

په افغانستان کې د ملګرو ملتونو د استازي مرستیال د یکشنبې پر ورځ له هغې وروسته، چې د تېرې اوونۍ له زلزله ځپلیو سیمو لیدنه وکړه؛ د دې هېواد لپاره یې د نورو نړیوالو مرستو غوښتنه وکړه.
د افغانستان لپاره د ملګرو ملتونو د سرمنشي د ځانګړي استازي مرستیال او د بشري مرستو همغږي کوونکي رامیز الاکبروف ویلي: پروني سفر ما ته د افغانستان د خلکو له کړاوه ډک ژوند او د سترو ناخوالو پر وړاندې د هغو ځواکمن هوډ یو ځل بیا تائید کړ.
ملګرو ملتونو او ملګرو یې د افغانستان لپاره د بشردوستانه پروګرام په چوکاټ کې د ناورین د ځوابولو لپاره سږنۍ درې میاشتنۍ بېړنۍ غوښتنه رامنځته کړې ده.
په پکتیکا او خوست ولایتونو کې نږدې ۳۶۲ زره خلکو ته د بشردوستانه مرستو له رسولو موخه داده، چې اغېزمنو خلکو ته د مرستو کچه پراخه او ګړندۍ شي.
نوموړي زیاته کړې؛ سره له دې، چې بسپنه ورکوونکیو په تېرو لس ستونزمنو میاشتو کې له افغانستان سره له سخاوته ډکې مرستې کړي؛ خو زه له نړیوالې ټولنې غواړم له هغو خلکو سره، چې له یو بل بېړني حالت سره مخ دي؛ خپلې د ژغورنې ژمنې دوامداره او ملاتړ ترې وکړي.
د شنبې پر ورځ الاکبروف د ملګرو ملتونو د نورو ادارو له استازیو سره یو ځای د پکتیکا ولایت ګیان ولسوالۍ د میر صاحب او خان الدین کلیو ته سفر وکړ، چې یوه له هغو سیمو څخه ده، چې خلک یې د تېرې اوونۍ ۶ اعشاریه یوې درجې زلزلې له کبله زیانمن شوي دي.
د افغانستان په پکتیکا او خوست ولایتونو کې د تېرې اوونۍ زلزلې له کبله له ۱۰۰۰ ډېر کسان مړه شوي او له ۲۰۰۰ ډېر نور ټپیان دي.
د ملګرو ملتونو د معلوماتو له مخې؛ یوازې په ګیان ولسوالۍ کې ۲۳۵ تنه مړه شوي او ۶۰۰ نور ټپیان دي.
زلزله ځپلیو سیمو ته د ملګرو ملتونو د پلاوي ورتګ او له اوسیدونکی سره یې لیدنه ښیي، چې ډېریو یې د کورنۍ غړي او ملګري له لاسه ورکړي. د یتیمانو او له کورنیو د بې برخې خلکو کورونه اوس د استوګنې وړ ندي.
الاکبروف زیاته کړې: پر خوراکي مرستو، بېړنيو سرپناوو، لارو کوڅو او سړکونو رغونې سربېره دغه خلک پاکو اوبو د لښتیو بیا رغونې او د کولرا د مخنیوي لپاره د هڅو چمتووالي ته اړتیا لري.
دا په داسې حال کې ده، چې ملګري ملتونو ویلي؛ له داسې انتقالي ملاتړ پرته به په ځبل شویو سیمو کې ښځې، نرینه او ماشومان له کړاو او زغم سره مخ وي.
تازه خبرونه
په افغانستان کې د آسترالیا هوایي ځواکونو د جنګي جرمونو تورونه ښایي اړیکې زیانمنې کړي

د آسترالیا د دفاعي ځواک مشر د چارشنبې پر ورځ ویلي؛ امریکا خبرداری ورکړی، چې په افغانستان کې د آسترالیايي پوځیانو پر ضد د جنګي جرمونو تورونه ښايي د آسترالیا له ځانګړي هوايي ځواک سره د امریکايي ځواکونو د کار کولو مخه ونیسي.
په افغانستان کې د تېرو شل کلونو د عملیاتو پرمهال د بهرنیو ځواکونو لخوا د ملکیانو د وژنې او جنګي جرمونو دوسیې یو د بل پسې بربنډيږي.
له امريکا او ايتاليا وروسته اوس آستراليايي پوځونه په افغانستان کې د خپل شل کلن پوځي حضور پر مهال له بشري حقونو څخه پر سرغړونه او جنګي جرمونو تورن شوي دي.
که څه هم لسګونه آسترالیايي ځانګړي ځواکونه په افغانستان کې د ۳۹ ملکي وګړیو او بې وسلې بندیانو پر وژلو تورن دي؛ خو له دې ډلې د آسترالیا د ځانګړیو ځواکونو د یوه سرتېري رابرت سمیت محاکمه نن په کانبرا کې پیل شوه.
رابرت سمیت په ۲۰۱۰ کال کې د آسترالیا تر ټولو لوړ پوځي اعزاز ترلاسه کړ؛ خو په دې وروستيو کې آستراليايي رسنيو خبر ورکړ، چې په افغانستان کې يې د خپل ماموريت پر مهال شپږ افغان ملکي وګړي وژلي دي.
د آسترالیا د وسلهوالو ځواکونو ستر درستیز انګوس کمپبل ويلي، چې په ۲۰۲۱ ز. کال کې یې د امریکا له لوري په یوه لیک خبرداری ورکړ شوی، چې که آسترالیايي ځواکونو په افغانستان کې د خپل پوځي حضور پرمهال جنګي جرمونه او له بشري حقونو سرغړونه کړې وي؛ نو دا به د دې لامل شي، چې امریکا له لسترالیا سره پر مرستو او اړیکو بیا کتنه وکړي.
په آسترالیا کې د بشري حقونو د څار ادارې رییسې هیله څرګنده کړې، چې په افغانستان کې د آسترالیايي پوځیانو د جنګي جرمونو د تورنو په اړه څېړنه به نور هېوادونه هم دې ته اړ کړي، چې د خپلو پوځیانو تورونه وڅېړي.
میرمن ګوشان د آسترالیا د حکومت دغه کار د عدالت د تامین په برخه کې یو مهم ګام وباله.
په آسترالیا کې د بشري حقونو د څار ټولنې رییسه داینالا ګوشان وایي: زه هیله منه یم، چې د آسترالیايي پوځیانو محاکمه به یوازنۍ پېښه نهوي پر دوی سربېره نور هغه ځواکونه، چې له دغه راز تورونو سره مخ دي هم باید همداسې چلند ور سره وشي.
له دې مخکې د آسترالیا د وسلهوالو ځواکونو عمومي مفتش کره شواهد وړاندې کړي وه، چې د آسترالیا د ځانګړیو ځواکونو ۲۵ غړي د ۳۹ ملکي افغانانو پر وژلو او د دوه نورو په ځورونه کې لاس لري او دا ټولې دوسیې د څېړنو لپاره د ځانګړیو ځواکونو دفتر ته استول شوي دي.
تازه خبرونه
د امریکا جمهوري غوښتونکيو پر اسلامي امارت د بندیزلګولو نوی ټینګار څرګند کړ

فاکس نیوز څرګنده کړې؛ تېره ورځ یو شمېر جمهوري غوښتونکيو سناتورانو د افغانانو بشري حقونو ته د نه درناوي له کبله پر اسلامي امارت د نویو سختو بندیزونو د لګولو لپاره د لایحې پر چمتوکولو کار پیل کړ.
د فاکس نیوز د څرګندونو له مخې؛ دا لایحه د امریکا له ولسمشره غواړي، چې پر اسلامي امارت د ترهګریزو فعالیتونو، مخدره توکو قاچاق او د ښځو پر وړاندې د ناوړه چلند په ګډون د افغانانو له بشري حقونو څخه د سرغړونو له کبله؛ بندیز ولګوي.
که دا لایحه تصویب شي؛ نو د اسلامي امارت په ملکیت کې به ټولې معاملې بندې او منع کړي. دغه راز ټولې ویزې یا نور هغه اسناد به باطل کړي، چې امریکا ته د ننوتلو اجازه ورکوي.
دا لایحه څو نورې غوښتنې هم لري، چې اسلامي امارت یې باید د نورو بندیزونو د مخنیوي لپاره ومني.
فاکس نیوز په ډاګه کړې، چې دا لایحه له ټولو ترهګرو ډلو سره د اړیکو پرېښودل، بشردوستانه ډلو ته د زیان منونکیو اوسیدونکیو اړوند سیمو ته د بشپړ لاسرسي زمینه برابرول، اوسیدونکیو ته اجازه ورکول، چې له خپلې خاورې ووځي. دغه راز بشري حقونه، د ښځو حقونه او مطبوعاتو د آزادۍ پېژندل رانغاړي.
د اسلامي امارت د ویاند مرستیال بلال کریمي په دې اړه څرګنده کړې؛ د انزوا او بندیزونو د زیاتولو سیاست ستونزې نهحلوي، بلکې اړیکې به ترینګلې کړي.
نوموړي ټینګار کړی، چې د ستونزو د اواري لپاره باید له دیپلوماتیکو لارو هڅې وشي.
تازه خبرونه
نړۍ دې د سر د خطر تر نامه لاندې افغانانو ته پناه نهورکوي – متقي

د افغانستان اسلامي امارت د بهرنیو چارو وزیر امیر خان متقي د سې شنبې پر ورځ ( د غبرګولي نهمه) د بهرنیو چارو وزارت د خواخوږۍ په یوه پروګرام کې څرګنده کړې، چې په هېواد کې امنیت خوندي دی او افغانان باید له خپل هېواده ونهوځي.
امیرخان متقي په بلغاریا کې پر قاچاقي لاره د وژل شویو افغانانو له کورنیو سره په کتنه کې ټینګار کړی، چې اسلامي امارت د خلکو د ژوند، مال او عزت ساتونکی دی او هیڅ وګړی باید د نظام د بدنامولو له پاره بهر ته د تلو دوسیې جوړې نهکړي.
په دې کتنه کې امیرخان متقي له نړیوالې ټولنې وغوښتل، چې د افغانستان د حکومت او خلکو پر وړاندې خپل بندیزونه پای ته ورسوي.
هغه څرګنده کړې: نړۍ بايد د افغانستان استعدادونو، کدرونو او وياړونو ته زيان ونهرسوي او له افغانستان څخه دې د کدرونو او کاري ځواک د ایستلو هڅې ودروي.
امیرخان متقي له هېوادوالو په ځانګړي توګه له ځوانانو وغوښتل، چې په افغانستان کې پاتې شي او بهر ته پر قاچاقي لارو خپل ژوند له خطر سره مخ نهکړي.
امیرخان متقي په دې باور دى، چې په هېواد کې اسلامي امارت ته زياتې ستونزې نړيوالې ټولنې جوړې کړي او په افغان ولس یې بندزونه لګولي دی.
د بهرنیو چارو وزیر ټینګار کړی، چې ټول هېوادوال بهر ته د تګ لپاره آزاد دي؛ خو بهر ته د رسېدو لپاره باید د نظام د بدنامولو لپاره دوسیه جوړه نکړي.
هغه له نړۍ هم وغوښتل، چې نور ظلم مه کوئ، شل کاله جګړه بس ده، بې شمېره افغانان یې شهیدان کړل.
دغه راز د دې غونډې یو شمېر ګډونوالو ويلي، چې ډېري ځوانان د انساني قاچاقبرانو په لومه کې لویږي او له خطرناکو لارو بهر ته وځي.
په بلغاریا کې د یوه افغان قرباني د کورني غړی له اسلامي امارت څخه غوښتنه کوي، چې د انساني قاچاقبرانو د فعالیتونو مخه ونیسي.
تېره اوونۍ د هغو ۱۸ افغانانو مړي، چې په بلغاریا کې پر قاچاقي لاره مړه شوي وه؛ د اسلامي امارت له لوري کابل ته رالېږدېدلي او خپلو کورنیو ته وسپارل شول.
-
تازه خبرونه3 days ago
یو شمېر ګړۍ د ایران او افغانستان سرحدي نښتو ته لمن وهي – ایران
-
نړۍ2 days ago
بې پیلوته الوتکو د روسیې د تېلو پر دوه چاڼځایونو برید وکړ
-
د هوا حالاتو بدلونونه4 days ago
په ۱۳ ولایتونو کې وروستیو اورښتونو۳۷ کسانو ته مرګ و ژوبله اړولې
-
سیمه ییز خبرونه2 days ago
په سپين بولدک کې د باروړونکیو موټرو لپاره نارسمي لار پرانستل شوه
-
روغتيا4 days ago
د کندهار عینو مېنې روغتون له ایم آر آی او ایکس رے وسایلو برخمن شو
-
لوبی4 days ago
چینای سوپر کینګز د هند غوره لیګ اتلولي خپله کړه
-
سیمه ییز خبرونه3 days ago
د پاکستان او روسیې تر منځ د سوداګرۍ دوه اړخیز بحري لېږد رالېږد پیل شو
-
سوداگري4 days ago
نړیوالو بازارونو ته د تازه میوو د صادراتو بهیر پیل شو