د قرغزستان بهرنیو چارو وزارت ویلي، چې د قرغزستان او اروپايي ټولنې ترمنځ د پراختیایي همکارۍ د فرعي کمیټې اوومه غونډه د جمعې پر ورځ په بشکیک کې ترسره شوې ده.

په دې غونډه کې د قرغزستان پلاوي، چې مشري یې د بهرنیو چارو وزارت مرستیال مدر اباکیروف کوله، او د اروپايي ټولنې پلاوي، چې مشري یې د اروپايي کمیسیون په نړیوالو ملګرتیاوو مدیریت کې د مرکزي آسیا او افغانستان د څانګې مشرې شارلوټ اډریان کوله، ګډون کړی و.

په دې غونډه کې د قرغزستان د بېلابېلو دولتي ادارو استازو ګډون کړی و او د بنسټیزو آسانتیاوو او پانګونې لومړیتوبونو او همدارنګه د قرغزستان او اروپايي ټولنې ترمنځ د همکارۍ د مهمو وسایلو په پلي کولو کې پر پرمختګ راوڅرخېدل.

شارلوټ اډریان هم د «نړیواله دروازه» نوښت په چوکاټ کې مثبت پرمختګونه وستایل او په ځانګړي ډول یې د قرغیزستان او د اروپا د پانګونې بانک ترمنځ د انرژۍ په برخه کې د همکارۍ د هوکړه‌لیک لاسلیک یو مهم ګام وباله.

په پای کې، دواړو لوریو د دوه‌اړخیزو او سیمه‌ییزو همکاریو د اړینو موضوعاتو په اړه د نظرونو تبادله وکړه او د ګډو لېوالتیاوو په برخو کې یې د اړیکو د پیاوړتیا او همکاریو د اغېزمنتیا د زیاتولو لپاره یې لومړیتوبونه وټاکل.

د مهاجرینو او راستنېدونکو چارو وزیر مولوي عبدالکبیر په افغانستان کې د ملګرو ملتونو د کډوالۍ د عالي کمیشنرۍ له استازي عرفات جمال سره راستنو شویو افغانانو ته د اړینو مرستو رسولو او په کاري ساحه کې د خنډونو لرې کولو په اړه بحث او خبرې کړې دي.

مهاجرینو او راستنېدونکو چارو وزارت د خپرې شوې خبر پاڼې له مخې؛ په دې لیدنه کې، چې تېره ورځ ترسره شوې عرفات جمال د کډوالو چارو وزارت له همکاریو څخه د مننې تر څنګ ویلي، چې کونړ ته د ورستنو شویو د اړتیا وړ سلګونه خیمې چمتو شوي او ژر به سیمې ته ولیږل شي.

عرفات جمال په نړیواله کچه د بشري مرستو کمېدا ته په نغوته(اشاره ) کې ویلي، چې هڅه کوي د افغان راستنو شویو د لاسنیوي لپاره اړینې مرستې راجلب او بدیلې لارې ولټوي.

د ملګرو ملتونو د کډوالۍ د عالي کمیشنرۍ استازي یادونه کړې، چې ځينې راستانه شوي افغانان مدني اسناد نلري او د اړینو اسنادو په وېش کې یې د ملګرو ملتونو پر همکارۍ ټېنګار وکړ او د څو اړینو مسلو په اړه یې خپل وړاندېزونه وړاندې کړل.

په خبرپاڼه کې راغلي؛ مولوي عبدالکبیر د کډوالو په برخه کې د ملګرو ملتونو له مرستو او همکاریو د څخه د مننې پر مهال ویلي؛ د ژمي له راتګ سره د اسلامي امارت له‌خوا راستنو شویو ته پر خوراکي توکو سربـــېره د نغدي مرستو لړۍ هم پیل شوې، چې نړیوال باید بشري مرستې پر سیاسي مسایلو پورې ونه‌تړي.

ویل کیږي، چې مولوي عبدالکبیر د کډوالو په چارو کې د ملګرو ملتونو ادارو ته د بېلابېلو همکاریو د دوام ډاډ ورکړ او شریکو شویو وړاندېزونو ته یې د رسېدنې ډاډ څرګند کړ.