Connect with us

سوداگري

د افغانیو ارزښت د ډالر پر وړاندې ډېر راټیټ شوی

Published

 on

(Last Updated On: ليندۍ ۱۷, ۱۴۰۰)

په کابل کې د سې شنبې پر ورځ د اسعارو د تبادلې تر ټولو لوی بازار (سرای شهزاده) څرګنده کړې، چې د افغانیو پر وړاندې د ډالر ارزښت په بې ساري توګه لوړ شوی دی.

دا د دوشنبې پر ورځ یو ډالر له ۹۶.۹ افغانیو سره تبادله کېده او نن ۱۰۰ افغانیو ته لوړ شو.

د افغانستان بانک، په یوه خبرپاڼه کې راغلي، چې په افغانستان کې د ډالرو د تقاضا لوړېدل د افغانۍ ارزښت راټیټ کړی او له خلکو یې وغوښتل، چې په ورځنيو سوداګریزو راکړو ورکړو کې یوازې افغانۍ وکاروي، چې د ملي اسعارو ثبات رامنځته کړي.

اقتصاد پوهانو ويلي: د افغانۍ د ارزښت کمېدل به افغانان زیانمن کړي؛ ځکه، چې له تېرو څو کلونو یې ارزښت مخ پر راټیټېدو دی.

دوی وايي، د افغانیو راټیټېدل به د لومړنیو خوراکي توکو د بیو د لوړېدو لامل شي؛ ځکه، چې د دغو محصولاتو ډېره برخه په امریکايي ډالرو واردېږي.

 په هېواد کې د بانکي خدمتونو په اړه اندېښنې، چې د تېر حکومت پر مهال او له سقوط وروسته یې رامنځته شوي اوس هم عادي حالت ته راګرزېدلي ندي.

تېره میاشت مرکزي بانک د پیسو پر ایستلو محدودیتونه نرم کړل او خلکو ته یې اجازه ورکړه، چې په اوونۍ کې تر ۴۰۰ یا ۳۰ زره افغانیو او په میاشت کې تر ۱۲۰۰ ډالرو یا سل زره افغانیو پورې وباسي.

د درې میاشتو له تېرېدو وروسته بیا هم په هېواد کې د بانکي بندیزونو ستونزه پر ځای پاتې ده او هېوادوال نشي کولی خپلې شتمنۍ د عادي پروسې له لارې له بانکونو راوباسي.

کابل ښاریانو ويلي؛ د بانک لخوا د بانکي خدمتونو وړاندې کول محدود دي او د پیسو د ترلاسه کولو په برخه کې د خلکو ستونزې د هرې ورځې له تېریدو سره ډېریږي.

د بېوزلۍ او لوړې بیکارۍ له خپریدو سره ښاریان غواړي خپلې شتمنۍ له بانکونو څخه راوباسي.

له بانکه د پیسو غوښتونکی ظریف الله نومی وایي: هره ورځ مونږ ته ویل کیږي، چې سهار ته وختي راشئ. ډېري خلک ستونزې لري؛ راتلی نشي له یوه بانکه بل بانک ته ځو د ګڼه ګوڼې له کبله ان اعلان شوې ۳۰ زره افغانۍ هم راایستلی نشو.

د بانک یو بل ګډونوال مولانا وایي: “د ګڼه ګوڼې له کبله مونږ د شپې درې بجې راځو؛ مونږ نه بریالي کیږو، چې خپلې د اړتیا وړ پیسې راوباسو. له دوه درې ورځو وروسته د دوه سوه کسانو نومونه اخیستل کیږی.

د افغانستان په سلګونه هېوادوال، چې پیسې یې په خصوصي بانکونو کې کنګل شوي دي؛ له اسلامي امارت څخه غوښتنه کوي، چې د دوی ستونزو ته یې پام راواړوي.

مروه نومې وایي: هو! مونږ هره ورځ بانکونو ته ځو؛ خو خپلې پیسې تر لاسه کولی نشو.باید دا ستونزې حل شي، چې خلک خپلې پیسې تر لاسه کړي.

د افغانستان بانک د اړیکو مسوول حسیب الله نوري وایي: په اوسني وضعیت کې د خلکو اندېښنې د درک وړ دي او له همدې کبله چارواکي په بانکونو کې د خلکو د ستونزو د حل لپاره پر یوه پلان کار کوي.

د بانکي ستونزو په اړه اندېښنې په داسې حال کې زیاتې شوې، چې د بهرنیو اسعارو په ځانګړې توګه د ډالر پر وړاندې د افغانیو بیه بېسارې راټیټه شوې ده. د سې شنبې پر ورځ د کابل په بازارونو کې یو امریکایي ډالر پر ۱۰۰ افغانیو بدلیده.

سوداگري

په نږدې راتلونکې کې به ۱۸ ټنه جلغوزي د ځمکې له لارې ایتالیا ته صادر شي

Published

on

(Last Updated On: وږی ۳۱, ۱۴۰۱)

د صنعت او سوداګرۍ وزارت وايي؛ په نږدې راتلونکي کې به د افغانستان اته لس ټنه جلغوزي د یوه خصوصي شرکت لخوا د نړیوال پروسس له معیار سره سم ایتالیا ته صادر شي.

د صنعت او سوداګرۍ وزارت وايي، چې د روان کال په لومړۍ ربع کې بهر ته د ۱۹ ميليون امريکايي دالرو پر ارزښت جلغوزي صادر شوي او دا شمېرې د لوړېدو په حال کې دي.

د صنعت او سوداګرۍ وزارت وايي، چې په هېواد کې هر کال د جلغوزيو ۳۰ زره ټنه حاصلات را ټوليږي. له دې مخکې خصوصي سکتور شکايت کړی و، چې د افغانستان جلغوزي په ټيټه بيه پاکستان ته صادريږي او هغه هېواد يې له پروسس وروسته په خپل نوم بهرنيو مارکيتونه ته لېږي.

 د صنعت او سوداګرۍ وزارت د څرګندونو له مخې؛ په افغانستان کې هر کال د جلغوزيو ۳۰ زره ټنه حاصلات را ټوليږي او د هرې میاشتې له تېرېدو سره د سیمې او نړۍ هېوادونو ته د جلغوزیو صادرات د زیاتوالي په حال کې دي.

د صنعت او سوداګرۍ وزارت ویاند عبدالسلام آخوندزاده جواد وایي: دا نوي صادارت به د ځمکې له لارې لومړی له افغانستان څخه ترکیې او له تر کیې بیا ایتالیا ته صادریږي او مونږ په کور دننه اوس د دې وړتیا لرو، چې خپل تولیدات  اروپايي بازارونو ته ستندرد پروسس کړو.

د افغانستان د صنایو او کانونو خونې غړیو د معلوماتو له مخې، افغانستان هر کال ۳۰زره ټنه جلغوزي تولیدوي، چې په تېرو کلونو کې چین، سعودي عربستان، متحده عربي امارات، هند او پاکستان ته د هوا او ځمکې له لارې صادریږي.

د کابل د صنایعو او کانونو خونې اجرائیه رییس محمد کریم عظیمي وایي: مونږ ایتالیا ته د افغان جلغوزیو صادرات اړین بولو اوس په افغانستان کې د صادراتو په برخه کې پوره وړتیاوې لرو. باید د صنعت او سوداګرۍ وزارت د صادراتو لپاره زمینه برابره کړي.

د اقتصادي چارو کارپوهانو ويلي، چې که د صنعت او سوداګرۍ وزارت د سیمې له هېوادونو سره د افغانستان د صادراتو د ترانزیت ستونزې اواري کړي؛ په افغانستان کې د وچې او تازه میوو په ګډون د صادراتو لپاره پوره وړتیاشته.

د اقتصادي چارو شنونکی تاج محمد تلاش وایي: اروپايي بازارونو ته د هېواد د جلغوزیو رسول ډېر اړین دي. د جلغوزیو تر څنګ مونږ په هېواد کې نور اړین سوداګریز او صادراتي توکي لرو، چې باید صادراتو ته یې زمینه برابره شي.

د افغانستان د جلغوزیو په ګډون د دغه هېواد نوره وچه میوه په چین کې ښه بازارونه لري.

چینایي سرچینو له دې  مخکې  ژمنه کړې وه، چې له افغانستان سره د توکو په صادراتو کې مرسته کوي.

دا په داسې  حال کې ده، چې په افغانستان کې د تېر یو کال راپدیخوا د نظام له بدولون وروسته د هوايي دهلېزونو له بندېدو سره له دغه هېواد څخه د وچې میوې صادرات ټکني شوي دي.

Continue Reading

سوداگري

د افغانستان د زعفرانو پنځوس سلنه صادرونکي شرکتونه تړل شوي

Published

on

(Last Updated On: وږی ۳۰, ۱۴۰۱)

د افغانستان د کرنې اومالدارۍ خونې مسوولینو ويلي، چې د هېواد د زعفرانو پنځوس سلنه صادرونکي شرکتونه تړل شوي دي.

زعفران د هېواد یوله مهمو کرنیزو محصولاتو څخه دی، چې په وروستیو څلور کلونو کي او صادرونکي د کرونا ویروس، جمهوریتي ټاکنیزې ستونزې او د نظام  بدلون نور هغه عوا مل ول،  چې د هېواد د زعفرانو سکتور ورسره له ګڼو ستونزو سره مخ شو.

د کرنې اومالدارۍ خونې غړي وايي، چې د هېواد زعفران په وروستیو کلونو کې له نړیوال شهرته برخمن شوي؛ خو اوس يي حالت ورځ تر بلې له  ننګونو سره مخ دی.

دوی د کرنې او مالدارۍ  له وزارته غواړي، چې د هېواد په کچه باید د دې اړین  کرنیز محصول د کښت او صادراتو د پراختیا لپاره کار وکړي.

د کرنې او مالدارۍ خونې مرستیال میرویس حاجي زاده وایي: د هېواد زعفران په نړیوال بازار کې ښه نوم او ښه پېرو دونکي لري. هیله لرو، چې سکتوري وزارتونه دې ته  خپله پوره پاملرنه راواړوي.

د زعفرانو ټولني غړي هم وايي؛  په دې  برخه کې فعالیت کوونکي شرکتونو شمېر۷۰ ته رسیده، چې په کې سلګونه هېوادوالو په بېلابېلو برخو کې کار کاوه؛ خو اوس د پنځوس سلنه شرکتونو هڅې درېدلې دي.

د زعفرانو د صادروونکیو شرکتونو ټولنې غړی محمد ناصر فیضي وایي؛ زمونږ ستونزه له تېرو څلور کلونو راپدیخوا روانه ده او مونږ اوس د صادراتو لپاره له ستونزو سره مخ  یوو؛ تولید مو هم کم شوی. اسلامي امارت باید دې سکتور ته پوره پاملرنه وکړي.

د کرنې او مالدارۍ وزارت مسوولین وايي، چې  د زعفرانو سکتور د پراختیا لپاره يې خپلې هڅې  پراخې کړي او زیاتوي، چې د هېواد په یو شمېر ولایتونو کې یې د زعفرانو د پیازو د وېش بهیر پیل کړی او د دې سکتور د نورې پراختیا هڅې هم روانې دي.

د کرنې او مالدارۍ  وزارت  ویاند مولوي مصباح الدین  مستعین وایي: مونږ هڅه کوو، چې د زعفرانو کښت، تولید او صادراتو د پراختیا لپاره نورې آسانتیاوې هم زیاتي کړو او د تېیر په څېر بیا هم په نړیوال بازار کې خپل مشتریان ولرو.

د اقتصادي چارو کارپوهان هم د کرنې او مالدارۍ  له وزارته غواړي، چې د هېواد د کرنیزو محصولاتو د پراختیا او ورته  د بازار موندنې په برخه کې له خصوصي  سکتور سره د دولتي سکتور همکاري او همغږي  پراخه کړي.

Continue Reading

سوداگري

کورنیو چارو وزارت ته د ډبرو سکرو رسولو سیالي یوې میرمنې وګټله

Published

on

(Last Updated On: وږی ۳۰, ۱۴۰۱)

 د کورنیو چارو وزارت چارواکو څرګنده کړې؛ دغه وزارت ته د ډبرو سکرو د رسولو د داوطلبۍ په سیالۍ کې یوه سوداګره ښځه بریالۍ شوې ده.

د کورنیو چارو وزارت د تدارکاتو رییس حافظ محمد صدیق صدیقي د تلې پر نهه ویشتمه ویلي، چې د ډبرو سکرو د تدارکاتو د داوطلبۍ سیالي رڼه ترسره شوې، چې په پایله کې یې یوه سوداګره میرمنه بریالۍ شوې ده.

د نوموړي د څرګندونو له مخې؛ د نوبهار افضلي شرکت، چې مشري يې يوه سوداګره میرمن داکتره عزيزه افضلي لري؛ دغه پروژه ګټلې ده.

صدیق صديقي ويلي؛ د کورنيو چارو وزارت د دغې پروژې د داوطلبۍ لپاره هڅې څه وخت مخکې پیل شوي او څو خصوصي شرکتونو په دې داوطلبۍ کې سيالي وکوله.

هغه وایي: د اصولو له مخې؛ مونږ سوداګرو او د شرکتونو لرونکیو ته بلنه ورکړې وه، چې په کې ښځينه سوداګرو هم برخه اخيستې وه او ټولو يې خپل وړانديزونه راوړي وه او بهیر یې ښه روڼ ترسره شو. د دې داوطلبۍ په پایله کې، ګټونکی شرکت هغه شرکت دی، چې یوه ښځه یې مشري لري او د دې داوطلبۍ ګټونکې وپېژندل شوه.

د نوبهار افضلي شرکت مشرې داکترې عزیزه افضلي د داوطلبۍ له بهیر څخه خوښي څرګنده کړه او له سوداګرو میرمنو یې وغوښتل، چې په د دغه راز پروژو په سیالیو کې ونډه واخلي.

د میرمن افضلي د څرګندونو له مخې؛ د سیالۍ بهیر پوره روڼ او بریالۍ شوم، چې دا پروژه وګټم. هغه میرمنې، چې سوداګریزې هڅې کوي؛ کولی شي په دغه راز بهیرونو کې ګډون وکړي.

Continue Reading

Trending

Copyright © 2022 Ariana News. All rights reserved!