Connect with us

تازه خبرونه

د امنیتي ځواکونو تر څنګ ملیشې جوړول به کورنۍ جګړه رامنځته کړي ـ جنرال میلر

خپور شوی

د

(Last Updated On: چنګاښ ۹, ۱۴۰۰)

په افغانستان کې د امریکایي ځواکونو قومندان جنرال سکاټ میلر د سې شنبې پر ورځ د هېواد د امنیتي وضعیت په اړه هر اړخیزې ارزونې وړاندې کړې او خبرداری یې ورکړ، چې له ملي، امنیتي او دفاعي ځواکونو سره د مرستې لپاره ګومارل شوې ملیشې کېدی شي دغه هېواد کورنۍ جګړې ته ورټېل وهي.

له یوې خوا په هېواد کې جګړې پراخې شوي، چې طالبانو د هېواد ځینې سیمې او ولسوالۍ نیولې او له بلې خوا بهرني ځواکونه له افغانستان څخه وځي. خلک اندېښمن دي، چې طالبان ممکن د  بهرنیو ځواکونو له وتو وروسته د تاوتریخوالي له لارې واک او ځواک ته د رسېدو هڅې وکړي.

هغه ټینګار کړی، چې طالبان باید د جګړې له لارې د واک د ترلاسه کولو هڅه ونکړي.

میلر په کابل کې له خبریالانو سره د خبرو پر مهال ویلي، که طالبان پر ولسوالیو بریدونه ونه دروي؛ امریکا به له افغان ځواکونو پوځي ملاتړ روان وساتي.  

نوموړی خبرداری ورکوي؛ که طالبان خپلو بریدونو ته دوام ورکړي، دوی به د دوحه د هوکړې له مخې د افغان ځواکونو ملاتړ وکړي او د طالبانو پر وړاندې به هوايي بریدونه روان وساتي.

میلر ویلي: ما طالبانو ته د بریدونو د درولو وړاندیز کړی و، چې بریدونه مو صفر ته راکم شي.زه اوس هم واک لرم، چې له افغان او خپلو ځواکونو ملاتړ او دفاع وکړم.

 که څه هم جګړې زور اخیستی؛ خو سکاټ میلر ویلي، چې زه د دوی پر اندېښنو پوهیږم؛ دوی ښیي، چې  امنیتي حالت به د هېواد په ګوټ ګوټ کې څه ډول  شي. د طالبانو موخه د واک تر لاسه کول دي. بهرني ځواکونه باید له ځان او دې افغان ځواکونو ساتنه وکړي.

نوموړي ویلي؛ هغه څه، چې مونږ یې تر سره کولی شو؛ نورو ته د غوراویو وړاندې کول دي. که سپارښتنې بدلې شي، نو مونږ هم د انعطاف وړتیاوې لرو.

په افغانستان کې د نړیوالو ځواکونو پخوانی قومندان ډیویؤ پټریوس له ټولو ډېر اندېښمن دی، هغه یو ځل بیا وایي؛ وېره شته، چې د نړیوالو ځواکونو له وتو وروسته د کورنۍ جګړې د پېلېدو په اړه اټکل شوې سناریو پېښه او د ډېرو ولسوالیو له سقوط سره یې شونتیا نوره هم پیاوړې شي.

په افغانستان کې د نړیوالو ځواکونو پخواني قومندان زیاته کړې؛ د امنیتي حالت د ښه والي او ټیکاو لپاره باید ائتلافي ځواکونه، امریکا او افغان دولت ګډ کار وکړي.

په افغانستان کې د نړیوالو ځواکونو پخوانی لوی قومندان ډیویډ پټریوس وایي: زه له دې وېره لرم، چې مونږ افغانستان د یوې کورنۍ جګړې پر لور بونځوو او داسې ښکاري، چې شرایطو ته په کتو ممکن دا سناریو لکه، چې مخکې یې فکر کېده، را منځته شي.

د طالبانو د مرکچي ډلې غړي شهاب الدین دلاور یو ځل بیا طالبان جګړې ته را بولي او د افغانستان جګړه په خپل باور سپیڅلی جهاد بولي او وایي؛ د اسلام په تاریخ کې له صحابه وو او تابعینو له جهاد وروسته اوسني جهاد ته ورته بل جهاد نشته او دا جهاد هغه چاته پاتې دی، چې نن یې پګړۍ تړلې.

دا په داسې حال کې ده، چې امریکا له طالبانو او وسلوالو مخالفانو سره د مبارزې لپاره افغان ځواکونو ته د بلک هاک چورلکو د ورسپارلو ژمنه کړې او تر څنګ یې په افغانستان کې د پوځي قرادادیانو او یوشمېر پوځیانو پر شتون ټینګار هم کړی دی.

تازه خبرونه

له عربي متحده اماراتو څخه بلخ ولایت ته لومړۍ سوداګریزه الوتنه تر سره شوه

Published

on

(Last Updated On: کب ۴, ۱۴۰۲)

د اسلامي امارت له بیا رامنځته کېدو وروسته د لومړي ځل لپاره له عربي متحده اماراتو څخه د بلخ ولایت هوايي ډګر ته د هوايي دهلیز له لارې الوتنه ترسره شوه.

 د مولانا جلال الدین محمد بلخي هوايي ډګر مسوولینو ویلي، چې د بیات پاور شرکت ۱۶ ټنه برښنایي سوداګریز توکي له دوبۍ څخه مزارشریف ښار ته راولېږدول شول.

په دې اړه د مولانا جلال الدين محمد بلخي هوايي ډګر د ګمرک رييس عبدالله موحد ويلي: دا لومړى ځل دى، چې له دوبۍ څخه مزارشريف ته د هوايي دهلېز له لارې الوتنه کېږي. له سوداګرو سره خبرې اترې روانې دي او مونږ هیله لرو، چې دا دهلیز په راتلونکي کې هم فعال پاتې شي.

د بلخ د سوداګرۍ او پانګونې خونې چارواکي د هوايي دهلېز پر پرانیستلو او د هوا له لارې د سوداګریزو مالونو د لېږد د عمومي بهیر پر پیل ټینګار کوي.

د بلخ د سوداګرۍ او پانګونې خونې مشر اسدالله اسدي څرګنده کړې: د هوايي کارګو له لارې د سوداګريزو مالونو د لېږد په برخه کې ډېرې مهمې ستونزې شته.

دا په داسې حال کې ده، چې له دې مخکې هم د مولانا جلال الدین محمد بلخي هوايي ډګر د هوايي دهلېز له لارې جلغوزي او نور سوداګریز توکي د سیمې هېوادونو ته صادرېدل.

Continue Reading

تازه خبرونه

د اسلامي امارت د غوښتنو له منل‌کېدو پرته به د م.م په غونډو کې ګډون ونه‌کړو- مولوي عبدالکبیر

Published

on

(Last Updated On: کب ۴, ۱۴۰۲)

د ریاست الوزراء سیاسي مرستیال مولوي عبدالکبیر د دوحې په ناسته کې د اسلامي امارت د پلاوي د ګډون په اړه د ملګرو ملتونو وروستۍ پرېکړې ته ګوته ونیوله او هغه یې ناسمه وبلله.

مولوي عبدالکبیر په دې اړه څرګنده کړې؛ که ملګري ملتونه او هېوادونه د اسلامي امارت غوښتنې ومني؛ نو د ملګرو ملتونو او هېوادونو په راتلونکیو غونډو کې به د افغانانو استازیتوب وکړي.

د ارګ په خبرپاڼه کې راغلي، چې تېر ماښام (پنجشنبه د کب درېیمه) په کابل کې د افغانستان اسلامي امارت د رياست الوزراء سياسي مرستيال مولوي عبدالکبیر له سراج الاسلام دارالعلوم څخه د فارغو شویو عالمانو د دستار بندۍ پر مهال ویلي؛ که د اسلامي امارت غوښتنې ومنل شي؛ نو د ملګرو ملتونو او هېوادونو په راتلونکیو غونډو کې به د افغانستان پر استازیتوب ګډون وکړو.

د یادونې ده، چې د دوحې له غونډې مخکې د افغانستان بهرنیو چارو وزارت چارسمبالي له ملګرو ملتونو څخه د خبرو اترو او تعامل لپاره د استازیتوب غوښتنه کړې وه؛ خو د نه منل کېدو پر دلیل بیا اسلامي امارت په دې غونډه کې د نه ګډون پرېګړه وکړه.

Continue Reading

تازه خبرونه

په افغانستان کې د ګډو ګټو لپاره یوه ځواکمنه اجماع رامنځته شوې – ټوماس ویسټ

Published

on

(Last Updated On: کب ۴, ۱۴۰۲)

د افغانستان لپاره د امریکا ځانګړي استازي ټوماس ویسټ د پنجشنبې پر ورځ (د کب درېیمه) په ایکس پاڼه کې لیکلي، چې د فبرورۍ پر اتلسمه او نولسمه د دوحې له تر سره شوي دوه ورځني کنفرانس څخه واشنګټن ته راستون شوی دی.

ټوماس ویسټ د دوحې د غونډې په اړه څرګنده کړې؛ هیڅ هېواد نه غواړي، چې د تروریزم ګواښ له افغانستان څخه راپورته شي او ټول کار او ټولنیز ژوندانه ته د افغان نجونو د راګرځېدا او د منځنيو ښوونځيو، لیسو او پوهنتونونو د پرانیستې غوښتونکي دي.

د افغانستان لپاره د امریکا ځانګړي استازي دا هم ویلي، چې له افغانانو سره د مرستې لپاره کلکې ژمنې شته؛ خو د اقتصادي ثبات او د افغانانو د اقتصادي راتلونکي مالکیت په اړه اندېښنې شته.

ټوماس ویسټ د اسلامي امارت له‌خوا د کوکنارو پر کښت د بندیز د پلي کیدو یادونه هم کړې او وایي، چې ډېرو هېوادونو منلې او د ملګرو ملتونو د اړوندې ادارې د ارزونې له مخې د کوکنارو په کښت کې ۹۵ سلنه کموالی راغلی دی.

دغه راز نوموړي د افغانستان د مدني ټولنې له استازو سره ناستې ته نغوته کړې او ټینګار کوي، چې امریکا د ملګرو ملتونو پر مشرۍ د افغانستان په اړه د دغه راز غونډو له جوړېدو ملاتړ کوي.

همدارنګه په دې اړه وایي، چې د افغانانو او نړیوالو ګډې ګټې باید د دغو غونډو په‌سر کې وي.

دا په داسې حال کې ده، چې افغانستان د دوحې له غونډې مخکې د بهرنیو چارو وزارت چارسمبالي پر استازیتوب له ملګرو ملتونو څخه دې غونډې ته د لوړې کچې د خبرو اترو او تعامل وړاندیز کړی و؛ خو د نه منل کېدو پر دلیل بیا اسلامي امارت په دې غونډه کې د نه ګډون پرېګړه وکړه.

Continue Reading

Trending

Copyright © 2022 Ariana News. All rights reserved!