د قطر لومړي وزیر د ژورې اندیښنې په څرګندولو سره په خپل هیواد کې د امریکا پر پوځي اډې د ایران برید “د نه منلو وړ عمل” وباله او ټینګار یې وکړ، چې دا برید په سیمه کې د قطر د ډیپلوماټیک رول څخه سرغړونه ده.

د قطر لومړي وزیر شیخ آل ثاني د ایران او اسرائیل ترمنځ له اوربند سرغړونه، چې نن سهار وشوه د منلو وړ ونه ګڼله او وایي، چې دا ډول کړنې ډیپلوماټیکې هڅې ننګوي.

د قطر لومړي وزیر د هېواد له دفاعي ځواکونو ستاینه وکړه، چې د دوشنبې پر ورځ یې په قطر کې د امریکا پر اډو برید په بریالی شنډ کړ.

دا څرګندونې د دوشنبې پر ورځ په قطر کې د امریکا پر العدید هوايي اډې د ایران له توغندیزو بریدونو وروسته په روان زیات شوي تاوتریخوالي کې را،رته شوې.

د قطر حکومت تائید کړه، چې که څه هم ډېری توغندي شنډ شوي؛ یو توغندی پر اډه ولګېد؛ خو هیڅ تلفات یې ندي اړولي. د قطر حکومت دا برید وغانده او له ټولو خواوو یې وغوښتل؛ د خبرو اترو میز ته راستانه شئ، چې د نور تاوتریخوالي زیاتېدا مخه ونیسي.

شیخ آل ثاني په خپله وینا کې د سیمه‌ییز ثبات او امنیت د ډاډمن کولو لپاره د ټولو ښکېلو اړخونو ترمنځ د خبرو اترو او همکارۍ پر اهمیت ټینګار وکړ.

هغه د اوسني تاوتریخوالي د کمولو لپاره د خبرو اترو کوربتوب ته هم د قطر چمتووالی تکرار کړ.

د ایران بهرنیو چارو وزیر عباس عراقچي د سې‌شنبې پر سهار اعلان کړی؛ که څه هم د امریکا ولسمشر ډونالډ ټرمپ د اوربند د پیل ادعا کړې؛ خو له اسرائیل سره د اوربند هیڅ هوکړه نده شوې.

عراقچي په ایکس پاڼه کې لیکلي؛”لکه څنګه، چې ایران پرله‌پسې ویلي: اسرائیلو د ایران پر وړاندې جګړه پیل کړې، نه برعکس. تر اوسه پورې د اوربند یا د پوځي عملیاتو د بندولو په اړه هیڅ هوکړه نشته.”

د عراقچي دا څرګندونه د ولسمشر ټرمپ د مخکني اعلان په ځواب کې وړاندې شوې، چې ایران او اسرائیل د څو ورځو له مخ پر زیاتېدونکې شخړې وروسته له “بشپړ او پوره” اوربند سره هوکړه کړې ده. عراقچي د سې‌شنبې پر سهار په ایکس پاڼه کې ولیکل: “که د اسرائیل بریدونه ودریږي؛ مونږ هم د ځواب ویلو لپاره هیڅ اراده نلرو.”

هغه ویلي: “په دې شرط، چې اسرائیلي رژیم د تهران پر وخت د سهار له څلور بجو وروسته د ایرانيانو پر وړاندې خپل غیرقانوني یرغل ودروي؛ مونږ هیڅ اراده نلرو، چې وروسته خپل غبرګون ته دوام ورکړو.” هغه زیاته کړې، چې “زمونږ د پوځي عملیاتو د بندولو په اړه وروستۍ پرېکړه به وروسته وشي.”

عراقچي تائید کړې، چې د ایران غچ اخیستونکي پوځي بریدونه تر وروستۍ نېټې پورې دوام لري.

هغه ویلي: “له ټولو ایرانیانو سره یوځای زه له خپلو زړورو وسلوالو ځواکونو څخه مننه کوم، چې د خپلې وینې تر وروستي څاڅکي پورې زمونږ د ګران هېواد دفاع ته چمتو دي.”

د دوشنبې پر ورځ د شخړې د پام وړ زیاتوالي پر مهال ایران په قطر کې د امریکا د پوځ پر العدید هوايي اډې توغندیز برید وکړ. دا یوه ورځ وروسته له هغې رامنځته شوه، چې د جون پر دیارلسمه امریکایي هوایي بریدونو له اسراېیل سره د همغږۍ له مخې په ایران کې د ایران درې اټومي تاسیسات پر نښه کړل.

تهران ټینګار کړی، چې د دوی پوځي اقدامات د اسرائیلو او د هغه د متحدینو لخوا له نامشروع تېري وروسته د ځان دفاع ده. نړیواله ټولنه د پراخې سیمه‌ییزې جګړې د وېرې له کبله د تاوتریخوالي کمولو غوښتنه کوي.

د امریکا ولسمشر ډونالډ ټرمپ په ټروت پاڼه کې لیکلي، چې “د ایران او اسرائیلو ترمنځ اوربند” به په راتلونکو څو ساعتونو کې پیل شي.

ټرمپ د دوشنبې پر ماښام په ټروت سوشیل کې ولیکل: “ټولو ته مبارکي! لکه څنګه، چې اسرائیل او ایران په بشپړه توګه هوکړه کړې؛ د دواړو خواوو ترمنځ به بشپړ اوربند (شاوخوا ۶ ساعتونو کې) رامنځته او په جګړه کې به بشپړ کمښت رامنځته شي.”

د امریکا ولسمشر دا هم ویلي، چې له هغې وروسته دواړه خواوې به د هغه پر ​​وینا، په “شپږو ساعتونو کې” د بریدونو له کمولو سره د اوربند پر لور حرکت وکړي. د ایران او اسرائیل ترمنځ به بشپړ اوربند “۱۲ ساعتونو” کې رامنځته شي او جګړه به “پای ته ورسیږي.”

د امریکا د ولسمشر د څرګندونو له مخې؛ “ایران به پر رسمي بڼه اوربند پیل او اسرائیل به په ۱۲ ساعتونو کې اوربند پیل کړي او په پای کې( په ۲۴ ساعتونو کې) به د دواړو هېوادونو ترمنځ ۱۲ ورځنۍ شخړه به پای ته ورسیږي. “د اوربند د هرې کړکۍ په جریان کې بل اړخ به سوله‌ییز چلند وکړي. که هر څه د پلان سره سم ترسره شي. لکه څنګه، چې باید وي، زه غواړم دواړو خواوو؛ اسرائیل او ایران ته د دوی د زغم مبارکي ووایم.”