د هلمند سیمه‌ییزو چارواکو ویلي، یوه ښځه د دغه ولایت په ګرمسېر ولسوالۍ کې له ۱۴ کلن کورني بند څخه د امنیتي ځواکونو د ګډو عملیاتو په لړ کې ژغورل شوې ده.

د هلمند والي ویاند محمد قاسم ریاض ویلي، دغه ښځه د کشفي معلوماتو پر بنسټ د کوپکې په اړوند سیمه کې موندل شوې، چې پر زنځیرونو تړل شوې وه.

د نوموړي د څرګندونو له مخې، ژغورل شوې ښځه د روغتیايي خدمتونو د ترلاسه کولو لپاره روغتون ته لېږدول شوې ده.

د پېښې په تړاو څلور کسان، چې د دغې ښځې پلار او درې وروڼه هم په کې دي؛ نیول شوي دي.

ویل کیږي، چې د پېښې په اړه څېړنې روانې دي او د څېړنو له بشپړېدا وروسته به قضیه د قانوني اقداماتو لپاره اړوندو ادارو ته وسپارل شي.

د عدلیې وزارت ویلي: د افغانستان د علماوو شورا هغه لایحه، چې د اسلامي امارت د مشر له‌خوا جوړه او صادره شوې؛ په رسمي جریده کې خپره شوې ده.

د یادې لایحې له مخې، د علماوو شورا جوړښت، واکونه، مسوولیتونه او دندې د اسلامي نظام په چوکاټ کې تنظیم شوې دي. لایحه یوه سریزه، دوه بابونه، دوه فصلونه او ۲۲ مادې لري.

د لایحې له مخې، په ولایتونو او ولسوالیو کې د علماوو شورا لپاره رییس، مرستیال، اداري مسوول او مالي مسوول ټاکل کېږي او نور غړي هم د اړتیا له مخې ټاکل کېدی شي.

په لایحه کې راغلي، چې د علماوو شورا غړي باید د دیني علومو عالمان یا په خپله سیمه کې منل شوي شخصیتونه وي، صالح، دیندار او امانت‌ساتونکي واوسي او په شرعي علومو او ټولنیزو چارو کې کافي پوهه او بصیرت ولري.

د اسلامي امارت دفاع او ساتنه، خلکو ته د شرعي نظام د اړتیا په اړه پوهاوی ورکول، د اسلامي نظام د دفاع احساس پیاوړی کول، د مسوولانو د فعالیتونو او چلندونو سمون، د خلکو او مسوولانو ترمنځ د باور رامنځته کول، د نوي نسل د عامه پوهاوي زیاتول او له امارتي ادارو سره همکاري د دې شورا له مهمو مسوولیتونو څخه بلل شوي دي.

د صنعت او سوداګرۍ وزیر د یوه پلاوي پر مشرۍ د بېلاروس جمهوریت پر رسمي بلنه دغه هېواد ته سفر وکړ.

د صنعت او سوداګرۍ وزارت ويلي، دغه سفر د بېلاروس په دوه‌یم نړیوال صنعتي نندارتون کې د ګډون او د افغانستان او بېلاروس ترمنځ د اقتصادي او سوداګریزو همکاریو د پراختیا لپاره ترسره کیږي.

ټاکل شوې، چې د صنعت او سوداګرۍ وزیر د سفر پر مهال د دې نندارتون د ګډون کوونکو هېوادونو په عمومي غونډه کې ګډون وکړي.

دغه راز نوموړی به د بېلاروس د بهرنیو چارو، کرنې او صنعت له وزیرانو سره دوه‌اړخیزې لیدنې ولري. په دغو لیدنو کې به د سوداګریزو او اقتصادي اړیکو پر پراختیا، صنعتي او کرنیزو همکاریو، پانګونې او د نویو همکاریو پر فرصتونو خبرې او نظرونه وړاندې شي.

تمه ده، چې دغه سفر د افغانستان او بېلاروس ترمنځ د اقتصادي او سوداګریزو اړیکو د پراختیا، صنعتي همکاریو د زیاتېدا او د پانګونې د راجلبولو لپاره زمینه برابره کړي.