د جرمني چارواکو اعلان کړی؛ د اشافنبرګ د ښار په یوه پارک کې یو ۲۸ کلن افغان، چې د چړې پر برید یې دوه کسان وژلي؛ نیول شوی دی.

د باواریا ایالت د کورنیو چارو وزیر یواخیم هرمن ویلي، چې د چارشنبې پر سهاردغه کس په سکوینټل پارک کې د پخلنځي پر چړې برید وکړ.

هغه زیاته کړې، چې په دې بريد کې يو ۴۱ کلن جرمني او يو دوه کلن ماشوم، چې مراکشي الاصله و؛ ووژل شول.

دغه راز د دوه ماشومانو په ګډون څلور نور کسان ټپیان شوي هم دي.

هرمن ویلي؛ دغه کس، چې د تاوتریخوالي د ډک چلند مخینه لري؛ د رواني ناروغۍ تر درملنې لاندې و. هغه زیاته کړې، چې د دغه کس د پناه غوښتنې بهیر تړل شوی و او هغه ویلي وه، چې په ډسمبر کې به په خپله خوښه له جرمني ووځي؛ خو هغه په ​​جرمني کې پاتې شو.

دا په داسې حال کې ده، چې له څو بریدونو وروسته د جرمني حکومت د تېر کال په اګست کې د افغان مجرمینو د ایستلو بهیر اعلان کړې دی.

کابل ته د ایران د بهرنیو چارو وزیر د سفر له اعلان وروسته د افغانستان د بهرنیو چارو وزارت درېیم سیاسي رییس ویلي، چې دا سفر کولی شي دوه اړخیزې اړیکې یو نوي پړاو ته ورسوي.

د بهرنیو چارو وزارت د سیاسي چارو درېیم رییس ذاکر جلالي په ایکس پاڼه کې لیکلي، چې د افغانستان او ایران ترمنځ ګډې سیاسي، اقتصادي او امنیتي ګټې د دوه اړخیزو همکاریو د پیاوړتیا لپاره یو فرصت دی.

هغه زیاته کړې: " کابل ته د ایران د بهرنیو چارو د وزیر سید عباس عراقچي راتلونکی سفر د دې اړیکو د پیاوړتیا پر لوري یو رغنده ګام دی او کولی شي د دواړو هېوادونو ترمنځ اړیکې یوې نوې مرحلې ته ورسوي."

په کابل کې د ایران سفارت نن (پنجشنبه د سلواغې څلورمه) افغانستان ته د دغه هېواد د بهرنیو چارو د وزیر له راتلونکي سفر خبر ورکړی دی.

سفارت د سفر د دقیقې نیټې او هدف په اړه جزئیات نه دي ورکړي.

د یادونې ده، چې په کابل کې د ایران سفارت د دې سفر د نېټې او هدف په اړه جزئیات ندي ورکړي.

د امریکا بهرنیو چارو وزارت د سې‌شنبې پر ورځ د کډوالو د منلو داخلې پروګرام وځنډاوه؛ خو دا ځنډ د ځانګړو مهاجرتي ویزو (اس‌آی‌وي) لرونکو لپاره د پلي کېدو وړ ندی.

د سي این این د څرګندونو له مخې؛ د امریکا د بهرنیو چارو وزارت په یوه یادښت کې راغلي؛ د هغو کډوالو الوتنه، چې غوښتل یې امریکا ته سفر وکړي لغوه شوې ده.

له دې پرېکړې سره د افغانستان، کانګو، وینزویلا، سوریې او برما د اتباعو په ګډون امریکا ته د ۱۰ زره کډوالو سفر لغوه شوی دی.

سي این این د یوه امریکایي چارواکي د څرګندونو له مخې راپور ورکړی؛ له ۱۰۰۰ ډېر افغان کډوال، چې نیت لري امریکا ته سفر وکړي دا مهال په دوحه کې استوګن شوي او نور ۱۰ زره په پاکستان کې دي.

دې چارواکي زیاته کړې؛ په دې خلکو کې هغه کسان هم شته، چې د مهاجرت ځانګړې ویزه (SIV) نلري.

که څه هم د جګړې د وخت د متحدینو ټولنې رییس کیم سټافیري، چې په امریکا کې د افغان او عراقي کډوالو د بیا میشتیدنې لپاره کار کوي؛ ویلي د ټرمپ امر دا اندېښنې راپورته کړي، چې د SIV پروګرام به هم ودرول شي.